Skip to Content

مێژوویەک لە ژیان، مردن! … شوان شەفیق

مێژوویەک لە ژیان، مردن! … شوان شەفیق

Closed
by ته‌مموز 24, 2019 General, Poems

سەوڵەکان شکان
بەلەمەکان غەرقبوون
منــــــیش ژیام!

ماسییەکان سەرئاو کەوتن
بۆقەکان خنکان
منــــــیش ژیام!

دەستەکان شکان
پێنووسەکان فرۆشران
منــــــیش ژیام!

کەلەپچەکران ئازادەکان
پڕ دیل بوون زیندانەکان
منــــــیش ژیام!

عاشقەکان تاوانیانکرد
ژووانگەکان چۆڵکران
منــــــیش ژیام!

گۆرانییەکان سەربڕان
ئاوازەکان قەتیسبوون
منــــــیش ژیام!

زەوییەکان فرۆشران
سەنگەرەکان چۆڵکران
منــــــیش ژیام!

شاخەکان خاپوورکران
دەشتاییەکان سووتێنران
منیش ژیام!

منداڵەكان بێناز بوون
دایکەکان زریکاندیان
منــــــیش ژیام!

چاوەکان پڕ فرمێسک بوون
دەستەسڕەکان تەڕ بوون
منــــــیش ژیام!

ژنەکان کوژران
تاوانەکان داپۆشران
منــــــیش ژیام!

سەرچۆپیان گرت قەلەڕەشەکان
لە سێدارەدران پاسارییەکان
منــــــیش ژیام!

بە تاسەوە چاوەڕێ بوون
چاوەکان کز و مات بوون
منــــــیش ژیام!

بەڵێنەکان دڕێندران
دڵەکان شکێنران
منیش ژیام!

دەمەکان وشک بوون
زمانەکان لاڵ بوون
منــــــیش ژیام!

جگەرەکان فڕێدران
تەپڵەکەکان شکێنران
منــــــیش ژیام!

پیاڵەکان پڕ کرانەوە
پێکەکان خورانەوە
منــــــیش ژیام!

گورگەکان تێر بوون
مەڕەکان وریا بوون
منــــــیش ژیام!

تابلۆکان شێوێنران
مۆزەخانەکان تاڵانكران
منـــــیش ژیام!

شوان شەفیق

Previous
Next
Kurdish