Skip to Content

ئه‌و شتانه‌ی له‌بیر ده‌چێ‌ و ناچێ‌.. سه‌ڵاح شوان

ئه‌و شتانه‌ی له‌بیر ده‌چێ‌ و ناچێ‌.. سه‌ڵاح شوان

Closed
by July 19, 2021 General, Poems


زۆرجار بووه‌
دڵم له‌لای كچێ‌ داناوه‌ بۆ ساتێ‌
به‌ڵام پاشان
بیرم چووه‌ لێی وه‌ربگرمه‌وه‌
ئێستایش
له‌لای ماوه‌


جاریش بووه‌
خۆم و دڵم
میوانی شه‌وی ژنێك بووین
كه‌ سبه‌ینێ‌ چاوم هه‌ڵهێناوه‌
دیومه‌
هه‌رچیم هه‌یه‌
دڵم شه‌وێ‌ له‌گه‌ڵا خۆیدا بردوویه‌تی
به‌ڕووتی له‌وێ‌ جێی هێشتووم
چه‌ند جارێكیش
له‌ باخچه‌یه‌كی لاچه‌پدا
له‌ چاوه‌ڕوانیی ژوانی ئافره‌تێكا
خۆم له‌بیر چووه‌ ئێستاكه‌یش
له‌وێدا هه‌ر چاوه‌ڕوانم


هه‌ندێ‌ جاریش
له‌په‌رێزێكدا له‌ چۆڵێ‌
هێلكه‌ قه‌تێی زۆرم دیوه‌
ویستوومه‌ خێراكه‌م بچم
كڵاوه‌كه‌م بهێنم
پڕی هێلكه‌ قه‌تێ‌ بكه‌م
له‌خۆشییدا پێم هه‌ڵنگوتووه‌ و كه‌وتووم
له‌ترسان ڕاپه‌ڕیوم
فریای پاروویه‌كی هێلكه‌ی
به‌یانییانیش نه‌كه‌وتووم
بگره‌ له‌وانه‌ی یه‌كه‌میش دواكه‌وتووم


جارێكیش له‌ دوكانه‌كه‌ی نزیك ماڵمان
شتێكی زۆر جوانم بینی
دام نابوو باوكم ئێواره‌ له‌ كرێكاری بێاته‌وه‌
پاره‌م بداتێ‌ بیكڕم
به‌ڵام كه‌ دیم به‌ ده‌ست به‌تاڵی هاته‌وه‌
لێی بێده‌نگ بووم
ئێستا گه‌رچی گه‌ڕه‌كه‌كه‌یشمان نه‌ماوه‌
به‌ڵام زۆرجار كه‌ پاره‌م ده‌بێ‌ ده‌مه‌وێ‌
بڕۆم ئه‌و شته‌ بكڕم
به‌ڵام داخه‌كه‌م نازانم
منداڵه‌كان چی پێ ده‌ڵێن


كه‌ منداڵا بووم
دیواره‌كانی حه‌وشه‌مان
هێند بڵند بوو
نه‌یده‌هێشت سه‌ره‌تاتكێیه‌ك
له‌گه‌ڵا كچه‌ بچكۆڵه‌كه‌ی دراوسێكه‌ماندا بكه‌م
به‌ڵام ئێستا هێنده‌ نزمه‌
به‌رده‌م هیچ گه‌رده‌لوولێكی
پایزانه‌م لێ ناگرێت
له‌ چاوی به‌د و به‌دكاران
نامپارێزێ‌


كه‌ منداڵا بووم وام ده‌زانی
ئه‌م ژیانه‌ لاپه‌ڕه‌یه‌كی سپییه‌
هه‌رچییه‌كی تێدا بنووسم
وام دێته‌ ڕێ‌
كه‌ فێربووم وشه‌ بناسم
زانیم ژیان
ده‌فته‌رێكی شڕی پڕ له‌
شه‌ڕه‌ پشیله‌ی زه‌مانه‌
جێگای ته‌نیا وشه‌یه‌كی خۆشه‌ویستی تیا نه‌ماوه‌
بۆیه‌ منیش هه‌رچی خۆشه‌ویستیم هه‌بوو
خستمه‌ ناو شیعرێكی بێده‌نگ و نه‌منووسی

1986 هه‌ولێر

Previous
Next