دوو شیعر له (فازڵ عهززاوی)ـهوه
و : نهژاد عزیز سورمێ
(1)
فلیمێك لە وێستگەیەكی شەمەندەفەردا
زستان ، لە وێستگەیەكی شەمەندەفەردا
لە سەفەرێكی درێژ دەگەڕامەوە
خۆم دیتەوە
لە ساڵۆنێكی سینەمای ڕێبواران دانیشتووم
فلیمێك دەبینم ، چیرۆكەكەی نازانم
پێش هاتنی من ، دەستی پێ كردبوو ..
فلیمێك هەرگیز تەواو نابێ ..
گرینگ نییە لە كوێڕای دەبینی
چوون هەموو بەشەكانی ، وەك خودی ژیان
دووبارە دەبنەوە..
قارەمان ماسكی دزان دەپۆشن .
لەشكر بۆ ئەوەی بگەنە شارێ ،
بەسەر شەختەدا هەڵمەت دێنن .
گاڵتەجاڕ بە پێش عارەبانان كەوتوون
ئەسپی شەكەت ڕایاندەكێشێ ..
پیاو بە باڵی مۆمییەوە
مەلە لە هەوادا دەكەن ..
زیندەوەر ڕێی سەیریان
لەژێر خۆری سووتێنەردا
بەرەو هەساران دەبڕن ..
تێیاندایە مروارییان دەدۆزێتەوە ،
پاشان بزری دەكاتەوە
ئێمەش بە سەر چەرچەفانەوە
لەسەر پێخەفی موسافیران
لە ئوتێلێكی هەرزان بۆ شەوێك ،
خوێنمان لەبەر دەڕوا ..
تەماشاكهری مردوو.. تەماشاكهری زیندوو
هەیە دێتە ژوورەوە ، هەیە دەچێتە دەرەوە ..
هۆڵ هەمیشە تاریكە
فلیمەكەشمان بێ دیماهیهاتن بەردەوامە ..
كەژاوەی بێدەنگ
دەستەكانم لە گیرفانی كون كونمدا ناوە ،
بە شەقامدا ڕادەبوورم
بینیمن بهدزیەوە ، لەو دیو مینای چایخانە و مغازان
سەیرم دەكەن ..
پاشان بە پەلەپروزێ دێنەدەرێ و دوام دەكەون .
بە ئەنقەست وەستام جگەرەیەك دابگیرسێنم
ئاوڕم لە دواوە دایەوە
وەك كەسێ بە پشتی
خۆی لە با دەپارێزێ ..
نیگایێكم بۆ كەژاوەی بێدەنگ هاوێت:
دز ، پاشا ، بكوژ ، پەیامبەر و شاعیر
لە هەموو شوێنێكەوە باز دەدەن و بەدوامەوەن ،
چاوەڕێی ئاماژەیێكی منن..
سەرم بە سەرسڕمانەوە بادا و
ڕێگەم گرتەبەر ، فیكەشم لێ دەدا ..
ئاوازی گۆرانییەكی باو
خۆم وانیشان دەدا ڕۆڵ لە فلیمێكدا دەبینم
هەموو ئەوەی لەسەرمە بیكەم
تا كۆتاییە تاڵەكە ، هەمیشە بەرەوپێش بڕۆم.
(2)
لە پەنجەرەیەكی كراوەوە
بەسەر شەقامێكی تاریكدا
لە كاتێكدا چاوم لە پەنجەرە بڕیوە
گوێم بۆ ژاوەژاوی داگیركهران لە شەقامدا هەڵخستبوو ،
پەیتوونەكانیان لە تاریكیدا لێ دەخوڕی ..
كوڕوكاڵیان بەدواوە بوو دەفیان لێ دەدا و
كۆیلەی دیلیش زنجیربەند ..
مۆتەكە پەنا بۆ من دێنن
لە دەرگای ماڵەكەم دەدەن:
جەللاد و قوربانییەكەی
پاشاو گاڵتەجار و
نهێنیپارێزی .
جەللاد دێ دەستی بەخوێنی
لەبەر لوولەی ئاوی مندا بشوا
قوربانیی دێ پیاڵەیێك فرمێسكی سوێری
پێشكەش دەكا ..
پاشا دێ عەرشی خۆی
لە باخچەی مندا هەڵدەدا .
گاڵتەجاڕ دێ یارییەكانیم پیشان دەدا
نهێنیپارێز نهێنی خۆیم بۆ دەدركێنێ ..
دوا مۆمم پێ دەكەم
شەو لەبەر پەنجەرە دەوەستم
زۆرن ئەوانەی پێش بەیانیدان
لە دەرگام دەدەن .
- له فازڵ عهززاوی ، كۆشیعری ( فراشة في طريقها الى النار )
بڵاوكردنهوهی دهزگای ( المدی) 1998 – كراون به كوردی .
