Skip to Content

نامەیەکى کورت بۆ سەباح ڕەنجدەر … سروشت نەوزاد

نامەیەکى کورت بۆ سەباح ڕەنجدەر … سروشت نەوزاد

Closed
by ته‌مموز 25, 2020 General, Literature

سڵاو کاک سەباحى زێدە ئەزیز…

کتێبە شیعرییە تازەکەتم (سەرەتا وشەبوو) خوێندەوە. پیرۆزبایی زۆر گەرمم بۆ ئەم بەرهەمە ناوازەیە هەیە. وەک هەمیشە بە خوێندنەوەى شیعرەکان گەشامەوە. جیاوازی کردن لە نێوان ئەم بەرهەمەت و ئەوانى پێشوت، چى لە ئاستى تێماکان و چى لە ئاستى لایەنى هونەرکارى و فۆڕم و زمانەوە، خوێنەرى ورد و بە دیقەت و سەباح ناسى جدی گەرەکە، بێگومان ئەمەش ناکاتە ئەوەى کە سەرجەمى خاڵە جیاوازەکان نابینراو بن، تەنیا وا هەست دەکەم جیاوازییەکان لە ئاستى زۆر ورد دان و ئیمکانى ئەوەیان نییە خوێنەر بە سانایی و ڕاگوزەرانە لە پێکهاتەى شیعرەکانى ئەم بەرهەمەدا جیاوازییەکان کەشف بکات.
بە گشتى شیعرەکانى نێو ئەم دیوانەت شیعرى داخراوو دەستەمۆ نەکراون. شیعرگەلێکن دیسان دەرفەتى ئەوەش بە خوێنەر نادەن بە بێ تێڕامانى قوڵ و تێهزرین و خۆماندووکردن، کۆنتاکت لەگەڵ ژینگەو جیهانبینى دەقەکان دروست بکات. ئەوەش پەیوەندى بەو پێکهاتە زمانییەوە هەیە کە خەسڵەتێکى قورس و گران، لە هەمانکات فرە مانا و فرە دەلالەت بە پێکهاتەى شیعرى تۆ دەدەن. واتە ئەو پێکهاتە فۆڕمى و زمانییەى کە نزیکەى هەمیشە، لە شیعرى تۆدا لەسەر شێوازى تایبەت لە هەڵبژاردن و بەکارهێنانى وشە و هەڵبژاردنى شێواز و جۆرى ڕستەو دەربڕینەکان و شیعریەت و فەزاسازیدا ڕادەوەستێ. زمان لە شیعرى تۆدا لە واتاى فەرهەنگى خۆى دادەماڵرێت و لەوە دەکەوێت ئەرکى گەیاندنى ڕووت و کۆنکرێتى بەرجەستە بکات.
لێرەشەوە کۆشش بۆ دۆزینەوەى واتاى چاوەڕوانکراو لە ڕێگەى تێڕوانین لە زمانى شیعرەکانتەوە، خوێنەر بە لاڕێدا دەبات. هەر ئەم خەسڵەتەشە کەم تا زۆر وێناسازییە شیعرییەکانى تۆ دەکەنە وێناى خەیاڵى و زەینى. هەر بۆیە ئەو تایپەى شیعرسازى و زمان و گەمە زمانییە سرکەکانى شیعرى تۆى لەسەرە، بەنیسبەت شیعرى کوردییەوە تایپێکى تایبەت و جیاوازە.
خاڵێکى گرنگتر، لەم شیعرانەدا و لە شیعرەکانى پێشوشتدا، شیتەڵکردن و هەڵوەشاندنەوەى چەمکەکان و شت و دیاردەکانە، وە دووبارە داڕشتنەوەو شوناسپێدان و پێناسە کردنەوەیانە بە ڕێگەى تایبەتى شیعرى خۆت و بە زمان و شێوازى تایبەتى شیعراندن. تۆ باوەڕێکى گەورەو ئومێدێکى گەورەت بە هێزی شیعر و بە جیهانى زیندووى شتەکان و دیاردەکان و جیهانى زیندەوەران هەیە.
باوەڕم وایە تۆ یەکەم شاعیرى کوردیت لە ئاستێکى زۆر بەرزدا لەگەڵ زماندا ئەدوێیت. ئەو شاعیرە کوردانەى بە شاعیرانى قۆناغەکانى پێشوو ئێستاشەوە کە من بەرهەم و شیعرەکانیانم خوێندونەتەوە، کەسیان هاوشێوەى تۆ ڕێزیان لە زمان نەگرتووە، کەسیان وەک تۆ لەو ئاستە چڕو فرە مەودایەدا زمانیان بەگەڕ نەخستووە. تۆ دیاردەی نێو شیعرى کوردیت، بە شێوازێکى زۆر قوڵ و بێهاوتا لە نێو ڕستە شیعریەکانتدا، زۆر زیاتر لەوەش لە نێو وشەکانتدا بیردەکەیتەوە. هیچ ڕستەیەک و تەنانەت هیچ وشەیەکیش لە نێو شیعرى تۆدا بێ ئەرک و وەزیفە نییە. هەموو وشەکانت ئاستدار و فرە دەلالەت و فرە مەودان. هەر وشەیەک لە شیعرى تۆدا بە ڕووى چەندین جیهان و ڕوانیندا کراوەیە. وشەم لە شیعرى تۆدا وەک ماڵێک دێتە بەرچاو دەیان پەنجەرەى هەبن. ئەو شێوازە چڕو ئاستدارە لە بەکارهێنانى زماندا خاڵى جیاکەرەوەو جیاوازى شیعرى تۆیە لەبەرامبەر سەرجەم شیعرى شاعیرانى کورددا.

سروشت نەوزاد
٢٣_ ٧_ ٢٠٢٠

mm

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.

Previous
Next
Kurdish