خەیاڵە سەربڕدراوەکان.. شیعری ستیڤان شەمزینی
لەم چاخە سۆزانییەدا
بڕۆن خۆشەویستی لەلای شێتەکان
لە ناو شێتخانەکاندا بدۆزنەوە
ئەگەر لەوێش دەستتان نەکەوت
وەرن بەلوعەی دڵی من بکەنەوە
پەنجەرەی ھەستمان
تەمی نیگەرانی گرتوویەتی
کەسێک نییە
بە ئاوریشمی خۆشەویستی بیسڕێتەوە
ئەوەی من دەیبینیم
لایلایە بۆ عەشق دەکات شیعرە
کە چەشنی باخ
دڵی خۆی بۆ گوڵێک دەکاتەوە
بڕۆن لە شیعرەکاندا
بە دوای خۆشەویستیدا وێڵ بن
زەمەن، زەمەنی ونبوونە
پیاوەکان لەناو ھەوری تووڕەییدا
ون دەبن
ژنەکان لە تونێلە تاریکەکانی کولتووردا
ون دەبن
منداڵەکان لەناو یارییە ئەلیکترۆنییەکاندا
ون دەبن
کچەکان لە چاوی دەزگیرانەکانیاندا
ون دەبن
کوڕەکان بە دەم زریانی سەفەرەوە
ون دەبن
ئەوەی دەمێنێتەوە تەنھا خۆمم
لەنێو کتێبە قەبەکاندا بزر بووم
زەمەن، زەمەنی تەواو نەبوونە
شاعیرێک دەبینم
گریانی بۆ نانووسرێتەوە
نازانێت چۆن
قەسیدە گرینۆکەکەی تەواو بکات
ھەورێک دەبینم بە بارانەوە ئاوس بووە
ناتوانێ خەونی بارین تەواو بکات
خۆم دەبینم بە پەڕەمووچێکی سپییەوە
رۆژە رەشەکانی خۆم دەنووسمەوە
ھیچ کاتیش تەواو نابم لە نووسینەوە
خۆمم بۆ نادۆزرێتەوە
نازانم ئێستاکە لە کوێم!!
ئاوڕ بۆ ھەر لایەک دەدەمەوە
ھەر چیمەنی دڵتەنگییە
سەر بۆ ئاسمان بەرز دەکەمەوە
ھەوری چڵکن ناھێڵێت خۆر نیگام بکا
تا گوڵە ھێرۆکان لە مندا بگەشێنەوە
چارم نییە بۆ دۆزینەوەی خۆم
دەبێت لە تۆدا
بە دووی خۆمدا بگەڕێم
چەند بێزارم لەم سەردەمە
پیاوەکان رووخساریان وەک دەریایە
دڵیان پارچەیەک کۆنکرێت
ژنەکان سیمایان وەک خۆرە
رۆحیان شووشەی شکاو
ئەوە بە تەنیا خۆمم
بە رووخسارێکی شێواوە
رۆحم، لەسەر مەرقەدی
خۆشەویستی دەگەڕێتەوە
ستیڤان شەمزینی
