ڕوونکردنەوەیەک … پشکۆ ناکام
….لە گۆشەی کلتووری سایتی ” سپی” خۆشەویست ، ڕاپۆرتێکم بەر چاو کەوت کە ( تیپی شانۆی ئارارات/ کوردستان – ئەوروپا ) بە نیازە شانۆگەری” ڕووتبونەوە ” لە سلێمانی پێشکەش بکات ، لێرەدا سەرنجی سایتی سپی و ئەهلی هونەر و شانۆ بۆ چەن خاڵێک ڕائەکێشم :
– بەندە لە کۆتایی هەشتا وسەرەتای نەوەکانی سەدەی ڕابردوو ئەندامی” تیپی شانۆی ئارارات” بووم لە ووڵاتی سوید ، تیپەکە کە هونەرمەندی هەڵکەوتوو د. فازل جاف ئەیبرد بەڕێوە ، جگە لە ناوی تیپەکە هیچ کوردستان و ئەوروپایەکی پێوە نەلکابوو ” بڕواش ناکەم وەک ئەوەی باوە دوو حیزب لە پڕ یەکئەگرن و یەک دوو پیت یان ووشەیەک ئەچێتە سەر ناوی حیزبە تازەکە ، ئەمەی ئاراراتەکەی هەولێریش هەر وا بێت..”…زۆرم لە خۆم کرد لەو کوردستان / ئەوروپایە تێبگەم ، سەرکەوتوو نەبووم ! تیپەکە لە کوردستانە و خۆی ئەوروپییە ، یان تیپەکە لە ئەوروپایە و بەش یان لقێکی لە کوردستان هەیە..!!!
– ئەو شانۆگەرییە کە لە وەرگێڕان و دەرهێنانی بەڕێز د. فازیل جافە ، کاتی خۆی ساڵی 1989 لە ستۆکهۆڵم پێشکەش کرا وە و بەندە و کاکە( کوردۆ گەڵاڵی ) ئەکتەری هەردوو کەسایەتییەکەی دەقەکە بووین ، بە شاهیدی ڕەخنەگر و بینەران تا ئاستێکی باش سەرکەوتوو بووین .
– ئەوەنەی من بزانم کارکردن لە دەقەکانی ” مرۆژێک ” پارووی هەموو کەس نیە ، مەگەر کەسێکی وەک “د. فازیل” نەک هەر پێی بوێرێ ، بەڵکو بەڵانسی هاوتروپی دەق و دەرهێنان وەک پیێویست بەرجەستە بکا. …لە رووی کارەکتەرەکانەوە خۆم ئەزانم ئەبێ چەن ماندوو بیت تا هەست بە ئافەرینی ماییرهۆڵد و مرۆژێک بکەیت..
– ئومێدەواریشم ئەو برادەرانەی هەولێر کە ئەیانەوێ خۆیان لە قەرەی
” ڕووتبوونەوە ” لە سلێمانی بەن ، وەک عورفێک و ڕەوشتێکی هونەری ، باسێک لەوە بکەن عەوامێک چەن هونەرمەندێک لە غوربەت ئەو شانۆگەرییان پێشکەش کردوە…
….کەمێک کۆنترۆڵی خۆم کرد و نەمویست ئەم ڕوون کردنەوەیە توند بێت تا ئەو کاتەی ئەو برادەرانە لە هەولێرەوە تەشریف ئەهێنن بۆ سلێمانی ، ئەو کاتە قسەی زیاتر و گفت و گۆی چڕترم ئەبێت.. هەر لەبەر هیچ نا لەبەر بەبیر هێنانەوەی ئەو برادەرانە کە پێش دووشەممە ، یەک شەممە و شەممە هەبووە لە مێژوودا…….
پشکۆ ناکام
27/08/2018 – دووشەممە
