تەوارەکانی ڕۆژهەڵات.. فازیل شەوڕۆ
Closed
دوو پشکۆی ئەبەدین
ئەو دوو چاوانە
لە تەندووری خۆر گەش کراونەتەوە
شاپەڕی ئاگرینت
دیاریی خوداوەندی فڕینە
تا بەرزتر
بۆ تۆقەڵەی ئاسمان بچێت
جوانتر دەبینیت
باشتر دەبیستیت
چرنووکی پەنجەت
زریانە و
سیڕڕەت سەدای گەردوون
تا پتر لە قووبەی ئەفلاکا
بە دەووری بازنەی
مەرگی خۆتدا بسوڕێتەوە
گەشتر دادەگیرسێت و
نەمرتر زیندوو دەبیتەوە
تەبعی تەوارە
سووتان لە پێناو ئاگر و
خنکان بۆ خاتری ئاو و
ڕۆحبەخشین بۆ ئازادکردنی ئازادی
سەمای تەوارە
لەسەر عەمامەی ژێر پێی ژیناکان
بانگی تەوارە
لەبن گوێی جیهانی کاس و وڕ
تۆڵەی تەوارە
لە ژنکوژ و ژیانکوژ و ئازادیکوژانی
ڕۆژهەڵات
تەوار
کە باڵە ئاگرینەکانی کردەوە و
بوو بە برووسکە
تەخت و تاراجی تاریکپەرستان
گڕ دەدات و
باڵای بەرزی شەهیدان
دەکاتە بەیداخی سوور.
تەوار
لە قەندیل تەوارە و
لە شار ژینایە و
لە شەقام
بڵێسە.
٢/١١/٢٠٢٢ دوبلن
