سۆناتای سەفەر.. ستیڤان شەمزینی
بەیانیان
سەیری ئاسمانی ھەوراویی دەکەم
ھەموو رۆژێک
دیمەنی ئەو کەشتییە بچووکانە دەبینم
بە رووباری “راین”دا ھاتوچۆیانە
خەڵک لەسەر شەقام و
مەکدۆناڵەکاندا چاو دەکەم
ھەموو شەوێک بە لای دیسکۆ و
سەرخۆشەکاندا تێدەپەڕم
ھیچ شتێک
بۆ من تازە نییە
ھیچ شتێک
ھیچ بۆ من ناگۆڕێت
من
لەناو جیھانە یۆتۆپییەکەی خۆمدا نیشتەجێم و
بە دوای عەشقێکی سەرابئاسادا رادەکەم
کتێبی عەشق
بە ئەسرین نوسراوەتەوە
کتێبی فرمێسک
بە دڵشکان نوسراوەتەوە
کتێبی دڵشکان
بە شیعر ئەنووسرێتەوە
ھێشتا سەر لەم مەتەڵە دەرناکەم
عەشق لە خەونێک زیاتر نییە
شیعر گەشتی بەردەوامی خەیاڵە
ژیان واقیعێکی رەق و تەق
ئەم سیانە لە کوێدا بە یەک دەگەن؟
دەترسم بڵێم لە ھیچ کوێ!.
لەسەفەردا بەرەو مەنفا
جانتای شانم
تەژی بوو لە ھەنسک
لە رۆژانی غوربەتدا
باوڵی یادگارییم
سەراوڕێژ بوو
لە نێڵە نێڵی
ئاگری نوستالیژیا
لە گەڕانەوە بۆ زێد
سۆمای چاوەکانم
لێوانلێو بوو
لە رەنگی نیشتمان
زۆر سەیرە!
لە سەفەردا
کاتی وەرینی
دوا گەڵای بیرەوەریی
لە مەنفا
ئانی رێکردن
بەسەر پشکۆی غەمدا
لە گەڕانەوە
ساتی تێپەڕین
بە ناو فرمێسکی شادییدا
خۆشەویستی تۆ
لە رۆحمدا قوڵپی دەدا
تا کۆتاییش
ھەر لە دڵمدا ئەنوێت
٦-١-٢٠١٩
ستیڤان شەمزینی
