باڵه‌كانم ده‌بڕنه‌وه … ستار ئه‌حمه‌د
ئەمڕۆو سبەی
خۆرێكی نوێ
لەسەر لوتكەی چیاكانمان
نیگای بۆ خاك دەكاتەوە
بەهاری ئازادی و شادی
دەستی خەزان هەڵدەپاچێ
جەنگی داعشی بەنەفرەت
كۆتایی دێ و لەناو دەچێ
ئەو كاتە پێویستە گەلم
بەیەك دڵ و
یەك جەستەوە
چەترێك بن بۆ بزاڤی نوێ
هەتا كۆرپەی لانكی مێژوو
بەئارامی و شادییەوە
لەنێو گوڵی ژینا بنوێ
بااشوور
نیمچە پەڕێكی دەركردو
ویستی باڵەكانی لێكدا
لەسەد لاوە گورگ پەیدابوو
گورگی بیانی و خۆمانە
جارێكی تر
كێشیان كردین
بەرەو بەعدا
بووینە هاوپەیمانی
كۆنە دڕندەی مێگەلمان
وابۆ سەد ساڵی رێك دەچێت
خوێن و ماڵ و ئابڕووی ئێمە
ئاوی دیجلەو فورات دەیبات
كوردستان تەفرو توونا بوو
وڵاتێك نەبوو لەدنیا
دەستێكی سۆز
بۆ ئەم پارچە داڕزاوە ی
تەنی وێڵم درێژ بكا
هەر ئەوان بوون
شێخ مەحموودو
بارزانی و چەندی دیكەیان
بەئاهی دڵەوە فەوتان
ئێستاش دەبینی بوونەتە
برای پشت و
بەهاوپەیمان
لەگەڵ ئێمەدا هاوخوانن
بەڵام ناوی باكور بێنین
رووی مێژوو ئاوەژوو دەكەن
دەستی راستم توند دەگوشن و
ئەوی چەپم دەیڕنەوە
خوارووم دەكەن بە كێڵگەی مین
سەرووشم بەگازو پیترۆڵ
لەقەندیل زمانم دەبڕن
لاشەكەشم
رێوی دەیخوات
لەئەنادۆڵ
ستار ئه‌حمه‌د
Dengekan
دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.
