قەنناسی لێزەر … شیعر: مەولود ئیبراهیم حەسەن
ئێمە هاونێشتمانی وڵاتێکین
پێی دەڵێن : بەهه شت
ئێستا بە سواری کەشتی مینڕێژەوە
دەرکراو لەم بە هه شتە
بە نیو دەریای ژەهر
بەرەو چارە نووسی بێ چارەنووس
لە بەردەم لولەی قەنناسی لیزەر
لە زەمەنی ڕووتبوونەوەی زەمەن
لە هه موو یاسا و بەهاکان
لە ئان و ساتی تەقینەوەین
ئاشی ئەم جیهانە
سەت دەست دەیگێڕێ
دەستی ڕۆبۆت
ئەو ئاشە ئاشی هاڕێنی مرۆڤە
ئەو مرۆڤانەی
شایستەن و شایستە نین
هه موو هه ناسەیەک
لە چاوە ڕوانی
جێ بە جێکردنی فەرمانی
لیزەر بارانکردنی خۆمانین
چاومان لە دو ژیان نیە
تاقەتی بینینی
مەرگی ئازیزانمان نەماوە
خەفەت ئەوەیە
نەبووین بە نانێک
برسیێ بمانخوا
نە بووین بە جلێک
ڕووتێک بمانپۆشێ
نەبووین بە هێزێک
ترساوێک لە پەنامان بحەوێتەوە
ژیان بووە
بە سەنگەری خۆ بەدەستەوەدان
گەرەکە
چەک و رەختی مرۆڤبوون دابنێین
مەرگ یەک ئەنجامەو
زۆر شێوەی هه یە
ئێستا پاڵەوان ئەوە نیە
قەڵا داگیر دەکاو بەرامبەر دەشکێنێ
پاڵەون ئەوەیە
وەک مرۆڤ بمێنتەوە
سروشت جوانترکا
ئاسمان سافتر
دەریا ڕوونتر
باڵند ئازاد تر
گۆرانی زۆر تر
بەهار تەمەن درێژتر
چیتر مێژوو لە گەڵ خۆمان هه ڵناگرین
باری زۆر گران کردووین
داهاتوو دەگرینە باوەش
ئیتر برینی خۆمان
نادەینە دەس کەس
ڕۆژی ئەوەیە
جارێکی تر ژیان کۆمان کاتەوە
ئێمە دەبێ لە هه نگ فێربین
ژیان کارو بەرهه مە
بەرهه م هه نگوێنە
چیمان دەسکەوت
لە سەرکەوتنی شەڕ
بێ تاقەت بووم لە خەباتی ڕەوا
ماندوو بووم
لە قوربانی پیرۆز
ماڵی ژیانمان پیشاندەن
ماڵێک
پڕ بێت لە مرۆڤ
چیتر شیعری درکە مان بۆ مەنووسن
ڕاستەو ڕاست
پێمان بڵێن خۆشمان دەوێن
ئێمە
فەڵسەفەمان بە ڕووتی دەوێت
ئیمانمان بە ڕووتی دەویت
زانستمان بە ڕووتی دەوێت
ئەوینمان بە ئاشکرا دەوێت
دەمانەوێ ڕاستەوە ڕاست بژین
ئەو هه موو دەمامکە
چی بوو لە خۆمان کۆکردەوە
شۆڕشی ئێمە
ئازاد بوونە لەدەست ڕۆبۆتەکان
ئێمە دەمانەوێ
لە ژێر ساباتی خۆشەویستی
لە نێو ڕەزی داهێنان
لێرە بەدواوە
نانی بەیانیانی دۆستایەتی
بە یەکەوە بخۆین
چیتر
ئاوی ژیانمان پڕمەکەن لە ژەهر
ڕەنگی مرۆڤبوونمان لەدەست داوە
زەوی چێتر ئێمەی
بە دەمامکەوە ناوێت
ئەستیرەکان
تێنووی بینینی ئێمەن
ئێمەی وەکو خۆمان
زەوی بێزارە
لەو خۆکردن بە ڕۆبۆتە
چاوەڕێیە
خۆمان خۆمان بین
بە هه شتمان دۆراند
خۆمان دۆڕاند
ژیانمان دۆڕاند
پێویستە
لەو ( غەرێف ) ە بێینە دەرەوە
زەمەنی زۆر مان دۆڕاند
فرسەتی زۆرمان دۆڕاند
جوگرافیای زۆرمان دۆڕاند
وەرزی زۆرمان دۆڕاند
ئاوا بڕوا
بە خۆمان ناکەوینەوە
دەتانبێنم
لەژێر جوبەی سوڵتانەوە
ئێسک ڕزیو
سەر سفرەمان ئاوەدان
بە برنجی مەحمود
بە ڕۆنی ئالتون سای
بە چای دووغەزال
ئەو هه موو فرمێسکەمان ڕشت
گوڵێک نە پشکوت
بۆنی بەهاری لێ بێت
ئەو هه موو خوێنەمان بەخشی
گۆرانیەکمان نە بیست
تامی ئازادی بدات
ئەو هه موو شەهیدەمان ناشت
دیوارێکمان هه ڵنەنا
ڕۆژانی تەنگانە
خۆی بدەینە پەنا
درەنگە با خۆمان ..خۆمان بین
درەنگە با دەست بەژیان بکەین
ئەم وێنەیە برای بەڕێز سەرکەوت بالیسانی نەخشاندوویەتی ……..
هه ولێر _
١٧/٧/٢٠٢٠
