كورد له دوو ئۆكتۆبه‌ری تراژیدیادا … نوسینی|ئه‌حمه‌د كامه‌ران
هه‌ركاتێك باسی نه‌ته‌وه‌یه‌كی سته‌ملێكراوی گه‌وره‌ی جیهان ده‌كه‌ینه‌وه كه ئه‌ویش نه‌ته‌وه‌ی (كورده), راسته‌وخۆ ساڵ و مانگ و ڕۆژی تراژیدیامان به‌ر گوێمان ده‌كه‌وێته‌وه كه بێگومان ئه‌مه‌ش جێگای ئازاره.
وه هه‌ركاتێكیش كه گوزه‌رێك به نێو مێژوودا بكه‌ین به‌تایبه‌تیش مێژووی گه‌لی كورد ,راسته‌وخۆ رووبه‌روی كۆمه‌ڵێك شتی خه‌ماوی و كاره‌سات بار ده‌بینه‌وه,چوونكه به‌رده‌وام به درێژایی مێژوودا ئه‌م گه‌له خێر له خۆ نه‌دیوه له هه‌موو لایه‌كه‌وه به به‌رده‌وامی تووشی هێرش و كووشتن وده‌ستدرێژی بۆته‌وه له‌لایه‌ن وڵاتانی ده‌وروبه‌ریه‌وه یاخود وڵاتانی جیهان, كه‌تێیدا به هه‌زاران كورد خوێنی له‌سه‌ر ئه‌م خاكه‌ی خۆیدا به‌بێ تاوانی ڕژاوه, یاخود له‌سه‌ر ماڵ و حالی خۆی دا شه‌ق باران كراوه.
ئه‌م هه‌موو ڕوودا و كاره‌ساتانه‌ی كه كراوه‌ته سه‌ر میله‌تی كورد مێژوو به‌رده‌وام بۆ نه‌وه پاش نه‌وه‌ی خۆی باسی ده‌كاته‌وه و هیچ كاتێك له‌یاد ناكرێن, وه له هه‌مان كاتیشدا دوو روداوی گرنگ تری میژوویی كه دووباره رووبه‌رو كورد كراوه‌ته‌وه,
ئه‌ویش ڕووداوی 16 ئۆكته‌به‌ری باشوری كوردستان وه 9ی ئۆكۆبه‌ری ڕۆژئاوای كوردستانه, واته دوو رووداوی گه‌وره له یه‌ك مانگی جیاوازدا كه كوردی تێدا بووه‌ته سووته‌مه‌نی.
16 ئۆكتۆبه‌ر: رووداوێكی تراژیدی و كاره‌سات باری گه‌وره‌یه كه له به‌رامبه‌ر گه‌لی كورد كرا پێش دووساڵ له‌مه‌و به‌ر , له باشوری كوردستان له نێو جه‌رگه‌ی قوودسی كوردستان (كه‌ركوك) له‌لایه‌ن ده‌وڵه‌تی عێراقه‌وه ئه‌نجام درا ,عێراق یه‌كێكه له‌و ده‌وڵه‌تانه‌ی كه به درێژایی مێژوو چه‌ندین كرده‌وه‌ی قێزه‌وه‌نی به‌رامبه‌ر كورد ئه‌نجام داوه. له ئه‌نجامی ئه‌و ڕووداوه‌دا به چه‌ندان كوردی بێناز بوونه‌ته قوربانی و وه‌هه‌روه‌ها له‌نێو ماڵ وحالی خۆشیان دا ده‌ربه‌ده‌ر كران, وه له‌هه‌مان كاتیشدا رووداوه‌كه هاوشێوه‌ی ئه‌و رووداوه مێژوویه‌یه كه له‌سه‌رده‌می به‌عس دا كرا كه تێیدا كورده‌كان راگواسران یاخود به زۆری ته‌عریب ده‌كران, وه هه‌رچه‌نده‌ش كه له‌سه‌ر ئه‌م رووداوه‌دا گوێبیستی ئه‌وه ده‌بینه‌وه كه خیانه‌تێكی ناوخۆیی ده‌ستی هه‌بووه له‌م رووداوه‌دا هاوشێوه‌ی مێژووی سه‌ده‌كانی رابردووی كورد كه زۆرجار ان له ناوخۆدا خیانه‌تێك یان هه‌ڵوه‌شانه‌وه‌یه‌ك ئه‌نجام درا,به‌ڵام رووداوه‌كه‌ی ئه‌م جاره ئه‌گه‌ر به‌خیانه‌ت لێدانی ناوخۆیی له قه‌له‌م بده‌ین كه له‌لایه‌ن هێزێكی كوردی كرا , ره‌نگه ئه‌مه بۆ ئێستا قورس بێت كه ئێمه لایه‌نێك به خیانه‌ت بزانین له‌م رووداوه‌دا كه ئه‌ویش یه‌كێتی نیشتیمانی كوردستانه, چوونكه ئه‌و هێزه‌ش به درێژایی مێژوو خاوه‌نی كۆمه‌ڵێك خه‌باتی كوردایه‌تیه بۆیه پێویسته چاوه‌ڕێی داهاتوو بكه‌ین كه بزانین چیمان بۆ روون ده‌كاته‌وه.
رووداوه‌كان و كاره‌ساته‌كان به‌رامبه‌ر كورد هیچ كاتێك به كۆتایی نایه‌ت چوونكه پاش دووساڵ به‌سه‌ر ئه‌و رووداوه مێژوویه‌دا, راسته‌وخۆ رووداوێكی تری تراژیدی بینه قاقای گه‌لی كوردی گرته‌وه , ئه‌م رووداوه ش وای كرد كه دووباره مێژوو رووداوێكی تری ناخ هه‌ژێنی گه‌لی كورد تۆمار بكات كه ئه‌ویش 9ی ئۆكتۆبه‌ره له رۆژئاوای كوردستان ئه‌نجام درا له‌لایه‌ن ده‌وڵه‌ته ره‌گه‌ز په‌رسته‌كه‌ی جیهان كه ئه‌ویش توركیایه,وه هه‌ركاتێكیش باسی (كورد وتوركیا) دێته گفتگۆ كردن راسته‌وخۆ پره له مێژوویه‌كی ململانێ و كوشتاری دا, وه‌هه‌روه‌ها ده‌وڵه‌تی توركیا به درێژایی مێژووه‌كه‌ی خۆیدا به‌رده‌وام بووه له هه‌وڵدان بۆ سه‌ركوتركردنی گه‌لی كوردا, به‌ڵام له‌باسكردنی مێژوودا زۆر ناگه‌ڕێینه‌وه بۆ مێژوویه‌كی دوورو درێژی كورد و توركیا یاخود كورد و عوسمانی چوونكه مێژوویه‌كی دوورو درێژه كه هیچ كاتێك له گێرانه‌وه‌یه‌دا یاخود له نووسینی دا كۆتایی نایه‌ت, به‌هۆی ئه‌و سته‌مكاریانه‌ی له به‌رامبه‌ر گه‌لی كوردیان كردۆته‌وه كه ته‌نها ئامانجیان سڕینه‌وه‌ی ئه‌م نه‌ته‌وه‌یه بووه.
به‌ڵام ئه‌گه‌ر بگه‌ڕێنه‌وه بۆ سه‌رده‌می توركیای كۆماریدا كه هه‌ر له سه‌رده‌می مسته‌فا كه‌مال ئه‌تاتوركه‌وه هه‌تا وه‌كو سه‌رده‌می ئه‌ردۆغان دا ده‌بینین هه‌وڵی گه‌وره گه‌وره‌یان خستۆته گه‌ڕ بۆ نه‌هیشتنی ناسنامه و خاكی نه‌ته‌وه‌یه‌ك دا كه ئه‌ویش كورده , به‌ڵام تاوه‌كو ئێستاش نه‌یان توانیوه له‌و هه‌وڵه‌ی خۆیان دا سه‌ركه‌وتووبن چوونكه نه‌ته‌وه‌ی كورد نه‌ته‌وه‌یه‌كی بچووك نیه تاوه‌كو به شێوه‌یه‌كی ئاسایی كۆتایی پێ بێت, وه ده‌بێت ئه‌م نه‌ته‌وه‌یه ببێته درزێك بۆ نێو دڵی دووژمنه‌كانی خۆیدا. به‌ڵام لێره‌دا جیاوازیه‌كی سیاسی درووست ده‌بێت ده‌رباره‌ی دژایه‌تی مسته‌فا كه‌مال ئه‌تاتورك به‌رامبه‌ر به كورد,وه له‌گه‌ڵ دژایه‌تی كردنی ئه‌ردۆغان به‌رامبه‌ر به كوردان, ئه‌و جیاوازیه‌ش ئه‌وه‌یه كه كه له‌سه‌رده‌می ئه‌تاتورك دژایه‌تی كردنه‌كه‌ی خۆی به‌رامبه‌ر به‌كورد به‌هۆی هه‌ستێكی نه‌ته‌وایه‌تی كۆنه په‌رستانه‌ی بوو, به‌ڵام كاتێك كه دژایه‌تی كردنه‌كه دێته سه‌ر ئۆردۆغان به‌رامبه‌ر به كورد له دوو ئاراسته‌ی جیاوازدا خۆی ده‌بینێته‌وه, ئاراسته‌یه‌ك زاڵبوونه‌وه نه‌ته‌وه‌ییه كۆنه‌په‌رستكه‌یه , وه دووه‌م ئاراسته‌یشی له‌ژێر به‌كارهێنانی ناوی ئاینی ئیسلامه‌وه‌یه , وه هه‌روه‌ها ده‌یه‌وێت خۆی وه‌كو كاره‌كته‌ری عوسمانی نیشان بدات یان به میراتگری عوسمانی خۆی بناسێنێت كه ئه‌وه‌ش ته‌نیا خه‌ونێكی خۆیه له‌گه‌ڵ خۆیدا به‌ره‌و نێو گۆردا ده‌یبات.
*نووسینی هه‌ر وشه‌یه‌ك ده‌رباره‌ی گه‌لی كورد به‌خشینی ئازارێكی گه‌وره‌یه به نووسه‌ر یاخود مێژوونووس ,چوونكه به درێژایی مێژوو به ئه‌سته‌م ده‌بینرێت یاخود به هیچ شێوه‌یه‌ك نابینرێت كه ئه‌م گه‌له له خۆشی و ئارامی دا ژیانی خۆی به‌ڕێكردبێت هه‌ر به‌رده‌وام له جه‌نگ وكوشتاری و ماڵ وێرانكردندا ژیانی خۆی به‌رێ كردوه, وه‌هه‌ركاتێك تاكێكی كورد سه‌ری خستۆته سه‌ر بالیفه‌كه‌یه‌وه به ئاواتی ئه‌وه خه‌وتووه كه به‌یانیه‌كه‌ی به ئارامی هه‌ڵسێته‌وه و تووشی هیچ كاوڵكاریه‌ك یان ده‌ربه‌ده‌ریه‌ك نه‌بێته‌وه.
15|10|2019
