گەڕیدەیەک لە دۆزەخا.. شیعر/ کاوە عوسمان عومەر
من برینی سپی
گوڵە ژەهرینەکانی
عیشقم چنیوەتەوە
بەردی وشەم داتاشیوە
تا پەیکەری بارانی ئەو
لە کەرنەڤاڵی پەری
باڵسوتاوەکانی دۆزەخا
ببینمەوە
چی وەرزێکی شەختە بیابانە
خەزانی ڕوخساری
تەزیوی بەهاری
هەڵچنیوە
چما ئەم هەموو خوێنە
تینوە
لە جەستەی پڕ ئەندێشەی
دارستانێ لە خەو
بپژێ
چما ڕەگی هەڵقرچاوی
دارەکان
هاوار و
ناڵە ی
ئەڤینی پڕ دەردی
زەمینیانە
چ ترسناکە ڕۆژەکان
بێ بزەی
لێوی تۆ
لە سەرابا بە خۆم دەڵێم
شکۆفە سپیە ژەهرینەکان
لەوانەیە ببنە
لێوی شەڕانگێزی تۆ
تینوو
بە نمە شیعری من
شکۆفە ژەهرینەکانی عیشق
با لە بێستانی بوهەیمی ڕۆح
بوەرن
زەرد ، پەمەیی،
سوور،
وەک خوێنی تکاوی
دڵی ئاسمان،،
وەک گەڕیدەیەک
لە وونبونێکی قەشەنگا
بە قامیشەڵانی زەمەنا
ڕێئەکەم
تا چرۆیەک
لە ئەستێرەی نیگایەکت
بدوێنم
وونبونێکی خۆشە
گەڕیدەیی لە دۆزەخا
وونبونێکی خۆشە
دارستانی دڵی سامناک
مەست بە مەی ڕەشی
ئیبلیسەکانی
یاخیبوون بێ
گەڕیدە بە،
تۆ ووتت
لە ژێر مانگێکی شین
هێشتا ملوانکەی قەشەنگی
منداڵیەکی
لاسار و یاخی
نەپچرابێ
گەڕیدە بە
ڕۆحێکی نەسرەوت
یاداشتە ئاگرینەکانی
سەفەری نەفرەت
کەشتی نێو گڕکانی نەهات
نەیبردبێ
با لەم دۆزەخە قەشەنگەی ئێستا
بە ئافات
بۆیەک بنوسین
با بە فەنا
بەیەک بگەینەوە
ببە گەریدە وەک من
وەک ڕەهێڵەی تەزیو
لە چنگی زریانا
بۆ شەختە خۆشبەختی ڕەها
بتوێیتەوە
………………………………………………………………..
وێنەکە تابلۆیەکی نیگارکێشی ئۆکرانی
Victor Zaretsky. باخچەی شکۆفەکان))
Dengekan
دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.
