بیرەوەریيەکانی فەقێیەکی گومڕا-(47).. شەماڵ بارەوانی
دەمارگیری منی بڕوادار و دڵگەورەیی شیوعییە بێ بڕواکان!
بەشی چل و حەوت!
کە فەقێ بووم لەقوتابخانەی ئیسلامی(موحەمەدیە بۆ زانستە شەرعیەکان)، لە هەولێر و لە گەڕەکی ئیسکان و لەناو مزگەوتی(حاجی قەرۆک)، هەموو جار کاتێک دەهاتم بۆ بازاڕ، هەر بە ئەنقەست تۆزەک ڕێگەی خۆم دەگۆڕی و بە نزیک مقەڕی شیوعیەکان دا ڕەتدەبووم، ئەوکات مقەڕێکی شیوعی لە نزیک هۆڵی میدیا و میوانخانەی شیراتۆن بوو.
هەرچەندە من بەتەمەن گچکە بووم، وەلێ ئیسلامی و مرۆڤێکی تابڵێیت دەمارگیر و ئایدیۆلۆژیست بووم.
جا پیاوە ئایینی و مەلاى ئیسلامی و بانگخواز و واعیزه ئیسلامیەکان، بە پێی ئیدەلۆژیا و بیرو باوەڕ و قەناعەتی خۆیان، تێگەیشتنێکی زۆر کۆمێدی و سەیریان لە مێشک و هزردا دروستکردبووم سەبارەت بە شیوعیەکان، وەکو: شیوعیەکان سنوورێکیان بۆ سێکس نییە، کەسە نزیکەکانیان لەخۆیان مارە دەبڕن، کافر و دوژمنی خوداوەندن، بێ بڕوا و دژە ئایینن و دەڵێن ئایین تلیاکی گەلانە و خوداش بوونی نییە و شیوعیەکان و واو وان.. بە کورتیەکەی من شیوعیەت و شیوعیەکانم لا وەکو دڕندە وابوو، هەتا بڵێیت ڕقێکی ئەستوور و تەسەورێکی نێگەتیڤ و خراپ و نزم و هەڵەم سەبارەت شیوعیەکان لە ئەقڵ و مێشکدابوو.
جا هەموو جارێک کەبە وێ دادەڕۆیشتم بۆ بازاڕ، کاتێک بەپێش مقەڕەکە دا ڕەتدەبووم، لەپێشەخۆم کۆمەڵێک جوێنی مزر و دنیایەک نەفرەت و تفم بۆ مقەڕەکە و شیوعیەکان حەواڵە دەکرد و دەمگوت: خودایە گیان، ئەوشەو ڕۆژ نەبێتەوە، تا هەموو ئەو شیوعیە بێ بڕوایانە بکەیت بە مەیمون و بەراز !
بەو شێوەیە بێ ئەندازە ڕقم له چەپ و شیوعیەکان دەبوویەوە، بێ ئەوەی یەک دێڕم لەسەر فەلسەفەی مارکسیەت و پرۆگرام و ئیدەلۆژیەتی شیوعیەت خوێندبێتەوە.
ئەو ڕق و دەمارگیریەم بەرهەمی ئەوەبوو کە لە پیاوە ئایینی و ئیسلامیەکان و واعیزەکان بیستبوو.
هەینیەک مەلایەکی هاوڕێم پێی گوتم من کارم هەیە، من لە جیاتی ئەو، چومە گوندەکی لای قوشتەپەی خوتبەم داو وتارەکەشم لەسەر شوعیەت بوو.
مەلاکە پێشوتر ئاگاداری کردمەوە و بە منی گوت ئەو گوندە زۆربەی شیوعین و لەحەقیان وەرە و بیانکوتە.
منیش گوتم باش، خەمت نەبێت من دەزانم چۆن دەردیان دەرمان دەکەم و لەحەقیان دێم، ئەو شیوعیە کافرانە.
بە حوكمی ئەوەی ئەوکات هەم هەرزەکار و هەم ئیسلامیش بووم، وەکو ئاماژەمدا، کە تێروانینەكی زۆر سەقەت و نەرێنی و خراپم لەسەر شیوعیەت هەبوو. سەرتان نەیەشنم، ڕۆشتمە سەر مینبەر و هەرچی جنێو لە فەرهەنگی دەمپیسی و جنێودا هەبوو، هەموییم هێناو لۆ داکی فیورباخ و بابی مارکس و خوشکی لینینم نارد، لەناو خوتبەی دیقەتمدا خەڵکەکە هەمووی پێ دەکەنین !
لەدرێ خۆ گۆتم عەجیب ئەوە لۆ هەموویان سمێڵ ختکەیانەو پێ دەکەنن؟! خۆ خوا نەخواستە و عەیب نەبیت کەس هەوایەکی لێ بەرنەبوویە؟! سەیری یەخەی کراسەکەمم دەکرد، نەوەک ملكەم خواربی و عەیبەیەک، یان، جیقنەک، یان شتەکی پێوە بیت.
گوتم دیارە بۆیە وا ئەو خەڵکە پێم پێدەکەنن! توڕەیی و حەماسەت و گەرمیەکی وا منی گرتبوو، ببووم بە تەندوور و یەك تۆز مابوو کۆنتڕۆڵ لەدەست دەم و برێم هەی بێ ئابڕۆینە، ئەوە ئەنگۆ بەچ پێ دەكەنن، شەرم لەخۆتان ناکەن، چبووە، خۆ كەس هەوای لێ بەرنەبوویە؟!
کە وتار تەواو بوو و لەگەڵ ئەو پیاوەی دەهاتین لۆ دەرێ، زۆر بەڕێزەوە تەوقەکی گەرمی لەگەڵ کردم و گوتی مامۆستا گیان، دەبێت لۆ نانی نیڕوانێ میوانی من بیت.
گووتم باشە بەسەرچاو، وەختێ چووینە ماڵ، بەکابرام گووت: ئێستا بەس ئەتو بەمن برێ، ئەو خەرکە ئەوڕۆ لە مزگەفتێ، لەکاتی وتاردانێم، لۆ هەموو پێدەکەنین؟ گۆتی: مامۆستا دەزانی ئەمە زۆربەی شیوعینە خەڵکی ئەو گوندەی؟ وای کە تەریق بوومەوە کە وای گوت، عەرد شەق بوایە، لەشەرمان دەچوومە ناویەوە، ئینجا زانیم ئەوان بە گێلایەتی من پێکەنینە و شیوعیش وانین وەک من حاڵی کرامە. دواتر بەڵێنم بە خۆمدا کە جارێکیتر لە خورت و خۆڕاو بێ زانیاری و بە نەزانی، هیچ جارەکیدی یەک قسەی خراپ لەسەر شیوعیەکان نەکەم.
ئینجا دەستم داکتێبەکانی مارکس و گەورەیی مارکسی فەیلەسوف و بیرمەند و ئابووریناسم بۆ دەرکەوت و زانیم دیالیکتیکی ماتریالی و ماتریالیزمی مێژوویی و پڕۆلیتار و چینی چەوساوە و کەپیتاڵیزم و فیوداڵیزم و دەرەبەگ و عەدالەتی کۆمەڵایەتی..تاد. چییە.
ئینجا دواتر ڕۆشتمە حوجرەیەکتیر و مزگەوتێکیتر و لە گەڕەکێکیتر، ڕیزی پێشەوەی نوێژخوێنان، بەردەوام دووسێ شیوعی تێدابوو لە نوێژی بە کۆمەڵ.
پیاوەکی بە تەمەنی تێدابوو، چەپ باوەڕ و شیوعی بوو، ڕۆژەک خەریک بووم بانگ بدەم، هەر هێندەم زانی ئەو پیاوە بە تەمەنە شیوعیه لە پشتڕا یەخەی کراسەکەمی گرتوو گوتی: لاچۆ دەی، تۆ وەهابی و لە دوای بانگەکان سەڵاوەت لەسەر پێغەمبەر لێنادەیت، بڕۆ پاش دەی، ئیتر من لاچۆم و خۆی بانگی دا، کەوتمە بیرکردنەوەو پرس لەخۆم:
ئەی کوا ئەو ئیسلامی و واعیز و مەلایانەی بە منیان دەگوت شیوعیەکان هەموویان کافر و دوژمنی ئاینی و مزگەت و بانگ و سەڵاوات و پێغەمبەر و خوداوەندن؟!
پاشان هاوڕێیەتیم لەگەڵ کۆمەڵێک لە شیوعیەکان دروست کرد، دەیان کەسی شیوعیم ناسی، لەنووسەر، مامۆستا، ڕاگەیاندکار، کەسی ئاسایی..تاد. بۆم ڕۆشنبوویەوە، کە شیوعیەکان چەندە مرۆڤی مرۆڤ دۆست و دڵپاک و دەست پاک و بێ گرێ و ڕاستگۆو و سەخی و میهرەبان و لەخۆبوردە و ڕۆشنبیر و بەڕێزن.
دووساڵیش لەگوندی (چل هەوێزە)ی دەڤەری کەندیناوەی وتارم دەداو مەلا بووم لەسەردەمی فەقێیاتیم، چەندین جار کە دەهاتمە دووڕیانی ناحیەی دیبەگە، مامۆستایەکی شیوعی هەبوو ناوی(ح)بوو، خەڵکی دیبەگەبوو، دەهات و کەمنی دەبینی یەکسەر ئۆتۆمبیلەکەی ڕادەگرت و دەیگوت مامۆستا فەرموو، تا کورانی مەخمور لەگەڵى دەهاتمەوە.
بەمنیشی دەگوت من، وەک سیاسەت شیوعیم و وەک ئایین موسڵمانم.
لە کۆتایێدا دەڵێم: نە لەڕابردوو و نەیش لە ئێستا، هیچ ڕۆژێک شیوعی نەبوومە، من هێندەی کەسێکی ناسیونالیستم، هێندە چەپ نیم، وەلێی ئەوە حەقیقەتێکە سەبارەت بەشیوعیەکان دەبوا بمگوتبا.
شەماڵ بارەوانی
