داواكاری … ستار ئه‌حمه‌د

چۆن بوو ئاده‌م
له‌و ئاسمانه‌
به‌رز به‌رزه‌وه‌
هاته‌ زه‌وی
به‌خه‌ون و خه‌یاڵ
سواری ئه‌سپێكی
خۆر ره‌نگ بوو
یاخود به‌باڵ
ئه‌و كاته‌ حه‌وا له‌كوێ بوو
له‌نێو گیانی
یاخود وه‌كوو ته‌رمی هابیل
ته‌كه‌ی ده‌هات له‌سه‌ر شانی
به‌چه‌ند رۆژ
گه‌یشتنه‌ سه‌ر ئه‌رز
حه‌ز ده‌كه‌م بزانم حه‌وا
كورت و خڕ بوو
یان باڵا به‌رز
چ كاتێك هاتنه‌ خواره‌
شه‌و بوو یان رۆژ
په‌یامیان چی بوو بۆ دوارۆژ
ئاره‌زوومه‌ ..
به‌زمانی ئه‌وان بدوێم
هه‌تا كه‌چوومه‌ سه‌ردانیان
بتوانم په‌یامی خۆم و
هه‌موو مرۆی ئه‌م جیهانه‌
به‌باشی به‌گوێیان بده‌م
كێ ده‌توانێ
ئه‌درێسێكی وام بداتێ
هه‌تا بگه‌مه‌ خزمه‌تی
باوكی ئاده‌م

ستار ئه‌حمه‌د

Dengekan

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.