Skip to Content

مروارییەکانی ئەوین.. مرواری شەشەم.. شیعر: ستیڤان شەمزینی

مروارییەکانی ئەوین.. مرواری شەشەم.. شیعر: ستیڤان شەمزینی

Closed
by April 5, 2021 General, Poems

فێرم بکە عەشق تسۆنامی فرمێسکی روون و
لافاوی بێ ئۆقرەی ماچە
فێرت ئەکەم خۆشەویستی
گوڵەگەنمی سەوزی دەشتی بەپیتی هەستە


وتت لە بەیانییەکدا دێم
مشتێک هەتاو بۆ تاریکی شەوەکانت ئەهێنم
وتم لە شەوێکدا دێم، تریفەی مانگ و
مەشخەڵی ئاتەشگات بۆ دێنم


پەشیمانم لەو تەمەنەی لە بێ تۆیدا
کەوتبووە نێو گۆمی تەنهاییەوە
پەشیمانم لەو لە دایکبوونەی نەکەوتبووە
حەساری نیگا نەرمەکانتەوە


بە دەوەنی میهرەبانی و
بە گەڵا یاقووتییەکانی سۆزت گەرم دامبۆشە
بە بڵێسەی ئاگری چاوە مەستەکانت
دارستانی خەیاڵەکانم بسووتێنە


تۆ لە کانی میهرەبانیی هەڵئەقوڵێی
منیش لە هەورێکدا چڕ بوومەتەوە
تابلۆی بەیەک گەیشتنمان
دڵۆپ دڵۆپی بارانێکە بۆ باوەشی فێنکی کانی


زمانی فرمێسک ئەخوێنمەوە
چیرۆک بۆ ئەستێرەیەکی بێدار ئەگێڕمەوە
کۆلارەی خەیاڵم دوور ئەفڕێ
تا بگاتە ئاسمانی بێ بنی چاوەکانی تۆ


لەهەر شیعرێکما غەمێک خۆی شاردۆتەوە
لەهەر نیگایەکیشما ونبوونێک
لەیەکەم پلیکانەی نیگاکردنما
بەربوومەوە ناو بەهەشتی دڵڕفێنی جوانیت


کە مردم سوتووەکەم بدەن
بەدەم ئەو رەشەبایەی ئەمباتەوە بۆ لای یار
کە مردم بمخەنە تابووتی ماچەوە و
لە ئۆقیانووسی چاوەکانیا بمنێژن


تۆ کاپتنی ئەو پاپۆڕەی
لە دەریای هەڵچووی هەستی مندا نقووم ئەبێت
منیش سەرقافڵەی ئەو کاروانە تەنهایەم
بەرەو خۆری ئەوینت رێ ئەبڕێ


کتێبی خەوننامە ئەخوێنمەوە
گوێ لە پرتەوبۆڵەی جادووگەرەکان ئەگرم
ئەمەوێ بزانم لە کام خەون و
لە پێشبینی چ ساحیرێکایە
دەرکەوتنی تۆ؟


خۆزگە ئەو مەرگە تاڵە
وەستانی دڵی پێنووسی شیعرەکانی من بووایە
خۆزگە گەڵاڕێزانی گەڵاکانی عەشقت
وەرینی گشت خەونەکانم ئەبوو


سوێد – ستۆکهۆڵم

Previous
Next