گەر فڕێتدام.. شیعری شاهۆ حوسێنی

تێهەڵچوونێکە بۆ شیعری فڕێم نەدەی فەرهاد پیرباڵ

گەر فڕێت دام
لێت ون دەبم
وەک دەریای شین
بێ بن دەبم
تاوڵی بەختی ڕەشم
لەکۆڵ دەنێم
جێ ژوان بە جێ ژوان دەگەڕێم
پرچی شین پەرێشان دەکەم
سەما لەدەوری ژان دەکەم
دەچمەوە دێ
مەکۆی تاسەی شاعیرێک و
گۆرانی‌بێژێکی مەحزوون
هەڵوەدای شار و
ئاوارەی شەوارەکان و کووچە و ڕێ
دەبم بە ماسێکی سەرشێت
سەرهەڵدەبڕم
تا قوڵترین شینایی زێ
کە بێ کەس بووی
بێ تاقەت بووی
ئیتر قەت بۆت نابمەوە ژێ
دڵت لە هەناوتا بکوڵێ
بانگم بە هاوار و سەڵا بکەی
ناوم بێنی
هەواڵی پەشیمانیش بنێری
دەڵێم نایناسم، کێ؟

شاهۆ حوسێنی

Dengekan

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.