بۆچی گاورباغی؟.. ناوەندی گاورباغی – بۆ هزر و هۆشیاریی سۆسیالیستی

گاورباغی بریتیە لە سمبوڵی مانگرتن و ترۆپکی خەباتی چینایەتی لە مێژووی کرێکارانی عێراق و کوردستان ، بۆ ئێمە نیشانەی هۆشیاریی چینایەتی کرێکاران و ڕێکخراووبونیان دەردەخات لە خەباتی چینایەتیدا دژی دەوڵەت و چەوسێنەران و داگیرکەرانی بەریتانیا، ئەم سمبوڵەش بۆ ئێمە پرنسیپێکی بەردەوامی خەباتی سیاسیمانە دژی جیهانی نیو لیبڕالیزم و سەرمایەداری نوێ.
ناوەندی گاورباغی هەوڵ دەدات لە ئێستادا ئۆرگان و بەشێکی زیندووی خەباتی چینایەتیمان بێت، هەر لە بزووتنەوە کۆمەڵایەتییەکان و پەروەردە و پەرەپێدانی هۆشیاری چینایەتی وچەکەرەکردنی ڕەوتێکی شۆڕشگێڕ و سۆسیالیست.
فەرهەنگ و کەلتووری ئێمە بە گشتی لە ئەزموونی بزووتنەوە کرێکارییەکان و خەباتی بەردەوامی ئەوان و خۆڕێکخستنیانەوە سەرچاوەی گرتووە ، بە دیاریکراویش کرێکارانی گاورباغی کە گیانی خۆیان بەخشی لە پێناو ئامانجە شۆڕشگێڕییەکانی چینی کارگەراندا، کە لە مێژووی بزووتنەوەی کرێکارییدا بوونەتە پێشەنگ و مەشخەڵ بۆ تێکۆشانی ئێستا و داهاتوومان.
کۆبەندی ئەرکی ئەم ناوەندە بریتییە لە: کتێب و نامیلکە و وتار لە سەر سیاسەت، ئابووری، دژە فاشیزم، مێژووی کرێکاران، سەندیکاگەرایی، فێمینیزم، هونەر و ئەدەب و کولتوور، دژە ڕەگەزپەرستی، ژینگە، ژیاننامە. هەروەها کتێبی ئەلیکترۆنی و ڤیدیۆ و هتد…. کە بەشدارن لە تێکۆشان و بەرخۆدان بۆ دادپەروەری کۆمەڵایەتی و ئابووری، یەکسانی نێر و مێ، ئازادی سیاسی، پاراستنی ژینگە، دژایەتی کۆلۆنیالیزم و ئیمپریالیزم.
مانگرتن و تێکۆشانی کرێکارانی نەوتی کەرکوک لە گاورباغی نیشانەی هۆشیاریی چینایەتی کرێکاران دەردەخات لە خەباتی چینایەتیدا لە دژی سیستەمی سەرمایەداری و چەوسێنەران. نابێت ئەوەش لە بیر بکەین کە کرێکارانی کۆمۆنیست دەورێکی پێشڕەویان بینی لە ڕێکخستن و ڕێنوێنیە شۆڕشگێرییەکانیان بۆ ئەم مانگرتنە شکۆدارەی کرێکارانی نەوتی کەرکووک.
هەڵبژاردنی ناوی “ناوەندی گاورباغی”، ئاماژەیە بۆ مانگرتنی کرێکارانی نەوتی کەرکوک لە ساڵی ١٩٤٦ دا، کە زیاتر لە (٥٠٠٠) هەزار کرێکار بەشداری ئەم مانگرتنەیان کردو دوای دوو هەفتە لەم تێکۆشانە چینایەتییە، کرێکارانی مانگرتوو لە لایەن دەسەڵاتدارانی ئەو کاتەی حکومەتی عێراق و داگیرکەرانی بەریتانیاوە هێرشیان کرایە سەرو کۆمەڵکوژ کران، کە زیاتر لە (١٦) کرێکار لە نەتەوە و ئایینە جیاوازەکان خەڵتانی خوێنکران و بە خوێنی سووریان لاپەڕەیەکی گەش و کۆڵنەدانیان بۆ مێژووی چینی کارگەرانی کوردستان و عێراق تۆمار کرد.
ئارمانجی ناوەندی گاورباغی دەکرێ لە یەک وشەدا دەببڕدرێ
“کتێب – جیهانێک بۆ بردنەوە”
ناوەندی گاورباغی – بۆ هزر و هۆشیاریی سۆسیالیستی

Dengekan

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.