پیاوی ناو هێڵنجەکان … شوان سەعید

پیاوێک دەناسم هەمیشە تەنیایە،
کەس لە زمانی قسەکردنی تێناگات،
خەڵکی زۆربەی پێکەنینیان بە چیرۆکی
ئەوینداری ئەو دێت
بە زمانێکی قەدەغە قسە دەکات،
هەموو ڕۆژێک بە ڕووخسارێکی غەمگینەوە دوا شەقامی شار تەی دەکات و
ماڵی دەسگیرانەکەی نادۆزێتەوە.
پیاوێک دەناسم بە تەنیا قاوە دەخواتەوە
بە تەنیا سەیری ئەستێرەکان دەکات
بە تەنیا گوێ بۆ دەنگی با دەگرێت.
پیاوێک دەناسم، هێندە بەخراپی جێیان هێشتووە،
ئێوارانێک خۆی و خۆی دەمێنێتەوە،
لەگەڵ باوەشێک هەناسەی سارد و
پڕ دوو دەست فرمێسکی گەرم
پیاوێک دەناسم گۆڕغەریب دەبێت،
کەس نابێت ئازارەکانی بکات
بە گۆرانی،
خەونەکانی لەسەر دیوارەکانی شار
بنوسێتەوە
پیاوێک دەناسم، زستانی نییە، پایزی نییە،
داهاتووی نییە،
ئەلبوومی نییە،
ناتوانێت بڕژێتە ناو ئێوارانی کەسێکەوە
پیاوێک دەناسم شووشەعەترێکی ڕژاوە
لە ڕابردووی کچێکدا و
ئێستا لەبیری کەسدا نەماوە،
پیاوێک دەناسم
بەژێر ڕووناکی مانگدا تێدەپەڕێت
بەناو ڕەشەبادا دەڕوات
بەناو کۆڵانەکانی تەنیاییدا، بۆلای هەورەکان
دەگەڕێتەوە
پیاوێک دەناسم، لەناو یەکێک لەقەمیسەکانی
مندایە،
پەڵەیەک خوێنی سوور بەسەر سینگیدا هەڵواسراوە
ڕۆژەکانی بەزەحمەتێکی زۆر بەڕێ دەکات
پیاوێک دەناسم منداڵی دووەمی دایکمە و
ناسنامەی منی لە باخەڵدایە و
لە ڕێگەی سییەکانی منەوە هەناسەدەدات
تەنها و تەنها منی هەم درۆی بۆ بکەم
بڵێم: هەڵسەوە،
بڵێم: مەڕوخێ
پێی بڵێم بەیانی کاتێک خۆر هەڵدێت
ئازارەکانت کۆتاییان پێ هاتووە،
ئەو کچەی چاوەکانی قاوەیی بوو، جێی هێشتی
دەگەڕێتەوە
ئەو کچەی پەنجەکانی باریک بوون، ونی کردی،
دەیدۆزیتەوە
پێی بڵێم:
بەیانی دایکت کیسەی دەرمانەکانی
فڕێ دەدا و
وەک جاری جاران بەیانی زوو عەباکەی دەدا
بە سەریا و
بەپێی خۆی دەچێت لە بازاڕی قەیسەری کۆن
ماست و سەوزەو میوە دەکڕێت!
پیاوێک هەیە منی بمرێ، بەرواری لە دایکبوونی
خۆی بیردەچێتەوە
ڕۆژەکانی هەفتە نا ناسێتەوە
قۆپچەی قەمیسەکەی بە هەڵە دادەخات
پیاوێک هەیە منی نەبم،
حەوسەڵەی نییە لەبەردەمی هێلانەی پاسارییەکدا
بوەستێ
ئاوڕ بۆ گوڵی بەرپەنجەرەکان بداتەوە
پیاوێک هەیە، منی نەبم
کەس نییە فرمێسکی بسڕێت، کەس نییە دڵی
بداتەوە،
کەس نییە لەبن گوێی هاوار بکا و
دەنگی هەزاران هێڵنجی بیر بەرێتەوە
پیاوێک هەیە منی بمرم ،
شانی، لە کێلی گۆڕی مردووەکان گیر دەبێت و
سێبەرەکەی کاڵ دەبێتەوە و
ئیتر بە ئارامی دەنوێ و
بەتەنیشتی مەرگی منەوە،
هەموو ئازار و بەدبەختیەکانی بیردەچێتەوە.

“شوان سەعید“

Dengekan

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.