Skip to Content

بۆ دیار غەریب! … سەرکەش

بۆ دیار غەریب! … سەرکەش

Closed
by ته‌مموز 9, 2019 General, Poems

هاوڕێم
من تۆم قەت نەدی بوو
قەت گوڵی بزە و خەندەی
جوامێرانە و
میهرەبانی تۆم نەچنی بوو
قەت جارێ لە جاران
قەت ڕۆژێ لە ڕۆژان
هەر بە ڕێکەوت
لە شوێنێ
لە ڕێگا و بانێ
لە شەقامێ
لە سوچی کوڵانێ
لە کوێرەدێیەک
سڵاو و
چاک و چۆنی سەرپێیمان نەکردبوو
قەت وەک دوو مرۆڤ باوەشمان بە یەکترا نەکردبوو
قەت دەستی هاورێیانەی یەکتریمان
نەگوشی بوو!
بەڵام ئەوە یەک دوو ڕۆژە
ئاسمان دەبینم تاریک و
ڕووگرژ و مۆنە
دەگری و
دەگری
ئەستێرەکان مات و خامۆش
لە جریوە کەوتوون
کزەباش قوڕگی پڕ هەنسکە و
هەواڵی مەرگی شۆڕەسوارێکە
ئەویش تۆی
لە لاپەڕەی هەر هاوڕێیەک
وێنە و
ناوی تۆ
بزە و خەندەی لێوی تۆ
نیگای بوێرانە و
نەترساوی تۆ
باس و
خواس و
یاد و
بیرەوەری و
مێرخاسی تۆ
تۆم پێ ئاشنا دەکەن
ئێستا دەڵێ ی
بە منداڵی لە کوڵان و
لە پۆلی یەکەمی قوتابخانە و
لە سەر یەک کورسی فێر بوونا
دارا و زارامان خوێندووە
بە هەرزەیی و
تەمەنی لاوی هاوڕێ ی یەکتر و
ئاشنای یەکتر و
دوست و
دراوسێی یکتری بووین
دەڵێ ئەوە چەندان ساڵە
کەس و کاری زۆر نزیکی منی
دەڵێی کوڕی هەمان خێزان و
کوڕی هەمان گەڕەک و
هەمان شار و هەمان دێهاتی منی!
دەڵێ ئازیز ترین
ئازیزمی
بۆیە کۆستی ئەو مەرگە؍
تراژیدیە؍ کتوپرەت وا وێرانی کردووم!

سەرکەش
ئوپسالای سوید 2019.07.9

mm

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.

Previous
Next