Skip to Content

وڕێنە.. سەردار جاف

وڕێنە.. سەردار جاف

Closed
by ئایار 8, 2021 General, Poems

لە دوێنێوە
شەش ساڵە خۆم ون کردووە
قەڵەم خانەی خوێنم دەخوا
کە لە شيعر ياخی دەبم
نازانم گێژم يا سەرکێش
يا ديدێکی تەمتوماويم
وڕێنەکانم پێ دەگرن
کۆيلەم مەکە
کەمێ کاتم پێ بدەوە
خەسڵەتێکی خۆرسکيم و
لە نێو شارا لە دايک بووم
نها ياخی و
هەنگاوم ئولفەتی دەشت و ڕێ شاخاويم
…………………………………..
وا شێواوم … نازانم چۆن
لە گێژەڵوکی دۆراندۆر قورتارم بێ
هێندە دەڕۆم
زۆر شەکەت و ماندووی ڕێگام
کەچی هێشتان لە جێی خۆمم
بشێ زوو لەم پێکوتەيە
ڕزگارم بێ
تيڤييەکەم پێکردووە و سەيری ناکەم
شنەی گۆرانی وتنمە و
ڕێژنەی فرمێسک هەڵدەڕێژم
پێ دەچێ ئافاتی گێژبوون
بێدارم بێ
………………………………
من دەمەوێ هەموو کار و شتێ بکەم
وام تێ مەگە کە تەمبەڵم
بە مەيلی تۆ بدەم هەوڵم
حەزم بە نێرسيسييەت نييە
بوومە ياخييەکی سەرکێش
دەريايەکی هار و هاج و
من ئامێزی ئاو و سەوڵم
نازانم بۆ ………. !! ؟
دەبەنگێکم لەم دونيايە حاڵی نابم
هەر دوای خاڵ دێمە سەر دێڕ
پاش هەر ڕستەيەکی شێواو
سەرکێشييەکی زۆر دەکەم
هەتا سێ بازەی لۆقمە
بە سەر لاشە و پێست و کەوڵم
………………………………………
کە سۆراغی دۆزينەوەی خۆيشم دەکەم
زەنگی مۆبايل لێ دەدەم
قسە ناکەم
بیرم دەچێ سەعات چەنە
کە سەيری کاتژمێر دەکەم
هەموو سپێدەيەکی ڕوون
زەنگی هۆشياری ڕادەگرم و هەڵناسم
لە نێو جێيا گێرە دەکەم
…………………………………….
پيس و پۆخەڵ و لەوتاوم
تەنها لە ئاکارا نەرمم
بمدۆزنەوە
من لە چ خاڵی گۆی زەويم
دەچمە ئاگردانی تەنوور
کە دەردەچم
هەست بە شۆک بوونی خۆم دەکەم
هيچ بەرز نيم
نە لە ترۆپک و نە لە دامێن
زۆر زۆر نەويم
…………………………………..
شەوی درێژ
لە خەونێکی ئاڵۆسکاوا لوول و گێژم
لە ڕوداوی ڕاستی دەچن
بە هێزەوە
دەست بە ريمۆنتەکە دەنێم
کەچی هەر لە بەر چاومدا
پاترييەکان
سست و لاواز و ملکەچن
دەتوانم خۆ فريو بدەم
مەست مەست ببم
بە بێ ئەوەی بخۆمەوە
لێم تێ بگە وڕێنەی چی
لە عەوداڵی دوێنێدايە و
لە مشتومڕی يەقينە
بۆ وێڵبوونی ڕاستی دەچن
لە سۆراغی راستی دەچن

würges – deutschland
06-05- 2021

Previous
Next
Kurdish