مەسعود بارزانی بەرپرسی سەرەکیی ئەم داڕمانەیە! .. ڕێبوار ڕەشید
هەر وەکوو دڵسۆزان پێشبینییان دەکرد دۆخی باشوور تا دێت خراپتر دەبێت.
باسەکان لە سەر ئاوەدانکردنەوەی باشوور و پێشخستنی خوێندنگا و نەخۆشخانە و بەنداو و ڕێگاوبان نیین. هەروەها لە سەر باشکردنی دۆخی ژنان و لاوان نیین، بەڵکو لە سەر مووچەی مانگانەیە کە بە هەزار قات لای دەسەڵاتداران هەیە بەڵام بێگومان بە ئێنقەست بە خەڵک نادرێت.
با بۆ چاوترووکاندنێک واز لە نەوت و گاز و گومرگ بهێنین ئەگەرچی داهاتی ملیارد دۆلاریین.
با باس لەوە بکەین کە ئەگەر حکومەتی هەرێم لە ژێر دەستی کۆمەڵێک تاڵانچی بێئەدەب و بێڕەووشتدا نەبووایە ئەوا هەر کوردی باشووری دانیشتووی دەرەوەی وڵات دەیتوانی دەیان جار هەموو باشوور بژیەنن.
تێبینیی بکەن کاتی خۆی ئیسرائیل سەحرایەکی کاکی بە کاکیی بوو. جوولەکەی نیشتیمانپەروەر دەستیان خستە نێو دەستی یەک و لە ماوەیەکی زۆر کەمدا ئیسرائیلیان کرد بە خاوەنی ملیاران دۆلار و ئەوڕۆ ئیسرائیل ئەو وڵاتەیە کە دەیبینین. شانازیی کەسایەتیی جووەکان بە دروستییەوە ئەوەندە بەرزە کە شای هیچ کەسێک بە گاوان را ناگرن.
بەڵام بڕووانن، باشوور کە فیردەوسی بەرین بوو بە دەستی ئەم تاقمە سەرسەریە شەڕلاتانەوە چۆن وێران بوووە.
ئەگەر حکومەتی هەرێم لە دۆخی سرووشتییدا بووایە و کۆمەڵێک سیاسەتمەداری نیشتیمانپەروەر کە مووچەی دروستیان هەبووایە و کاری خۆیان وەکوو کارمەندی خزمەتگوزاریی بەجێبگەیەندایە ئەوا لە رووی ئابوورییەوە کوردانی دانیشتووی باشوور لە دەرەوەی وڵات بۆ بەڕێوەبردنی بەس بوون.
ئێستا لە دەرەوەی کوردستان سەدان هەزار مرۆڤی کوردستانیی هەر چوار پارچەی کوردستان هەن. هەرە زۆرینەی ئەم سەدان هەزار کوردە لە باشووریی و ڕۆژهەڵاتیی و باکووریی و ڕۆژئاوایی و شوێنی دیکە خەڵکی دڵسۆزن و کوردستانیان خۆش دەوێت و تینووی ئازادین. هەموو باشووریان بە قیبلەی خۆیان دادەنا و سوێندیان پێی دەخوارد و شانازییان پێوە دەکرد.
ئەگەر دۆخی باشوور ئازادیی و سەقامگیریی و ئاشتیی بووایە کە کوردانی دەرەوەی وڵات بیانەوێت دڵخوازانە بە ئازادیی هاتوچوو بکەن، خانووبەرە دروست بکەن و بە ئازادیی بازرگانیی بکەن، ئەوا بازاڕێک لە باشوور دروست دەبوو کە ئێستا باشوور یەکێک لە دەوڵەمەندترین وڵاتی ناوچەکە بوو. هەر سەردانی ئەم ژمارەیە دەبوو بە کار و بە هەلی خۆبژێوی بۆ دەیان هەزار لە کارمەندی ڕێگاوبان و فڕۆکەخانە و هاتنوچوون. ڕۆژانە بە دەیان ملیارد دۆلار لە بازاڕەکاندا لە ناو خەڵکدا دەستاودەستیان دەکرد. جووڵەیەکی لەو شێوە دەبوو بە مۆتۆڕێکی بەهێز کە کەرتی گەشتوگوزاری بە تەواویی دادەمەزراند و باشوور دەیتوانی هەروەها بە دەیان هەزار کرێکاری ڕۆژهەڵاتیی و باکووریی لە خۆ بگرێت و ببێت بە پشتوپەنای پارچەکانی دیکە. ئەم جۆرە لە بازاڕ هەروەها کەرتی کشتوکاڵ و خزمەتگوزاریی پێشدەخست، پێوەندیی لە ناو خەڵکدا بەهێزتر دەکرد و دەبوو بە هۆی تێکشکاندنی پێوەندییە عەشیرەیەتیەکان و دروستکردنی پرینسیپی مامەڵەی بازرگانیی سرووشتیی.
ئەم جۆرە زەمینەسازییەی ژێرخانی ئابووریی کاریگەریی زۆر گەورەی پۆزەتیڤی لە سەر باشکردنی کەرتی خوێندن و تەندروستیی هەیە، چون خوێندن پێشمەرجی بازرگانیی و ئاڵوگۆڕی سەرکەوتووە و کەرتێکی تەندروستیی خۆڕایی/ هەرزان زامنی هەبوونی خەڵکێکی تەندروستە کە دەتوانن بیر بکەنەوە، کار بکەن و بەرهەمبهێنن و باوەڕیان بە ئاییندە هەبێت.
بەڵام ئەم بیرە تا بڵێی خراپە و بێگومان چارەسەر نییە.
چارەسەر نییە، چونکە ئەو کاتە مەسعود بارزانی و خانەوادەکەی نەیاندەتوانی بە سەدان ملیارد دۆلار بدزن و سامانی خەڵک تاڵان بکەن، نەیاندەتوانی نیوەی هەولێر و دهۆک داگیر بکەن، نەیاندەتوانی هەموو بازاڕەکان لە مەسینەی پلاستیکی تورکیی و ئێرانییەوە تا ماشێنە گەورەوگرانەکان بخەنە ژێر دەستی خۆیان، چونکە مەسعود نەیدەتوانی سەری ڕەش داگیر بکات، نەیدەتوانی بە دەیان چەناڵی تەلەڤیزیۆن بۆ ریکلامی خانەوادەکەی بکاتەوە کە هەر یەکەی بە ملیارد دۆلار خەرجی هەیە، ئەو کاتە نەیاندەتوانی مووچەی چەند هەزار دۆلاری بە هەر یەک لە کارمەندانی تەلەڤیزیۆنەکانی بدات و چاکەت و پانتۆڵی تورکییان لە بەر بکات کە بێن و وەکوو ئەکتەری سینەمایی خۆیان نمایش بکەن بۆ ئەوەی باسی پیرۆزیی عەرشی خانەوادەکەی بکەن.
تێبینیی بکەن و سەرنجی جلوبەرگی کارمەندی تەلەڤیزیۆنەکانیان بدەن و بپرسن بە پارەی کێ؟
تێبینیی بکەن و مووچەی خەیاڵیی کارمەندی تەلەڤیزیۆنەکانیان ببینن و بپرسن بە پارەی کێ؟
تێبینیی بکەن و بپرسن مووچەی ئەم هەموو قونبادان و خۆتەسککردنەوە و خۆڕەنگکردن و خۆنوواندنەی سەحنەی تەلەڤیزیۆنەکان بە پارەی کێ؟
تێبینیی بکەن و لە مووچە و دەرماڵەی جێگری سەرۆکەکان و وەزیرەکان و پارلەمانەکان بڕووانن و بپرسن بە پارەی کێ؟
تێبینیی بکەن و لە مووچە و دەرماڵەی قایمقام و پارێزگا و کوێخا و نۆکەرەکانی دیکەیان بپرسن، لە ئوتومبێلی ژێریان و لە خانووبەرە و لە زێر و خشڵیان، لە سەفەری گەرمیان و کوێستانیان بڕووانن و بپرسن بە پارەی کێ؟
تێبینی بکەن و لە هەموو ئەو کۆشک و تەلارانە، لە گردە داگیرکراوەکان و لە کێڵگا نەوتە داگیرکراوەکان و لە باخە داگیرکراوەکان بڕووانن و بپرسن لە سەر حیسابی کێ؟
تێبینی بکەن و بپرسن ئایا لە مەسعود بارزانییەوە تا بچووکترین کادێری ئەوی پێی دەگوترێت “پارتی” یەک دانە هەیە کە دزی لە سامانی گشتیی نەکردبێت، پارەی خەڵکی نەخواردبێت، لە رێگای جاسووسیی و سیخوڕیی و خۆفرۆشییەوە ئەو مەقام و پلەوپایەی دەست نەکەوتبێت؟
ئایا ئێوە سەرنجی چاکەتوپانتۆڵ پۆشە بەکرێگیراوەکان و خەڵکی گشتیی باشوورتان داوە و کۆنتراستی نێوانیان دەبینن؟
ئایا کێ پرسیار ناکات ستراکچەری سەیروسەمەنەی ئەم حیزبانە کە لە سەرەوە تا خوارەوە مانگانە بە ملوێن دۆلار لە سەر سامانی گشتیی دەکەون، بە ئەقڵی کام گەڵوگیپاڵێک دارێژراوە؟ ئایا لە کوێی دونیای شارستانییدا سەرۆکی حیزبەکان تا ئەندامەکانیان لە سەر حیسابی سامانی گشتیی دەخۆن و دەخۆنەوە و دەلەوەڕێن؟
هەموو ئەم ئوتومبێلە گەورەوگرانانە، هەموو ئەم پاسەوان و نۆکەر و کڵفەتانە، هەموو ئەم سپا بندیوارە و ئەم خوان و سەفەر و خۆلێسانەوەیەی سەرۆکەکان تا بە کادێرە بچووکەکانیان دەگات، بە پارەی کێ دەکرێت؟
ئایا یەک کەس لە ناو ئەوانەدا هەیە کە بتوانێت بە پشت و سەری ڕێکەوە ڕابووەستێت و ئامادەی دادگا بێت کە پارەی نەدزیبێت، لە سەر پارەی دزراو نەژیابێت، کە خانووبەرە و زەویوزاری لە سەر خوێنی خەڵک دەستنەکەوتبێت، کە بە خۆسووککردن و نۆکەریی ئیمتیازی بۆ خۆی و دەوروبەری وەرنەگرتبێت، کە بە درۆودەلەسە و بە بەڵگەنامەی درۆ و لە سەر خوێنی خەڵکی بە توانا پلەوپایەی خۆی وەرنەگرتبێت؟
باشوور ئەوڕۆ کراوە بە زیندان بۆ باشوورییە سەربەرزەکان، باشوور ئەوڕۆ گەورەترین زیندانی ئاکرێ یە بۆ ئەوانەی دەیانەوێت وەکوو مرۆڤ لە دۆخی دەستپاکیی و سەرڕاستییدا بە ئازادیی بژین.
کێشەکە زۆر زیاتر لە نەبوونی مووچە گەورەترە. هۆی برسیکردنی ئەم گەلە بۆ ئەوەیە کە مەشغوڵی بکەن کاتێک کە بەهدینان تەسلیم بە سپای تورک دەکرێت، کاتێک کە کەرکووک بە ترکمانیی دەکرێت، کاتێک کە کاپمی مەخموور و شەنگال تەسلیم بە سپای ئێراقیی دەکرێن.
پیلانەکە هەر بە تەنیا بۆ شکاندنی شانازیی ئازادیخوازیی خەڵکی باشوور نییە ، بەڵکو بۆ شکاندنی تەواوی کوردستانە.
بێ ئابڕوویی ئەوانە گەیشتووەتە ئەو ئاستەی کە بە خەڵکی نیشتیمانفرۆشراو و سامان تاڵانکراو دەڵێن “ئێوە بێ مۆڵەت خۆپیشاندان دەکەن”. لە راستییدا پێیان دەڵێن بڕۆن بە سەما و هەڵپەڕکێوە باسی زگی برسی و رەنجی بەبادچووتان بکەن.
تاڵانچییەکان بە خەڵکی ئابڕوومەند دەڵێن برۆن بە هەڵپەڕکێیوە باسی ئازاری ددانتان بکەن، بە سەماوە باسی ورگی برسی منداڵانتان بکەن، بە گۆرانیی چڕین و هەلهەلەوە باسی وڵاتێکی سووتاو و فرۆشراو و تاڵانکراو بکەن. بەڵێ، پێیان دەڵێن “کوا مۆڵەتان؟’ ” بۆ بە شارستانیی ڕێ ناپێون؟”
دروست لە هەمان کاتدا ئەم تاقمە تاڵانچیەیە بە بەرچاوی هەموو کوردەوە، هەموو ئێراقەوە، هەموو ناوچەکە و جیهانەوە شەنگالێکی خوێناویی و قوڕاوی بچکۆلە و کامپی مەخموور، تەنەکەئاواییەکی مەلۆتکە و حەفتاساڵە، تەسلیم بە سپای ئێراق دەکات و لە بژاردەی نێوان عەسکەری ئێراقی لەگەڵ کچ و کوڕانی ئێزیدی و مەخموورییدا، ئەم عەسکەری ئێراقی هەڵدەبژێرێت.
دروست لە هەمان کاتدا کە خەڵکی دهۆک و زاخۆ و هەولێر وەکوو باڵندەی باڵشکاوی ژێر لێزمەبارانێک، وەکوو دوا هەناسەکانی چرای بەر رەشەبایەک و وەکوو دوا چاوترووکاندنی دایکێک لە سێبەری مەرگی خۆیدا و تەنیا باڵێک دوور لە کۆرپەکەی، لە ئومێدی ئەوەدان هێزێکیان بێتە بەر کە عەرشی ئەم تاقمە تاڵانچییە بێئابرووە لە بنوبێخ دەربهێنن و سەدان جار بیبەن بە ئاسماندا و بیدەنەوە بە ئەرزدا.
ئاخ خەڵکی ئازادیخوازی باشوور کەی بە ناخێری گیانتان فێر دەبن کە بە قونبادان و ورگ هەڵتەکاندن و هەییهەی و چەهچەهەی بولبولئاسا و هەڵپەڕکێ و قاقای پێکەنین و دەست بادانەوە مۆڵەتی خۆپیشاندان وەربگرن و بە قاقای پێکەنینەوە داوا بکەن دەریایەک خوێن و سامانی خاکتان بدەنەوە؟
ڕێبوار ڕەشید
9/12-2020
تێبینیی:
- بۆ باش تێگەیشتن لە دۆخی ئێستای باشوور و تێگەیشتن لە پێوەندیەکانی دەسەڵات و لە بەرپرسیاریەتیی پێویستە دەسەڵاتەکانی “سەرۆکی هەرێم” و “سەرۆکی حکومەت” بخوێندرێتەوە.
- ئەگەر تا ئێستا نووزەیەکی مامەڵەی کرین و فرۆشتن لە باشوور هەیە بە هۆی ئەو پارەیەوەیە کە زۆینەی کوردانی باشوور لە نزیکەی 30 ساڵی ڕابردوودا بە پێی توانای خۆیان بە مەبەستی هاوکاریکردنی خانەوادە و کەسوکاریان بۆ باشووری دەنێرن. ئەوە تەنیا پارەیەکە کە وەکوو دراوی قورس دەچێتە کوردستان، بە پێچەوانەوە، تالانچییەکان هەموو پارەیەکی باشوور لە شێوەی دراوی قورسدا ڕەوانەی ئوروپا و ئەمریکا دەکەن.
