گوناح و بڤە و نەکەی ها … کەنعان مەدحەت

گاڵتە نییە ،
لەگەڵ هەر لە گەڵ بەربوونێکا
خشتەیەکی بێفەڕی لێوان لێو لە گوناح و
بڤە و
نەکەی ها – ت
لێ بار بکرێ
دوعای کارامە شێخێکت بە بەرۆک و
دوان بەم بەر و بەو بەری ژێر سەرینت
گوایە لە چاونەفەس و
قەزاوبەڵا..
دورت بخەن
خزم و خێزان و قەومانی نزیگیش
پیرۆزت کەن و
جەژن و هانگت لۆ بگێڕن .
ساڵانێ دوای هەڵزنانیش بە پەیژەی
کۆک و
ناکۆک و
فرە سەقەتا…
کەسانێکت لێ پەیدا ببن
بە پاچی دەستیانەوە
کێڵی هەرە مردووە نزیگەکانتت
پێ تەخت بکەن !
رۆژانەش ، پێنج وەختە ، لە ترس و
بە هۆی چاولەیەککەریی
رووی کۆمت رووەو ئاسمان وەرگێڕی و
بە خەیاڵی ڕیزبەند بڕین
سنوری بێسنوریی تراویلکە دابەزێنی
لە دوایشدا فریشتەکان بە تاک و کۆ
جرتت لێ بکێشن و
بە فەرشە گو پێشوازیت لێبکەن .
بۆ لات سەیرە دارەمێو ، بێ ئیزن ،
ترێ بگرێ ؟
یان ڕەشەبا
بۆڵ بە بۆڵی لە بار ببا و
( نیعمەت ) لە پڕا هەڵوەرێ؟
هەر بۆیە داهاتوو
ئەو ساتانەی لە پەڵە و پاکخاوێنی پێکدێن
هەر هەمو ، لە سەرێکەوە بۆ سەرێ
بێ ژەنگ و بێ بریقە
هەڵناکەن
نا……….
هۆنراوەی : کەنعان مەدحەت

Dengekan

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.