لەپەڕاوێزی دوو لێدوانی یەک بەدوای یەکی مەسعود بارزانیدا!.. تاهیر عیسا

بارزانی لەیادی کارەساتی ئەنفالی بارزانیەکان، ۳۱ ی حەوتی ۱۹٨۳ و یادی کارەساتی ئەنفالی یەزداییەکان، ۳ ی هەشتی ۱۹۱٤، یەک بەدوای یەک و لەهەردوو کارەساتەکەدا لێدوانی دا. ئەوەی جێگای سەرنجە بۆ بەدبەختی مەسعود بارزانی و پارتەکەی، یادی ئەنفالی بارزانیەکان ڕێک لە سی ویەکی مانگدا ڕویداوە، واتە سی ویەک، هەم بۆ ئەوان ڕەقەمێکی بێزراوەو هەم بۆ خەڵکی کوردستانیش،کاتێک پاشکۆی ئابی پێوە دەلکێندرێت یادەوەریەکی تاڵە، بەتایبەتی بۆ ئەوانەی لەو یادەوەریەدا هەم کەس وئازیزیان لەلایەن ڕژێمی بەعسەوە تێداچوون، هەم بۆئەوانەش کە لەو ڕۆژەگارەدا دووچاری ئاوارەیی وماڵوێرانی و ئازار بوونەتەوە. واتە مانگێک دوای ئەو یادەوەریەی مەسعود بارزانی لێدوانی لەسەردا، سوپای بکوژو ئەنفالچی هەشت بارزانییان هێنایە ناو شاری هەولێرو هەر لەوڕۆژەو لەسەر دەستی ئەو سوپا دڕندەیەی ڕژێمی بەعس، بەسەدان کەسی ئۆپۆزیسیۆنی عێڕاقی و کوردستانیان لەگەڵ گەڕانەوەیاندا ڕاپێچ کردوو دواتریش ئیعدام کران، ڕێک مانگێک دوای یادەوەری بارزانیەکان، مەسعود بارزانی و حیزبەکەی لەهەموو سی ویەکی ئابێکدا ئیحڕاج دەکرێن و لەهەموو لایەکەوە خەڵکی کوردستان لەوبیرەوەریە تاڵەیاندا بەتایبەت لەلایەن ئازادیخوازانی خەڵکی شاری هەولێرو دەوروبەری، بارزانی وپارتەکەی سی ویەک باران دەکرێن! ئەوانیش بەبیانوی پڕو پوچ و بێناوەرۆک دەیانەوێت پاساو بۆ ئەو سکانداڵە دزێوەیان بهێننەوە. سی ویەکی ئاب، وەک یادەوەریی تاڵی شەڕی ناوخۆیی ئەوەی بۆ خەڵکی کوردستان ئیسپات کرد، کە ئەوەی پارتی و بارزانی لەسی و یەکی ئابدا کردیان و دەستی دڕندەترین ڕژێمی بکوژی هەزاران لەخەڵکی مەدەنی وبێتاوانی بارزانی و هەزاران لەخەڵکی ئازادیخوازی کوردستان و عێڕاقیان وەک دۆست وفریادڕەسی خۆیان ڕاکێشایە ناو شاری هەولێر، کە هەتا ئێستاش دوای داڕوخانی ئەم ڕژێمەش پاشماوەکانی لەهەولێرو لەژێر سێبەرو دەسەڵاتی بارزانیدا لەوپەڕی ڕیفاهو ئارامیدا دەژین، کەخۆشیان زۆر جارو لەڕێگای لێدوانی لێپرسراوەکانیانەوە ئەم ڕاستییە دەدرکێندرێت! هەرلە مانگی چوارو پێنجدا بە چەندحەڵقەیەک کەناڵی العربیە لەبەرنامەی الذاكرة السیاسیة، چاوپێکەوتنی لەگەڵ جەمال مستەفا سوڵتان، زاوای سەدام(هاوسەری حەلا) و سکرتێری دووەمی سەدام حوسێندا، ئەنجام داوە، دوای ئەوەی هەژدە ساڵ لەزینداندا ماوەکەی بەسەر دەبات، ئاراد دەکرێت و ڕو لەهەولێر دەکات. ئەو لەو بەرنامەیەدا زۆر ستایشی مەسعود بارزانی دەکات و ڕێگەی داوە ماوەیەک دوای ئازادکرانی لە ساڵی ۲۰۲۱ دا لەهەولێر نیشتەجێبێت. هەروەها دەڵێت مەسعود بارزانی عێڕاقیەکی پاکەو بانگی کردۆتە لای خۆی و لێی پرسیوە کەدەتوانێت چی بۆ بکات و چۆن هاوکاری بکات، وەئەو دەگێڕێتەوە کە مەسعود بارزانی لەڕێگای پێگەی خۆی و پەیوەندیەکانیەوە هەوڵی داوە پاسپۆرتی عێڕاقی بۆ دەربکات بۆ ئەوەی بتوانێت سەردانی خێزانەکەی بکات لەدەرەوەی عێڕاق. ئێستا ئەوەی بارزانی هەر شتێک لەبارەی یادەوریی ئەنفالی بارزانیەکاندا بیڵێت، بانێکەو دوو هەواییەو تەنیا یاریکردنە بە یادەوەرییەکان وشەو چەمکە چەواشەکارانەکان بۆ لێدوانی ئیعلامی چەواشەکارانە!؟ مەسعود بارزانی، لەسی ویەکی ئابدا نیشانی داین کەئەوەی ئەوان کردیان خیانەت نەبوو لەخەڵکی کوردستان بەڵکو ئەمە بنەماو ئەخلاقیاتی سیاسیی و کلتوری ئەم پارتەو بنەماڵەیەیە، کە لەوەتەی هەن مۆتەکەی سەردڵی خەڵکی کوردستان و لەمپەری سەر ڕێگای ئازادی و خۆش بەختی خەڵکی کوردستان و تەنانەت پارچەکانی دیکەی کوردستانیشن، هەردەم و هەمیشە عەباسوری پێش لەشکری داگیرکەران و گوێ لەمست وئەڵقە لەگوێیان بوون بۆ بەچۆکدا هێنانی خەباتی ئازادیخوازی لە هەر چوار پارچەی کوردستاندا، ئەمەش تەنیاوتەنیا بەقیمەتی پارێزگاری لەپێگە خێڵەکی و چیانەیەتیەکانی خۆیان بووە لەسەر جەم دەورانەکاندا . زۆر لەم یادەوەریەش تێناپەڕێت، جارێکی دیکە ئەوان پشکی گەورەشیان لەئافڕاندنی بیرەوەریەتاڵ و پڕ لە ئێش و ژانەکەی سێی ئابی ساڵی ۲۰۱٤ ی کارەساتی شەنگالیشدا هەیە، لەخەڵکی شەنگال و کوردستانیش ئەمە شاراوەنییە. مەسعود بارزانی بەر لەو کارەساتەی بەسەر موسڵ وشەنگالدا هات لەلایەن داعشەوە، هەڕەشەی لەمالیکی سەرەکوەزیرانی ئەو کاتەی عێڕاق کرد، دوای هەڕەشەکانی مەسعود بارزانی زۆری نەبرد موسڵ لەلایەن داعش کونتڕۆڵکراو سوپای عێڕاقیش ئینهیاری کرد لەو پارێزگایەو دووچاری شکست وڕاکردن هات. دوای موسڵیش پەلاماری شەنگال درا، پارتی و هێزە فشۆڵەکەی لانی کەم دەیانتوانی بەو ئەندازەیە خەڵکی شەنگال نەخەنە ناو قورگی ئەژدیهای داعشەوە، کە بەهەزارانیان لێ کۆمەڵکوژکراو بەهەزارانیشیان بەدیلگیراو بەهەزاران ژن ومناڵی مێیینەشیان وەک کۆیلەو کەنیزەک لەگەڵ خۆیان وەک مەڕوماڵات و وەک هەر دەستکەوتێکی دیکەی جەنگی (محەمەدی ئیسلام ئاسا) لەگەڵ خۆیان بەغەنیمەت گرت، کەناڵی ڕۆژ تیڤی لەسەرو بەندی هێرشی داعشدا بۆ سەر شەنگال ڕوماڵی کارەساتەکەی دەکرد، ئەو ڤیدیۆیەی تێیدا پرسیاری لەو هێزە زۆرو زەبەلاحەی پارتی کەلە حاڵەتی پاشەکشەو ڕاکردندابوو دەکرد، بەهەزاران شەیری لەتۆڕە کۆمەڵایەتیە جۆراو جۆرەکاندا هەیە، کەدەیگوت چما هەڵدێن و چما دیفاع ناکەن لەوخەڵکە، ئەوان دەیان گوت لەسەروی خۆمانەوە ئەمرمان پێکراوە کە پاشەکشێ بکەین، ئەوان ڕاستیان دەکرد، ڕێککەوتنێک لەسەروی خۆیاندا کرابوو کە هێزی حەشاماتی پارتی لێی بێخەبەربوون، ئەویش دروستکردنی دەوڵەتێکی تازەی سوننە، کە شەنگال خاڵێکی ستراتیجی گرنگ بوو بۆ تورکیاو کەپارتی و بنەماڵەی بارزانیش لەپاڵیدا جێگاو ڕێگایان لەنەخشەی تازەدا بۆخۆیان مسۆگەردەکرد. داعشیش لەو کارەساتە شومەدا، مەبەستی بوو ڕوداوە مێژووییەکانی سەردەمی سەرهەڵدانی ئیسلام لە سەر یەزداییەکاندا کەئەوان بە کافریان دەزانین تاقی بکەنەوە، بۆ ئەوەی لەڕێگای کوشتاری ئەوان و بەکۆیلەکردنی سێکسی کچ و ژن و مناڵە هەرزەکانی ئەوانەوە وێنای ڕاستەقینەی ئیسلام بەدنیادا بگەیەنن و گەنجانی موسوڵمانیش کەلەناو ژینگە ئیسلامییە نەریتیە دواکەوتووەکاندا دوچاری کەبدی سێکسی و نامۆیی بە مێیینە کراون، ڕاکێشێتە ناو دەوڵەتەکەیەوەو لەوێدا بتوانن وەڵامی غەریزە سێکسییە حەیوانئاساییەکانیان وەربگرنەوە، وەک ئەو ڕێگاو شوێنەی ئیسلامیش لەسەردەمی سەرهەڵدانیدا، هەم لەڕێگای غەنیمەو تاڵانی و هەم لەڕێگای بەکۆیلەکردنی ژناندا گرتیە بەرو تیایدا لەماوەیەکی زەمەنی کەمدا گەشەی تێداکرد!؟ ئەوەی ڕۆڵی سەرەکی لەم کارەساتە شومەدا بینی، دەوڵەتی تورکیا بەسەرۆکایەتی ئەردۆغان و پارتی بە سەرۆکایەتی مەسعود بارزانی و داعش بە سەرۆکایەتی ئەبوبەکەر بەغدادی بوو. لەو سەردەمانەدا مەسعود بارزانی لەسەر ناوی ئەم رێککەوتنە نهێنییە سەردانی عەممانی پایتەختی وڵاتی ئوردونی کرد بوو و لەوێ لەسەر ناوی کورد ئیمزای خۆی لە ژێر پەیمانی دامەزراندنی دەوڵەتی ئیسلامی داعش و کۆمەڵکوژی شەنگالدا دانابوو. نێچیرڤان بارزانی دوای ئەو ڕوداوانە ڕایگەیاند ئێمە دەبێت لەگەڵ واقیع تەعامول بکەین و تازە هەرێمی کوردستان دراوسێیەکی نوێ ی هەیە.

تاهیر عیسا/٦.٨.۲۰۲٥

Dengekan

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.