Skip to Content

شەپۆلی حوزن.. شەماڵ بارەوانی

شەپۆلی حوزن.. شەماڵ بارەوانی

Closed
by July 19, 2021 General, Poems


دەبوایە زوو بێیتەوە
بەرلەوەی
گۆچانی پیری
لە سوچی تەمەنم
چرۆ بکات
و
دڕکی نائومێدی
لەسەر دیواری چاوەڕوانیم
بڕوێت

بەرلەوەی
باخچەی خەونەکانم
پڕبێت لەهەڵوەرین
و
سوتماکی خەم
لەناو تابلۆی خەونەکانم
داگیرسێت

بەرلەوەی
مەلی حەزم
بەرەو ئاوابوون
ببزوێت
و
چاوی موناجاتم
هێشووی
کوێری لێ بڕوێت

بەرلەوەی
قامەتی قەڵەمم
قەمبوور بێ
و
ترپەی دڵی ڕێنووسی
ڕستەکانم لەلێدان بکەوێت

بەرلەوەی
کۆرپەی حەرفەکانم
بە بێ نازی سەربنێنەوە
و
ئەژنۆی قافیەی شیعرم بشکێت

بەرلەوەی
شەپۆلی حوزن بگات
بەدەروازەی دەروونم
و
تەمی تاریکی
پەنجەرەی ڕوانینم
داپۆشێت

بەرلەوەی
تەڵەسپیەکانی
قژی هۆنراوەم
پێ بگەن
و
مەجازی وشەکانم
کاڵبێتەوە

بەرلەوەی
کۆتری بەختم
لەفڕین بکەوێت
و
کاتژمێری ئاواتەکانم
بکوژێتەوە
..
شەماڵ بارەوانی

Previous
Next