Skip to Content

مۆسیقا یاوەری شاعیرێکی خەمبارە.. ستیڤان شەمزینی

مۆسیقا یاوەری شاعیرێکی خەمبارە.. ستیڤان شەمزینی

Closed
by May 11, 2021 General, Poems

مۆسیقا “با”یەکی دڵسووتاوە
بە کوڵ بۆ شاعیرێک ئەگری و
عەشق کانییەکە لە تریفە
وەک بت مانگی تابان ئەپەرستێ
منیش لە یەک کاتدا هەم ژێی مۆسیقا
هەم کانیاوی عەشقم
دەمم پڕە لە قسە کە بە شیعر ناوترێ
ئەیدەمە دەست موزیک
سەرم پڕە لە غەم بە زار دەرنابڕدرێ
ئەیدەمە دەست موزیک
مۆسیقاش گۆزەیەکە بەسەر شانی فریشتەیەکەوە
تک تک ئاواز و خەمگینی لێ ئەڕژێتە
سەر ئەو زەویەی مرۆڤ بە ئاگری گوناه و
تاوان کردوویەتی بە سوتماک
مۆسیقا مامۆستای شاعیرێکی خۆکوژە
کە شمشێری سامورای رۆژگار چەقییە نێو دڵی و
لە نێو مێرگوزاری شیعردا بە خاکیان سپارد
تا ئێستاش
وردە نۆتەی غەمگینی لەنێو کفنەکەیدا ماوە،
ئەو شاعیرەی دڵی بەسەر تەنافی رزیوی
سێرگی ژیانەوە ئەڕۆیشت
لەناکاو بەربووە نێو شانۆی غەمەوە
لە سپێدەیەکی زوودا
لە خەونی خۆشبەختی راچڵەکێنرا و
بە زنجیرکراویی فڕێیاندایە
بیابانی کاکی بەکاکی تەنهاییەوە
مۆسیقا غەمبارە
وەک ئەو شاعیرە خەیاڵییەی
لە زەمەنی مۆمیاکردنی دڵ و
رەوانەکردنی عەشق بۆ مۆزەخانە
بەسەر پشتی پەلکەزێڕینەوە
ئەسپی هەتاوی زین ئەکرد
لە چاوتروکاندنێکدا
سروشتی ئەخستە نێو فۆتۆیەکەوە
چەرچەفی ئەدا
بەسەر زامی قووڵی جەستەی هەلاهەلابووی خۆی
کە نینۆکی تیژی دڵشکان
لە هەموو لایەکەوە کون کونی کردبوو
ئەو شاعیرەی
لە هەسارەیەکی دوورەوە هاتبووە ئێرە و
خورپەی ئەخستە
دڵی ئەو زریانە کوێرانەی
موچڕکە خۆشەکانی عەشقیان
بەرەو دۆڵی دابڕان رائەماڵی
مۆسیقا دەفتەرێکی پرتەقاڵی دەستی شاعیرێکە
کە هەردەم دەگریێ و
کەس جۆگەی فرمێسکەکانی نابینێت
هەردەم ناڵە و هاواریەتی
هیچ کەس دادوبێدادی نابیستێ
هەردەم غەم ئەنووسێت
کەسێک نییە دڵۆپێک شادی پێبەخشێ
هەردەم ئەسووتێ
کەسێک نەهات بیخاتە ژێر بارانی خۆیەوە
هەردەم باخچەکان ئاو ئەدا
باخەوانێک گوڵێکی پێشکەش نەکرد
هەردەم ژان و ئازار ئەنۆشێ
حەکیمێک نەبوو دەردی دەرمان بکا
هەردەم بێدارە
هیچ مەیخانەیەک
تۆسقاڵێ سەرمەستی پێنەدا
هەردەم ئاشقە
هیچ مەعشووقێک
بێنازییەکەی هەڵنەگرتووە
هەردەم بانگەوازیەتی
کەس کەس لێی تێناگات جگە لە موزیک
هەردەم بە دوای هاوڕێیەکا ئەگەڕێ
کەس هاوەڵی نییە جگە لە موزیک
مۆسیقا خەمگینی شاعیرێکە
کە چاوەکانی رووباری گریانن
ژیان دڵڕەقی زۆرپ لەگەڵ کردووە
مردن هەمیشە لەسەر رێی وەستاوە
خۆشیی هەموو کات خۆی لێ ئەشارێتەوە و
غەم ئەیخواتەوە
عەشقیش تەنیا ئازارێکە بۆی
فیراق هەموو وەرزێک ئەیدورێتەوە
پێکەنین قوورگی ئەسووتێنێ
گریان دەستی لە یەخەی نابێتەوە
شامپانیای بێزاریی ئەخواتەوە و
خەوی ناڕەحەتی ئەیباتەوە
دەمی خستۆتە نێو دەمی مەراق
لێوی بە سووتان فێنک ئەبێتەوە
مۆسیقا هاوڕێیەکی میهرەبانی شاعیرێکی خەمبارە
تاریکی شەوەکان
لە خوێناویی دیوانێکدا ئەیگەوزێنن و
سەرمای تەنهایی
لە پێخەفی شەقامێکی رووتەڵەی ئەپێچن
بایەقووشی مەرگ
رۆژی هەزار جار
لەسەر رۆحی ئەخوێنێ
هەزارەها شیعر
بە نەگووتراویی لە دوای بەجێ ئەمێنێ
کۆترەکان
لە وەرزی کۆچ
بەرەو باکوور جێیدەهێڵن و
گێژەڵووکەی بێهودەیی
بەرەو عەدەم رایدەپێچێ
مۆسیقا هاوڕێی شەوان و
خەمخۆری رۆژانی شاعیرێکە
لە وشکی بیابانی ژیان
دڵێکی تەڕ تەڕی لە خۆیدا دۆزییەوە
لە ماتەمینی وەرینی گەڵاکان
سەمایەکی نوێی بۆ ژیان داهێنا
لە سکوون و کپیدا
زایەڵەیەکی جاویدانی بە ئاگاهێنایەوە
لە کۆتایی دێڕە شیعرێکدا
سەرەتای ئاوازێکی نەمری ژەنی
لە سەرەتای وشکەڵانیدا
کۆتایی بە بارانێکی هەمیشەیی هێنا
لە چاوی دلبەرەکەیدا

ستیڤان شەمزینی
ستۆکهۆلم – سۆلنا

Previous
Next