Skip to Content

لە شەمەندەفەردام بەرەو لای تۆ.. شیعری: ستیڤان شەمزینی

لە شەمەندەفەردام بەرەو لای تۆ.. شیعری: ستیڤان شەمزینی

Closed
by ته‌مموز 19, 2021 General, Poems

گێژەڵووکەی عەشق لە مندا تاو ئەسێنێ و
هەڵیگرتووم بەرەو وێستگەی شەمەندەفەر
تاکو لەبەردەم تۆدا
گەڵا گەڵا تەنهاییم هەڵوەرێنێ
شەمەندەفەرەکەم خێراتر لە بروسکە دەئاژوێ و
هێشتا من پێموایە هەنگاوەکانی سستن و
ئەم رێگا تولانییە
هێندەی عومری نوح درێژ بووەتەوە
ئەمەوێ زووتر لە زوو بە تۆ بگەم و
گریانەکانی خۆم
لە رووباری خەندەکانت بشۆمەوە
رۆژووی ئەم هەموو کەساسییەم
لە ئامێزتدا بشکێنم
رووی گوناهەکانم
لە مەرقەدی پاکیزەیتدا سپی بکەمەوە
کڵپەی ئەو هەموو سووتانەم
بدەم بە دەم شەپۆلەکانتەوە
ئەو سەحرا وشکەی دەمم
بە ئاوی لێوی ئاڵت تەڕ بکەم
رەنگی تاریکم
لە ئاتەشگای چاوەکانتدا رووناک بکەمەوە
دەستە تەزیوەکانم لە گیرفانی قاپوتی
یادگارییەکانتدا گەرم بکەمەوە
لە شەمەندەفەردام بەرەو لای تۆ
ئەخوازم خێراتر لە خێرایی تیشک بگەم بە تۆ،
بگەمە ئەو عەشقەی
وەک گوللەی وێڵ نووسا بە تەوێڵمەوە و
لە بری خوێن،
پێکەنین لە رۆحمەوە فیچقە ئەکات
بگەم بەو دەستانەی
گوڵی میهرەبانیی ئەدا
لە یەخەی کراسی قەترانیی
زامە دێرینەکانم و
لاپەڕەیەک لە مێژووی من
لەگەڵ خۆی ئەنووسێتەوە
کە تیایدا رۆژنامەکان
هەواڵی ماچ ئەکەنە مانشێت
گۆڕستانەکان بە ئاوی ژیان
غوسلی خۆیان دەرئەکەن و
عەشق،
خەنجەری سووری نامووسپەرستی
لەبەر پشتێنی گرێچنی
کولتوور دەرئەهێنێ و
دەیخاتە نێو ئۆقیانووسی دیرۆکەوە
مەبەستمە، پەلەتر
لەو باڵندە کۆچەرییانەی لە وەرزی سەرمادا
بەرەو گەرمیان کۆچ ئەکەن
بەرەو تۆ بێم
بەرەو تۆ دێم
تا لە زستانی شەختە و سارددا
لە کورەی شەوەکانی مەنفاتدا هەڵکڕوزێم
تا لەسەر شۆستەی پەمەیی ئاوێزانبوون
حەیرانێک بە باڵای نەورەسێکی کوژراوی
نیشتماندا بچڕین
تاکو لە کۆماری تەژی
گڕی مۆمستانی سینگتدا
ببمە سەرۆکێک کە
بۆنی مێخەک لە سووتانی بێت
تاکو لەبەردەم پەنجەرەی چاوەڕوانیتدا
ببمە گوڵدانێکی سپی و
پڕ پڕم بکەیت
لە رەیحانەی نیگا و
گوڵی مۆری ماچەکانت
خەونمە
گورجتر لەو فریشتانە بە تۆ بگەم
هەواڵی زەماوەندی چرۆ و چڵ
دەگەیەننە خودا
گورج دێم
سۆزی دەروونی هەڵقرچاوم
لەنێو تەزیوییەکانی تۆدا ئەکەمە لاوکێک
بۆ ئەو لاولاوە رەشپۆشانەی لە یەکەم روانیندا
بەدەم هەڵقوڕانی
پێکێک لە نیگەرانییەوە مردن
دێم رووەو تۆ،
لەوێدا هەست ناکەم غەوارەم
هەست ناکەم فەنتازیاکانم
ئەبنە قفڵی ژەنگاویی سەرم
هەست ناکەم دڕکی غەم ئەچەقێت
لە ئاوریشمی هەستم و
لەوێ بە شەونمی دڵنیایی
هەموو بەیانییەک خۆم دەشۆم
لەوێ گوێ لەو سترانە بزێو و
هەمیشەییە ئەگرم
سەرەتاکەی باوەش و
کۆتاییەکەی رامووسانە
لەوێ لە پەنا گوناهەکانمەوە
لە ئاوی چاوەکانت هەڵدەکێشرێم و
کۆتایی هەموو پرسیارە شپرزە و شڵەژاوەکانم
بە یەک وشە و
بە “خۆشم ئەوێی” وەڵام ئەدرێنەوە
لە شەمەندەفەردام بەرەو لای تۆ
دەیان رێگەی نشێو و هەورازم بڕی تەنها
بۆ سەرخەوشکاندنێک لە ژێر ئاسمانی روونتدا
سەدان جار خۆم دایە بەر دەستڕێژی ئاگر
تاکو مەشخەڵێکت لێ بدزم بۆ رۆشنایی رێم
هەزاران جار شەوی دەیجوورم تێپەڕاند
تەنها بۆ رۆژکردنەوەیەک لەژێر پرشنگی باڵاتدا
دەیان نامەی کۆنی دڵدارییم دڕاند
لەپێناو نووسینی دێڕێک شیعر بۆ عەشقی تۆ
هەزارەها جار تەماشای خۆرئاوابوونم کرد
تەنها بۆ ئەوەی لە سپێدەکەیدا بتدۆزمەوە
هاتووم بەرەو لای تۆ و بۆ شارەکەت و
بەردی عەشقم
فڕێ ئەدەمە گۆمی بێدەنگیتەوە
وەک کاپتنێکی سەرکێش و دڵشکاو
خۆم و پاپۆڕەکەم
ئەخەمە شەڕی شەپۆلەکانتەوە
وەک سوپایەکی ماندوو و تێکشکاو
رووبەڕووی شاڵاوی عەشقی ئەبەدیت ئەبمەوە
وەک سەرخۆشێکی بێ پەناگە و گەدا
شەرابی ئەوینت پێک دوای پێک ئەخۆمەوە
هاتووم بەرەو تۆ، وا هاتووم ناگەڕێمەوە
ناگەڕێمەوە،
چوون شوێنێک شک نابەم بۆی بچمەوە
لە شەمەندەفەردام بەرەو لای تۆ

بەرەو لای تۆ…..

Previous
Next
Kurdish