گەڕان و سۆراخ و شەقامەکانی عەقاریی و پرسیار و قاوەخانەی ڕەیحانە و من و هەموو شتێ ، بە بێ تۆ.. نەوزاد بەندی
( ئەوانەی کە تەنانەت نزاکانیشیان تەنها بۆ خۆشبەختیی خۆیانە، بە بێکەسیی ئەمێننەوە )
من کە لەسەرتاپای ژیانما بە دوای هیچا نەگەڕاوم ، بەوەی بە دوای تۆدا گەڕام ..پێم سەیر بوو ..!
لەو دنیایەی وەک سینییەک هەموو شتێکی تیا دیارە و
هیچ ون نابێ ، بەوەی تۆ هەر وون بووی لەلام ..پێم سەیر بوو ..!
من ، وەک مرۆڤێکی مام ناوەندیی ،
ئەوانەی لە ماڵ چوونە دەر
ئینتەرنێتیان پێ نامێنێ..
تۆ ، وەک مەتەڵخوانێکی کۆن ،
ووتت هەر ڕەیحانە و تەواو ..
گرنگ نییە لە هۆڵندا بی یان پاریس ..
تۆ هەفتەیەک کەناری بی و
ئەو قەفەزێکی ژەنگاویی ..
ئەو هەفتەیەک قەلەڕەش بێ و
تۆ قەفەزێکی سیحراویی ..
گرنگ نییە ..
نەهاتبووم دەرگایەک ئاوەڵا بێت و ..
قۆرییەک چا دەمکرێ بۆم ..
من هاتبووم ،
ڕاستێکەی ڕامکرد بوو لە خۆم ..!
وەک برینێ پێش سی و هەشت ساڵ ،
لە پزیشکێ هەڵهاتبێ ..
ژیان و مردن بووم پێکەوە ..
وەک تاکێ پۆستاڵی ڕەشی
ڕۆمانیی ، پێش دەیەها ساڵ ..
نازانم چۆن خۆم هەڵنەدایە ناو زبڵی حیزبێکەوە؟!
پیاوێکی ڕەینکوت لەبەری ،
پانتۆڵ خوری ، پێڵاو مۆدێلی ئیتاڵیی .. ملپێچێکی مام ناوەندیی وەک ئەوانەی لە ماڵ دەرچوون، مۆبایلەکەیان بیر چووە یان جزدانە ..
ئێستا چۆن لەو جەنگەڵەدا ،
ئەگەڕێم لە دوای زەنگیانە ؟ ..
ڕاستێکەی من نەهاتبووم
تۆ بدۆزمەوە و بمبینی ..
ئەوەندەی تینوی چاوشارکێی حەفتاکان بووم ..
حەزم ئەکرد بە کۆڵانێکا بگەڕێم ،
باهیچیش نەدۆزمەوە ..
بۆ چەند سەعاتێ، مناڵیی و کارێزی وەستاشەریف و
عەتا و ئاژێنی عەلی بەگ هاتنەوە لام ..
لە پڕا وون ئەبوونەوە و
هەم بە دوایانا ئەگەڕام ..
من ئەمزانی تۆ خەونت بە شاعیرێکی باڵابەرزی وەجاخزادەی وەک ئۆسکار وایڵدەوە ئەدی ..
لە ئوتومبیلێکی بوگاتی دابەزێت و ..
لە نهۆمی پەنجا و چواری تاوەرێکا،
پێت بڵێ فەرموو ..وەرە ژوور ..
من ئەمزانی وەک دارتوویەکی پەککەوتە ئەتبینیم و ..
تووی شیعرت ئەچنیەوە ..
ئەتویست وەک حەبیبە لە دوورەوە خۆت نەمر کەی،
تاوێ نەچیتە بنیەوە ..
بێ ئاگا بووی لەوەی منیش
وەک ڕاوچییەکی بێ هیوا،
داوێ هەڵباتە ناو دەریا ..
تۆم هەڵئەدا ، تا ڕۆژانی زانکۆ و
یادی پێش چل ساڵت پێ ڕاو بکەم ..
تا شیرینت پێ بانگ بکەم ..
( شیرین بە دوو چاوی سەوز و ..
دوو گۆنای خڕ و گەشەوە ..
بە جوانترین جل و بەرگ و
سەرسامترین ئەندامی جوانی
لەشەوە ..
هەموو ڕۆژێ لە ڕێگاکەمدا ئەوەستا ..
لە دنیای پڕ سۆز هەستا ..
چاوەڕوانی منی ئەکرد ..
هەموو ڕۆژێ
شیرین بە ماشێنێکی شیک
چاوەڕوانی منی ئەکرد
منی هەژار ..
منی تاریک ..
نا ..شیرین ..نا …..)٭
ئەوەیش تەنها خولیایەکی سارد و سڕ بوو ..
درەختی تینوو فێنکایی لە کوێ بێنێ ؟
هەوری ئاسمانی ئەم شارە ،
تەمی خەم و
دوکەڵی جگەرە و ترسی خەڵکەکەیە ،
بەفر و باران بۆ ئاوایی لە کوێ بێنێ ؟ ..
ئیتر بە دواتا ناگەڕێم ..
چونکە چیتر هیچم پێ نادۆزێتەوە ..
وەرەوە ماڵی باپیرت ..
جۆرێ وون بووم ،
وەک مردنی کەسێکی مام ناوەندیی وام ،
کەسم پێ کۆناکرێتەوە ..
شتی تریش
٭ ئەوەی ناو کەوانەکە ، شیعرێکی پێش 43 ساڵە، بەناوی ــشیرین ــ لە ژمارە 40 ی گۆڤاری کارواندا بڵاوم کردەوە ساڵی 1984 ئەو کاتە تەلەبەی پۆلی یەکەمی کۆلێژی زانست بووم لە زانکۆی موسڵ
