Skip to Content

با پسکیت بخۆن ! .. عەبدوڵا ساڵح

با پسکیت بخۆن ! .. عەبدوڵا ساڵح

Closed
by December 10, 2020 General

لەدەور وبەری ساڵەکانی 1789 کاتێک بە ( ماری ئەنتوانێت ) هاوسەری لویسی شانزە پاشای فەرەنسا دەڵێن خەڵک برسیە و نان نیە بیخۆا ، دەلێ دەی با پسکیت بخۆن ! (Qu’ils mangent de la brioche) ئەم دەستەواژەیە تا ئەمڕۆش بەکار دەهێنرێ بۆ جۆرێک لە حوکمڕانی کە لە ئاقار بێدەرەتانی وهەژاری خەڵک دا شانخاڵی بکاتەوە و بێدەربەست بێ .
ئەم ووتەیەم کاتێک هاتەوە بیر، کە گوێم لە قسەکانی مەسرور بارزانی سەرۆکی حکومەتی کوردستان دەگرت ئەمڕۆ چوارشەممە 9-12-2020 لە کۆنگرەیەکی ڕۆژنامەوانیدا کاتێک دەیگوت : (( کێشەی ئێمە کێشەی خاکە !! ))
فریودان وبەلاڕێدابردنیش ئەندازە و بواری خۆی هەیە، ئەم قسەیە ئەگەر لە ٢٠١٣ و ٢٠١٤ بگوترایە رەنگبا بچوبایە بەگوێ بەشێک لە گوێگرانی ، بەڵام پاش نزیک بە ٣٠ ساڵ لە حوکمڕانی شکستخواردو ، پاش ٣٠ ساڵ لە تاڵان وبڕۆ، پاش ٣٠ ساڵ لە برسیکردنی زۆرینەی خەڵکی کوردستان و لەبەرامبەریشدا هەڵتۆقینی سەدان ملیاردێر وهەزاران ملیۆنێری شەریک لەگەڵ حزب وبنەماڵە، پاش دەمکوتکردنی بائاشکرای دەنگی ئازاد و ڕاپێچەکدانی هەزاران ئازادیخواز بۆ زیندانە ئاشکرا و نهێنیەکان ، بەجۆرێک کە تەنانەت عەلی تەتەری پارێزگاری دهۆک بەئاشکرا ولە سەر تەلەفزێۆنەکەی خۆیان ( ڕوداو ) لەم شەوانە بە ناچاری دانی نا بە گرتنی ٥٠ کەس لەخۆپیشاندەرانی چەند مانگ لەمەو پێشی شاری دهۆک، کە پێشتر بێسەر وشوێن کرابوون، بەتۆمەتی داوای موچەکانیان .
ئێوە باسی خاکێک دەکەن کەدەستان پێی ڕاناگا، دەی فەرمون باسی ئەوخاکەمان بۆ بکەن کە لەژێردەستاندایە، ئەو خاکەی هەرچی لەسەریەتی و لەژێریەتی چی لێهاتوە ؟ ئاخۆ خەڵکی کوردستان چ خێر وخۆشیەکیان لە خاکی ژێردەسەڵاتی ئێوە دیوە تا روویان بکەنە ئەوەی لە ژێر دەسەڵاتتاندا نیە ؟! تازە دەتانەوێ یاری بە ئیحساساتی خەڵک بکەن بەوەی کێشەی | ئێمە| کێشەی خاکە!؟ مەبەستی ئەو جۆرە لە پەیام ئەوەیە: واز لە سکی برسی بێنن جارێ خاکمان داگیر کراوە !! خاک بخۆن لەبری نان !!
ئەمجا نۆرەی بالۆرەی | دەستی دەرەکی دێت | !! و دەلێ: لەناو خۆپیشاندەراندا دەستی دەرەکی هەیە ومەبەستیەتی ئەم قەوارەیە تێکدا !! ئەم بالۆرە سواوە هەموو دیکتاتۆرەکان پەنای بۆ دەبەن کاتێک شاڵاوی پەلاماری خەڵک توشی دڵەڕاوکێ وڕەنگ زەردیان دەکا، قەوانێکە هیچ گرامافۆنێک نایخوێنێتەوە .
ئەمجا هەموتان ، سەران وسەرکردەکانی دەسەڵات باسی توندوو تیژی دەکەن ! سەیرە ، ئێوە کە تەنانەت نای ووشکی سەر سفرەی هەژارانیشتان بەڕەوا نەبیبنی و ئەویشتان دزی! باسی توندوو تیژی دەکەن ، توندو تیژی تەنیا پەلاماری مقەڕە حزبیەکان نیە کە بەرنامەی برسیکردنی خەڵکیان تێدا دادەڕێژرێ ، مەگەر سکهەڵگوشین لەسایەی دەسەڵاتەکەی ئێوەدا توندوو تیژی نیە؟، مەگەر گیرفانی بەتاڵی سەدان هەزار گەنج و بێکار کردنیان و ناچارکردنیان بە گرتنەبەری ڕێگای مەرگ ونەمان توندو تیژی نیە ؟ مەگەر گیانسپاردن لە چاوەڕوانی چارەسەریدا لە نەخۆشخانەکان توندو تیژی نیە ؟ مەگەر دەستگرتن بەسەر موچەی شایستەی فەرمانبەرێکی خانەنشین کە هەموو تەمەنی خۆی لە خزمەتکردندا بەسەر بردوە وئێستا نان نیە بیخوا توندوتیژی نیە ؟ ئەمە مشتێک بوو لە خەروارێک .
ئەم دەسەڵاتەی ئێوە دەمێکە سەلماندویەتی کە تەنانەت لەڕیزبەندی فاشیلترین دەسەڵاتەکانی دنیاش جێگەی نابێتەوە ، هەر بۆیە دەبێ بڕوا و خەڵکی کوردستان لەو ئەزمونە شکستخواردوەی ئێوە ئەوەندە دەرسیان وەرگرتوە کە بتوانن دەسەڵاتێکی شایستە بەخۆیان دامەزرێنن کە ئازادی ویەکسانی وژیانێکی بەختەوەریان بۆ دەستەبەر بکا .

٩ – ١٢ – ٢٠٢٠

Previous
Next