مانەوە.. پشکۆ ناکام
(( نامەی ئیسلامییەک بۆ داواکاری
پەناهەندەیی لە بەریتانیا…..))
“بەڕێوەبەرایەتی کاروباری بێگانەکان “ی بەڕێز… home office
ئەم نامەیەتان بۆ ئەنێرم و تکاتان لێ ئەکەم ، تکای موسڵمانێکی لێ قەوماوی ماڵ تیا چوو ، من بە هەزاران دۆلارم سەرف کردوە تا گەشتومەتە ئێرە ، گەر بمنێرنەوە وڵاتەکەی خۆم لە خەفەت و بێ پاشەڕۆژیا ئەمرم ، تکایە با ئێوەی وڵاتی “عیلمانی-کافر” موسڵمانێکی وەک بەندە لە خۆ بگرن چونکە بە هەزاران کێلۆ مەترم بڕیوە و هەزاران جار حەمد و سەنای خوای تەعالام کردوە کە بە پشت و پەنای ئەو گەشتومەتە ئێرە، ئەم وڵاتەی ئێوە کلیلی بەختەوەرییە بۆ من و بۆ هەزاران موسڵمانی تر کە بە ناچاری و لە نەبوونیا وڵاتەکەی خۆمان بە جێهێشتوە و چاومان لە ڕەحمەت و میهرەبانی ئێوەی عیلمانی-کافرە کە قبوڵمان بکەن وەک پەناهەندەیەک لە مەملەکەتی شاژن نشین بژێین….تکاتان لێ دەکەم، لە نەهامەتی وڵاتەکەی خۆم ڕزگارم کەن و جێم بکەنەوە…ئەمەوێ لە خێر و بەرەکەتی وڵاتەکەتان بخۆم. حەبی گەچ” ی وڵاتەکەی خۆم هەراسانی کردووم. با لە خەستەخانەکانتانا چارەسەر وەرگرم. لە جیاتی”میزی حوشتر” دەرمانی پزیشکیی عیملانی- کافر دەردم تیمار کات، سەرەڕای ئەوەی موسڵمانم ئەمەوێ لە سایەی خێر و بێری عیلمانیە کافرەکان بحەسێمەوە، ئەمەوێ لە پارەی باجی مەشروب و کەباریا و مەلها و قومارخانەکانتان مزوگەوتێ دروست کەم بۆ ستایشی خوای تەعالا کە منی گەیانە ئێرە، لە هەمان کاتدا دوعا بکەم ماڵ وێران و بەهەلاکەت چن چونکە دووا جار ئێوە مولحید و کافرن..استغفر اللە……موسڵمانی ڕاستەقینە لە هەر شوێنێ بێ نابێ ئەرکەکانی خۆی لە بیر بچێ کە گرنگترینیان دژایەتی عیلمانییەتە..،
تکاتان لێ ئەکەم کە دڵ ڕەق نەبن بەرامبەرم، با لە وڵاتەکەتانا بمێنمەوە، ئەزانم ئێوە بەراز خۆرن، بەڵام من خۆم نایخۆم، ئەزانم لای ئێوە “هۆمۆ” ئاساییە بەڵام بۆ مانەوەم چاوپۆشی لێ ئەکەم، بۆ ئەوەی توڕە نەبن بەلای باسی “جێندەر” هەر ناچم و خۆم لە لێپرسینەوەی یاسایی بە دوور ئەگرم، ئێوە ئافرەتتان کردوە بە کەڵەگا بەسەر پیاوەوە، بێ دەنگ دەبم و پێویست بکا دەڵێم ” ئافرەت نیوەی کۆمەڵگەیە” گەر حەز ئەکەن سێ روبعێتی، ئەزانم کە لێرە بمێنمەوە بۆم نیە دوو ژنم هەبێ ، بۆشم نیە مناڵەکانم حەسیر مەیان کەم ناشتوانم بە زۆر کچەکەم موحەجەبە پۆش کەم، خۆ تەقیننەوە هەر زۆر قورسە ، هەموو ئەوانەم قبوڵە ، گەرچی لە ناخما شتێکی ترە و لە مناڵییەوە لەسەرییان ڕا هاتووم، با لە پاداشتی ئەو قبوڵ کردنە لە وڵاتەکەتاندا بمێنمەوە، منی موسڵمان لەم وڵاتە عیلمانی – کافرە گوێ ڕایەڵی هەموو شتێکتانم ، بەس قبوڵم کەن ، پەنام بۆ هێناوون.
ڕاستە لە دینەکەی ئێمەیا نووسراوە بە شمشێر سەرتان بپەڕێنین و تەفر و توناتان کەین، بەڵام لەکاتی پێویست و تەنگانەیشا ووتراوە “لکم دینکم و لنا دیننا” ئێوە دینی خۆتان هەیە و ئێمەش هی خۆمان ،،بۆیە مەرجەکانتان قبوڵ ئەکەم بۆ: مانەوە…
