شەوە شینەکانی سەرەڕۆیی.. شیعر/ کاوە عوسمان عومەر
بڕوام وایە لە دۆزەخام
بۆیە لە دۆزەخام
ئارسەر ڕامبۆ ( وەرزێک لە دۆزەخا)
بە خەواڵۆیی
لە ژێر ڕێژنە عیشقێکی
فێنک و قەشەنگا
تێپەڕین، هێشتا دڵۆپە
خوێنە ڕەنگینە ناسکەکانی
دڵ قەتماغەی ڕەشیان
لەسەر گابەردی بیرەوەری بوو
هەی شنەبای میهرەبانی
ئەی تراجیدیاهێنی
ڕۆژگارە ئەفسونیە ئاڵتونیەکانم
ببینە جیهان چی کەشتیەکی تێکشکاوی لێدەرچوە
تا بێ شادەماری قووڵی ژیان
ڕێگا دوورەکان خەڵتانی خوێن ئەکا
ئەزرنگێتەوە زرنگە زرنگی گوڵە گەنمی
ساتە بیرچوەکان، بە ئێواران
پیاسەی بەهەشتی وێرانەخاکی ئێستا دەکەم
و شەوانیش جەستەم دائەکشێتە
نێونیگای ئەو ئەستێرانەی لە مێرگی
شینی شەوێکی بوهەیمیا
ڕۆحیان دەرئەچێ،
بە نێو دڕک و داڵی دارستانی تاریکیدا
هێشتا تروسکەی ڕوناکیەک
دەروازەی سپێدەیەک لە دوورڕەوشەنئەکا
پێم ئەڵێ تەماشا کە ئەی گەڕێدە
ئاسۆیەک لە هیوای داڕمانی کۆشکەکانی
سەر ئێسک و پروسکی داماوانی دنیا
بێگومان، ئەبەدیەت
هەر لە یاخیبوندایە
لە بەردەم جادووی شەماڵی کەنارێکا
پشووی سەدان ساڵەی ئاوارەیی
ئەدەم، و کە بە ئاگادێم
حەزی سەرکێشی لە ڕۆحی منداڵیما ماوە
پرسیارە ئەزەلیەکان یەخەم بەرنادەن هێشتا
لەوەی کێم ، بۆ کوێ و تا کەی
ئازار و بەختەوەری کەم تەمەن
جیاوازی گەورەبوون و بەرائەت
پێزانینە بە لەدەستدانی بەهرەی گفتوگۆ
بە زمانی کەوو سوێسکەو
هەڵفڕین بە باڵی خەیاڵی نەورەس و
لە ئامێزگرتنی شەپۆلە بوهەیمیەکان لە ژێر
چنگە توندی بازە چاو تیژەکانی نێو هەورە سرکەکان
بە چیای ووشە هەڵئەزەنم و
بە شەپۆلی مۆسیقای مەرگ ؛
پاکژ ئەبمەوەو ،ئێستا ئەتوانم
پڕ بە گەرووم بڵێم
کە ڕازیم بە م شێواویە جوانەی گەردوون
باشیش گوێڕائەدێرم
لە ئامۆژگاری گوڵە سەوسەنێکی
سەرخۆش بە نەسیمی
بێهودەیی وەرزێک زیویی
هەروەک چاوی کچێکی نێو جەنگێک غەمگین
پەشیمان نیم
لە بەدیهێنانی ئارەزووی بوونەوە بە سوتماک
بوون بە پروشە بەفرێکی شنەبردوو
با ئەم دیمەنە بەستوەی ئێستا
لە یادمانا تۆمار کەین
هاوڕێی وڵاتە شەختە سەختەکانی نامۆیی
بۆیە ئێرە دۆزەخە، چونکە
هەموو شوێنێک بۆنی تەنیایی منی لێدێ
هەموو بارانێکیش
بۆسوتاوێک دوای کۆچی تۆ جێدێڵێ
دەرفەتێکی ترم باتێ ڕۆژگار
کە بژیم پراو پڕ
بە کانی ڕژاوی ڕەهای ساتەکان
گەرووم تەڕ کەمەوە
بە تریاقی سەرەڕۆییە گەنجێتیە هیچیە خۆشەکان
بێهۆش و بێ ئاگاو مەست بمەوە
خۆزگە پڕ بە پەرداخی هەور
دڵ پڕ بوایەوە لە تنۆکە بارانی میهرەبانی
کام سەمفۆنیای دڕندەی ئێستا
هێندەی شەوی شینی سەرەڕۆیی ئەوسام شیرینترە
کام خەڵوەت لە گوڵبارانی ژێر
ئێوارەیەکی پژاو بە زەمین و خۆر و زەریا ئەفسسونترە
بەڵام مەرگ بە تینویەتی ئاوی عیشق
خۆشترە ئازیز، ساناتریشە گیاندەرچێ
لە بەردەم دەرگای پرسیارە قورسەکانی بوون
چی گەمژەییەکە ، ڕازی بوون
بە ئامادەبوون لە شانۆی عەدەمێکا
ئەکتەرەکانی مرۆڤی ئاسایین
ترسنۆکانە، لە چارەنووسی
ترسناکی تەنیایی یەکتر هەڵدێن.
شیعر/ کاوە عوسمان عومەر
Dengekan
دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.
