Skip to Content

تۆ لە خەونی مندا.. شیعر: ستیڤان شەمزینی

تۆ لە خەونی مندا.. شیعر: ستیڤان شەمزینی

Closed
by May 8, 2021 General, Poems

دوێنێ شەو خەونێکی خۆشم پێوە بینیت
لە خەونمدا تۆ بوبیتە گوڵی ناو گوڵدانی دڵم


لە خەونما تۆ قوم قوم شەرابی لێوی منت ئەنۆشی
منیش ئۆکسجینی هەناسەتم بە تاسەوە هەڵدەمژی


لە خەونمدا تۆ ماچە بێ کۆتاکانی منت ئەژمارد
منیش تریفەی ڕژاوی لەززەتم کۆ ئەکردەوە


لە خەونمدا تۆ دەستی حەزەکانت خستە ناو مێرگی لەشم
منیش لە دەریای خۆزگەکانما وەک بەلەمێک نغرۆم کردی


لە خەونمدا
تۆ بە پەنجەی میهرەبانی ختوکەی پیاوێتیت دەدام
منیش لەنێو چیمەنی قژتدا بەدوای ژنێتیتا وێڵ بووم


لە خەونما
ئاوی ژنێتی خۆت لەسەر جەستەم دڵۆپ دڵۆپ رژاند
منیش هەستی خۆمم وەک نیگارێک لەسەر رۆحت نەخشاند


لە خەونما
توند توند دەستت گرتم بەرەو بەهەشتی لەشی نەرمت
منیش بەوپەڕی دڵخۆشییەوە ئاگری دۆزەخم لە خۆم ئەتەکاند


لە خەونما
تۆ سەری ئاواتت خستبووە سەر شانی ماندووم
منیش یەک یەک ترپەکانی دڵتم ئەنووسییەوە


لە خەونما
تۆ لە بەهەشتەوە بە راکردن بەرەو ئامێزی من ئەهاتی
منیش لە دوورگەی خەیاڵەوە بەرەو دنیای تۆ ئەپەڕیمەوە


لە خەونما
سەیری یەکترمان ئەکرد، بە موزیکی بێدەنگی یەکمان ئەدواند
بە ماچێ رۆژووی بێدەنگیمان بۆ هەزارانی ماچی تر شکاند


لە خەونما
بەزمانی دەریا قسەمان ئەکرد و شیعرمان بۆ شەپۆل ئەنووسی
سەحرای لێوەکانمان شەڵاڵ ئەبوون لە تامی لیمۆی بەیەک گەیشتن


لە خەونما
ماچێکت پێ بەخشیم تەڕتر لە باران، سەوزتر لە لە سیمای بەهار
گەرمتر لە پشکۆ و روونتر لە ئاو و رووناکتر لە زەردەخەنەی هەتاو


لە خەونما
تریفەی مانگت ئەخوێندەوە و منیش راڤەی کزەبام بۆ ئەکردیت
بووبیتە ئیلاهەی جوانی و ئەوین، بەتاسەوە کڕنووشم بۆ ئەبردیت

22-12-2016
کەنار رووباری راین

Previous
Next