Skip to Content

برینە داگیرساوەکانی ئەستێرەکان.. شیعر/ کاوە عوسمان عومەر

برینە داگیرساوەکانی ئەستێرەکان.. شیعر/ کاوە عوسمان عومەر

Closed
by April 5, 2021 General, Poems


گوڵە لەیلەکەکان
لە شەونخونی خۆیانا..
با خوێنپژانی ..
جوانی تۆیان بێ،،
منیش لە باخە تەماویەکانی بیرەوەریت،،
چرای گەڕانەوەی تۆم هەڵکردوە،،
سەفەری تۆ چەند سەدەی خایەند،،
شوێنەکان سەریان هەڵگرت،،
شارەکان لە باڵیاندا،،
تۆ شەپۆلێکیشت نەنارد،،
بەڵام ئەی ڕۆحێ،
نوقم لە سەرابی غوربەت،،
تا کەی سۆراخی بوون،، و..
نەبوونی ئەو ئەکەی،،
غەمی نەگەیشتنی بەلەمێ،
هەورێ،،،
لە هەر شوێنێ…
سۆراخی بوون ،،و،،
نەبوونی تۆ کەم،،
پەنجەرە شینەکانی سەحەریش..
باهەر کراوەبن،،
تا وەکو شمشاڵی بیرەوەری..
لمی جەستەیەکی تەزیو…
وەک دوکەڵی مەرگ،،
بە بادا ئەکا،،
برینی داگیرساوی ئەستێرەکان..
بۆ تۆ بڵێسەیان گرتوە،،،
گە ر پێنازانی..
هەڵهاتن وەک مەلێک،،
لە نێو دو توێی کتێبی زەریادا،،
بۆ دۆزینەوەی خۆری خود،،
لە ئاسمانی نیگاتا،،
هەڵدێم لەو ساڵە مسینیانەی…
زەمین بوە خاچستان،،
ئاوێنەی بوون ڵێڵە ،،
چی ترڕوخساری مرۆڤە ..
وونبوەکان ناناسرێنەوە،،
ووتت، مەگەر بمرم و….
زەریام بیرچێ،،
مەگەر بمرم، تۆ ووتت..
نیگای چنگێ گوڵی ڕەشی سرک نەکەمەوە،،
مەگەر هەناسەیەکت،،
لەم جەنگەڵستانە،..
بەرائەتی لەدەستچوو بگەڕێنێتەوە،،
دەرمانی ژەهری نامۆییم بە تۆیە..
ئیتر بورجی تەنیایی،،
بە شکۆفە چرپەیەکی مۆرت بنەخشێنە،،،،
لەم دەڤەری گڕە،،
تۆ بڵێی کەسێ هەبێ و ،،
شەو بە دارستانە سپیەکانی عیشقا ..
تێپەڕ بێ،،
و حەزی لە ڕۆحسوتانبێ؟
بەڵام لەساتەوەختی پشووی..
بەردەم ئاشی خەفەتا،،
ئۆمێدیک ،،
تاوە کلۆ بەفرێ..
لە ئەڤینی ئەوسا،
دەوازە ڕەنگاڵەیەک..
هەر نابینم،
داسی پەمەیی مانگ،،
ئاگری کات..و..
مەراقی نەگەیشتنی ..
پەپولە ئاڵتونیە کانی چاوت،،
شنەبای سەر ئەم نشینگە سەختە،،
دواهەناسەی شاعیرێکە..
لە شەڕی شیعرو..
تەمەنێ،،
ڕۆحی دەرچوو،،
بێئۆقرەکانی شارە سەرهەڵگرتوەکان….
نیوە مردوو ،،
نیوە زیندوو،
تابلۆی جەستەیان لە کەنارا،،
بە بێ ڕەنگ جێ هێشت…
بازە ئەرخەوانیەکانی ئێوارەیەکی مۆر..
لە ئاوێنە تەڵخەکانی چاوەڕوانی،،
زیندانی کران،،
درەختە کانی ووشەش..
بە ڕەگی زەمینێک لە ڕابردوو،،
بەستراونەتەوە،،
قەڵەمبازی ساتەوەختێ…
لە ئاسوودەیی،،
بەرەو فەنا،
گیتارژەنێکی نادیارە،،
بێ‌بڕیاری،،
لە ناوەڕاستی هێڵی شەمەندەفەرەکانی مێژوو..
ڕۆژگارێکی سپی بێ خەوشیشە،،
تەنیایی،،
ئای!باخچەی ژەهرینی عیشق،،
چەند لەخشتەبەرە،،
دڕکی زڕە داری خەم،،
هەموو فیردەوسی تەنیوە،،
بێ هەست و چرپە،،
لە وێرانە عیشقا…
لە وەرینە ڕۆحا..
تێئەپەڕم،،
تۆ زەردەپەڕی سووری زیندەگی من بە،،
تا کۆتای ئەو هەموو ڕێیانەی..
تا پنتی سفری مەرگ
بەلەمی کریستاڵی دڵ ئەبەن.

………………………………………………………………..
وێنەکە کارێکی هونەری فۆتۆگرافەری ئەڵمانی
(Gerd Altmann)
بە سوپاسەوە لە پەیجی فەرمی خۆی وەرگیراوە.

Previous
Next