ئه‌ده‌ب له ژێر باڵی ره‌شی ده‌سه‌ڵاتدا … عه‌بدوڵڵا هورمزیاریی
له کوردستانی باشوور ته‌نیا دۆخی گه‌نده‌ڵی ئابووری و سیاسی ناگوزه‌رێ و به هۆیانه‌وه به‌هاو به‌رهه‌م و داهێنان و ڕێز و مافه‌کانی مرۆڤ ڕوو له داکشان بێت! به‌ڵکو به درێژایی ده‌یان ساڵی ڕابردوو ئه‌وه‌ی ره‌واجی پێدراوه‌و کاری بۆ کراوه ئه‌وه‌یه که هه‌موو شتێك له خزمه‌ت پایه‌و مه‌به‌سته‌کانی حیزب و به‌رژه‌وه‌ندیه‌کانی ده‌سه‌ڵاتدا بێت، ئه‌مه‌ش بووه‌ته هۆی ئه‌وه‌ی چه‌ند که‌لـله‌یه‌کی بۆش به‌رهه‌م بهێنرێت که هه‌موو کارو جوڵه‌یه‌کیان به‌و ئاراسته‌یه‌دا بێت، ئه‌وانه‌ش له‌سه‌ر به‌ڕێوه‌بردنی راگه‌یاندن و ده‌زگاکان و گروپ و کۆمه‌ڵه‌کانی نووسه‌ران داده‌نرێن ده‌بێت گه‌نده‌ڵ بن و خوێنی حیزب و ئینتیمای شه‌خسی مه‌سئوله‌کان به ده‌ماره‌کانیاندا بڕوات تا جێی خۆیان بکه‌نه‌وه‌و ببنه پێوه‌رو په‌ساپۆرتدان به بابه‌ت و به‌رهه‌می ئه‌ده‌بی و ئه‌دیبان، له‌سه‌ر بنه‌مای ناسیاوی و واسته‌کردن و په‌یوه‌ندی شه‌خسی و حیزبی و به‌رژه‌وه‌ندی هاوبه‌ش و ته‌نانه‌ت باڵ باڵێنه بوار به بڵاوکردنه‌وه‌ش بدرێت ، ئێدی که‌سایه‌تی نزیك و بابه‌تی کاڵوکرچ به‌ره‌نده ده‌بێت و خه‌ڵات ده‌کرێت و ده‌نگه دا‌هێنه‌ره‌کانیش کپ ده‌کرێنه‌وه‌و ئابڵوقه ده‌خرێته سه‌ریان، ره‌نگه ئه‌مه وایکردبێت خوێنه‌ران له که‌مبوونه‌وه‌دا بن و به‌تایبه‌تی خوێنه‌رانی جدی بوونیان به‌ره‌و نه‌مان بچێت، ئه‌مه له کاتێکدایه ئه‌و مه‌غزایه‌ی له ئه‌ده‌بدا چڕ بووه‌ته‌وه بریتیه له جه‌نگان دژی سته‌م و ناڕه‌وایی و گه‌نده‌ڵی مادی و مه‌عنه‌وی، بریتیه له ده‌نگی راستگۆی ناخ و گیان به‌رانبه‌ر هه‌موو بڵندگۆ ته‌زویره‌کان که ره‌واج به کاڵبوونه‌وه‌ی بوون و گیان و ناسنامه‌ی مرۆڤ ده‌ده‌ن. خۆ ئه‌ده‌ب له‌مڕۆژه‌دا له کوردستانی باشوور وه‌ك ناسنامه‌ی میلله‌تێك و گوژمی ژیاریی وڵات و نه‌ته‌وه ته‌ماشا ناکرێت و له سۆنگه‌ی ئه‌وه‌ی چه‌ند په‌ڕتوکت خوێندبێته‌وه ناسنامه‌ت هه‌ڵبسه‌نگێنرێت و که‌سایه‌تیت ده‌ستنیشان بکرێت! بۆیه ئه‌دیبیش هیچ سوودێکی مادی ناکات کاتێك ده‌نووسێت و په‌خش ده‌کات، له سه‌رئێشه‌و ماندووبوون به‌ولاوه و جارانێکیش رووبه‌ڕووبوونه‌وه‌ی گیروگرفت چی ده‌ستناکه‌وێت، گه‌ر هه‌ر میلله‌تێکیش به‌و ئاسته نزمه بگات له مه‌عریفه‌و داهێنان و رۆشنبیریی و بره‌و نه‌دان به زانسته مرۆییه‌کان ئه‌وا زه‌نگی مه‌ترسی بۆ لێده‌درێت که بوون و مانه‌وه‌ی به‌ره‌و له‌ناوچوون بچێت. مه‌خابن ئه‌مه له حاڵێکدایه به‌شێکی زۆری نووسه‌رو ئه‌دیبان له‌و واقیعه ناله‌باره‌دا هیچ هه‌ڵوێست و بوونێکیان بۆ خۆیان دانه‌ناوه‌و ئێدی له‌ناو کۆمه‌ڵگاشدا ڕۆڵیان سڕدراوه‌ته‌وه‌و نه‌ماوه، ئه‌گینا هه‌ر رۆشنبیران و هزرمه‌ندو ئه‌دیبانن له جیهاندا ره‌نگڕێژیی و پێشڕه‌وایه‌تی ره‌وتی نه‌ته‌وه‌کان ده‌که‌ن و خاوه‌نی وته‌و هه‌ڵوێستن به‌رانبه‌ر هه‌موو گۆڕانکاریه جۆراوجۆره‌کانی ده‌وروبه‌ریان، به‌ڵام لای ئێمه زۆر به داخه‌وه کاره‌که به پێچه‌وانه‌وه‌یه، ده‌وروبه‌رو هێزی ده‌سه‌ڵات ئه‌دیبان ئاراسته ده‌کات و ناسنامه‌و بوویان پێده‌به‌خشێت، لێ ژماره‌یه‌کی که‌میش هه‌ن دووره‌په‌رێزو نائارام و نیگه‌رانن له‌و هه‌موو ئاوه‌ژووبوونه‌وه مه‌ترسیداره‌ی نێوه‌ندی ئه‌ده‌بی و ئه‌دیبانی ته‌نیوه‌و ئه‌وانیش لێی یاخی بوون، به بێ ده‌نگی ناسنامه‌ی خۆیان پاراستووه، بۆیه ده‌کرێت بڵێین گه‌نده‌ڵی ئه‌ده‌بی زۆر مه‌ترسیدارتره له گه‌نده‌ڵی ئابووری، چونکه گه‌نده‌ڵی ئابووری ره‌نگه له لایه‌ن که‌سانێکی ناحاڵی و که‌لـله‌پوچ و نه‌فامه‌وه ئه‌نجام بدرێت، له کاتێکدا گه‌نده‌ڵی ئه‌ده‌بی له لایه‌ن رۆشنبیره‌وه ئه‌نجام ده‌درێت، به‌ڵام چ رۆشنبیرێك؟! ئه‌و رۆشنبیره‌ی هزری تاریك کردووه به ناڕه‌وایی و قه‌ڵه‌م و ویژدان فرۆشیی، به جه‌پڵه لێدان بۆ دزو مرۆڤکوژو تاوانبارو له به‌رانبه‌ریشدا سه‌رکوتکردنی ده‌نگی داهێنه‌رو بێ ده‌سه‌ڵات، ده‌بێت چ ئازایه‌تیه‌کی تێدا بێت ئه‌م هه‌ڵوێسته؟! له‌قه‌لێدانی که‌سی ژێرکه‌وتوو چ جوانی و جیاوازیی و خزمه‌ت و داهێنانێکی تێدایه؟
به دڵنیاییه‌وه له واقیع و کرۆکدا هه‌موو شتێك کڕین وفرۆشتنی به‌سه‌ره‌وه ده‌کرێت و ده‌کرێت ده‌مامکی جۆراوجۆر له ده‌موچاو بکرێت، بۆ نموونه سیاسه‌تمه‌دارێکی فاشیل به حوکمی پاره‌و چه‌ك ببێته هه‌ڵگری دروشمی رۆشنبیریی و هزرو پێشکه‌وتن و داهێنان، به‌ڵام ئه‌وه‌ی هه‌رگیز پێی ناگات و نایبینێت پله‌و پایه‌و که‌سایه‌تی نووسه‌رو ئه‌دیبێکی داهێنه‌ری راستگۆیه که ئه‌وه‌ی ده‌ینووسێت بڕوای پێیه‌و له ئازاره راسته‌قینه‌کانی مرۆڤه‌وه هه‌ڵقوڵاوه‌و له هه‌موو ڕوویه‌که‌وه جیاوازه له‌و خیتابه سیاسی و درۆینه‌ی رۆژانه به شێوه‌ی جیاواز له لایه‌ن ئه‌و جۆره که‌سایه‌تییه به ناو نووسه‌رو ئه‌دیب و رۆشنبیرانه‌وه به‌ر گوێمان ده‌که‌ون.
Dengekan
دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.
