گوڵێ.. کەنعان مدحەت
ئەو شنەیە پێوەی دیارە
بۆن و بەرامەی بەهاری ، تاقە بارە
بە دڵم بنوسێ و خەنیم کاتەوە
کەی تۆش جوانی و ئارەزووت وەک ئەو تیا
کۆبووەوە
بێشک ئەودەم ،
لێوم بۆ تۆش دەکەوێتە سەما و
ماچم بە سەرەتا داڕێژ
رەزامەندیتش ،
بە ئەنجامگەیاندنی روکعەتەکانی نوێژ …
ئەو شمشاڵە ئاشقەی پەخشی هەناسەت
بە تەنها و تەنها پەنجەکانتی نوقسانە
دە شانە بە شانە بیلاوێنە
با تێر بمخرۆشێنێ و
دڵی زووخاوم لەت لەت کات
خۆ من لە یەکەم تڵفی تەڕمەوە
سەرمەستی تۆ و
شەیدای بۆنی گوڵەکانی سنگتم
ئەو گوڵانەی کە بە درێژیی تەمەن
ئاوێزانی خۆ پێناسەکردنی پەنجەنم بوون
بۆنیان بکات ..
با بە هەڵا نەڕۆین ، گوڵێ !
هەمو گوڵێ شایستەی شانازی و
بۆنکردنە ..
ئەگەر جاری وا لووت نەفرەتی لێ دەکا و
جاری واش خودی گوڵ بە خۆی
بۆنی لێ دەوەرێتەوە
بەڵام بۆنی تۆ هەرگیزاو هەرگیز
نە سەرەتا و
نەش کۆتا دەیگرێتەوە
Dengekan
دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.
