جۆگه‌ی زام نیگای ئه‌شكه … ستار ئه‌حمه‌د
له‌نجه‌ی گوڵ نیگای چۆله‌كه‌یه‌كی سه‌ربڕاو
له ئه‌شكی سوورما ده‌نێته جۆگه‌ی زام
قووڵ وه‌كو عه‌شقی نالی بۆ حه‌بیبه
بێگه‌رد به پاكیزه‌یی گۆشه‌ی دڵی زارۆكه‌كان
له بره‌وی ئه‌و شه‌ونمه ئاڵانه‌ی
له برۆی بێئاكامی چڵه‌كاندا ده‌بینرێ
هێلانه بابرده‌كان له رۆخی تاڤگه‌یه‌كا گلده‌داته‌وه
ده‌م له‌سه‌ر په‌یڤی شیرینت داده‌نێم
رسته ته‌نراوه‌كان عومری نائومێدیت ده‌ژمێرن
ناونیشانه ترسناكه‌كان تافی كچێنیت ده‌خه‌نه گۆڕ
فرمێسكێ داگیرساوم له دیده‌ی خاكه‌وه
ده‌رژێمه سێبه‌ری به‌ردێكی خوێناوی
به په‌نجه‌ی تۆ سوور بووه
تابلۆی بوونت له‌گه‌ردنیا نه‌خشێنراوه
عه‌شقێكم له فه‌رهه‌نگی بێزاره‌كان ده‌گه‌ڕێم
له كۆشی نورانیتدا ورده به‌زه‌یی دانه‌ی ره‌حمه‌ته
بارانێك له گوڵه ئه‌سرین
گه‌ردانه‌یه‌كی نامورادی ده‌هۆننه‌وه
به‌قه‌د ساڵانی ته‌نیاییم.. له سیمات ورده‌بمه‌وه
دڵم ناسك.. ته‌مه‌نم گچكه
ئه‌وینم ده‌بێته دورگه‌یه‌كی سوتێنراو
به دوای خۆزگه‌كاندا هه‌ڵدێم
له سێبه‌رم بترازێ.. ئاوڕدانه‌وه‌م گڵكۆی حه‌سره‌ته
له‌پاڵ نیازه‌كانما پرشنگی پرچت
به‌روارێكی نوێم بیرده‌خه‌نه‌وه
چاوه‌كانت دیوانێكی سه‌ربڕاوه
كه‌س نایانخوێنێته‌وه
له خاڵێكی شه‌ونمه رازێكدا گرمۆڵه ده‌بم
چه‌پكێ له گوڵه شیعر ده‌مبه‌نه‌وه دونیای جاویدانی
برینه‌كانم شۆسته‌ی مه‌رگن
ده‌روازه‌ی روانگه‌ت ئاسۆی كامه‌رانی
ئه‌وه‌ی له‌من بێزاره په‌یوه‌ست‌و
په‌نجه‌ره‌ی ئاگرین
شۆسته‌ی گڕاوی
كڕێوه‌ی به‌فری كه‌ژاوه‌ی برین
دیواره‌كان ده‌ست ده‌گرن به‌ساوای حه‌زمه‌وه
لانكی بێداریم له‌ته‌م دروست ده‌كه‌ن
چاوه‌كانت داده‌گیرسێن
ده‌سخه‌ڕۆ پرسه‌یه‌ك ده‌گێڕم
بۆ مه‌رگی شیعر
جوانڕۆیی خامه
شه‌هید بوونی تۆ
دیلیی خۆم
بۆ نه‌دارانی شه‌قامه‌كان‌و
قه‌تماغه‌ی زامه‌كان
ستار ئه‌حمه‌د
Dengekan
دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.
