یەکەم پێلەقە.. سەلام عومەر
یەکەم پێلەقەی هاویشتم
سەراوی دایکم رژاندو
لەگەڵ ئەودا
چۆڕامە کۆشی مامانێ
یەکەم ناڵە کە گوێم لێبوو
ئی داکم بوو
دەیچریکاندوو
دەیگوت منداڵەکەم کوانێ؟
٭ ٭ ٭
لەوکاتەوە
تەمەنم وەک سەراوەکەی داکم دەڕژێ
کەسێ نییە کۆیکاتەوە
لەوکاتەوە
قرچەی شکانی منداڵیم دێ و
خوێن لە برینی هەستم دەتکێ
کەسێ نییە چایکاتەوە
٭ ٭ ٭
هێشتا تامی
یەکەم دڵۆپە شیری داکم لە دەممایە
چێژی یەکەم بۆنی ئەو و
یەکەم ماچی لێوەکانی
لەنێو دەماری دڵمایە
٭ ٭ ٭
یەکەم پێلەقەی هاویشتم
سەراوی داکم تەقاندو بەربومەوە
روناکیم دی و
ناوکیان بڕیم
بۆ هەمیشە
لە یەکەم نیشتمان و
جوانترین سیما و
ئازیزترین کەسیان دابڕیم
٭ ٭ ٭
لەوکاتەوە
وەکو داکم ژانم دێتێ و
دەناڵێنم
لەوکاتەوە
یادەکانی وەکو وێڵداش
لە تەمەنم دەئاڵێنم
٭ ٭ ٭
یەکەم پێلەقەی هاویشتم
دەریایەک فرمێسکی پێڕشتم
لەوکاتەوە
جیهانی من وەکو داکم
ناڵەو چریکەی بەرەژانە
لەوکاتەوە
نیشتمانم
تەقینی سەراوەکان و
خوێن رژانە.
Salam Omar
ژیاننامە )سەلام عومەر كەریم( *لە ساڵی 1967 لە قەڵادزێ لەدایك بووە .. 1986 ماڵیان دەچێتە هەولێر.. 1998هاوسەرگیری كردو ە.. 1984 وە چیرۆك و شیعر و بابەتی وەرزشی و فۆلكلۆری لە زۆرینەی رۆژنامە و گۆڤارەكانی ئەوكات بڵاوكردۆتەوە. دەستەی دامەزرێنەری تەلەفزیۆنی ئازادی بووە لەساڵی 1994.. ئەندامی یەكیەتی نووسەرانی كوردە *ئەندامی سەندیكای رۆژنامەنووسانی كوردستانە **سەدان وتاری سیاسی لە رۆژنامەو گۆڤارەكاندا بڵاوكردۆتەوە لە ساڵانی هەشتاكانەوە لە چەندین كۆڕی شیعری بەشدار بووە *لە ساڵی 2000 سەرنووسەری ئەدەب و هونەری رێگەی كوردستان بووە كەرۆژنامەیەكی سەربەخۆ بوو *سەرنووسەری ماڵپەڕی رێگەی كوردستانە * 10 كتێبی چاپكراوی هەیە لە رۆمان و شیعر و چیرۆك +چەند شیعرێکی کراوەتە گۆڕانی و سروود، شیعرێکیشی لە پڕۆگرامی خوێندنی قۆناغی بنەڕەتی دەخوێندرێ * لە ساڵی 1993 وە لە راگەیاندنی حزبی شیوعی كوردستان كار دەكات و تا ئێستا بەردەوامە.
