پێغهمبهرێکی منداڵ … هیوا سهعید
لهبهرئهوهی سیاسهت له پانتایی بچوک بچوکی ئایدیۆلۆژی، نهتهوهیی، ئایینی ئێمهی خستۆته بهرهی دژبهیهک و لێکی دابڕیوین، بۆیه یهکێک له ئهرکهکانی هونهر ئهوهیه به یهکترمان بکاته دۆست و ئاشنامان بکاتهوه، ههرچهنده ئهو بیرکردنهوه جوانه بچێته خانهی خهیاڵهوه، ڕهتکردنهوهی ئهو جوانییه ڕهوایهتی دانه به ناشیرینی، لێرهوهیه ئهو ئهدهب و هونهرهی دهکهوێته دهرهوهی ئایدیۆلۆژیا بۆ ئهوهی ڕهوایهتی نهدا بهو ناشیریینییه ئیش لهسهر خهیاڵه جوانهکه دهکا، چونکه له دواجار ئهوهی کێشهی ههیه و پێویسته بهسهر بکرێتهوه تهنیا مرۆڤه، ئینجا ئهو مرۆڤه سهر به ئایین و نهتهوهی سهردهسته یان ژێردهسته بێ.
لهلای سینهماکاره گهورهکانی جیهان هونهر چهکێک نییه بۆ لێدان له نهتهوه و ئایینێکی تر به مهبهستی بهرگری له نهتهوه و ئایینهکانی خۆیان، له هیچ بهرههمێکی پییهر پاۆلۆ پازۆلینی و ئهندرێ تارکۆڤسکی کاری لهم شێوهیه نابینرێت. ئهگهر وابێ ئهوان وهکو سینهماکارێک له جیهانیبون دهکهون و هونهرهکهیان دهبێته هونهرێکی لۆکاڵی.
به پێچهوانهوه مهجید مهجیدی یهکێکه لهو سینهماکارانهی له بهرههمهکانیدا هونهر دهخاته خزمهت ئایدیۆلۆژیا و مهزههبگهرییهوه، وهکو ئێرانییهکی سهر به ویلایهتی فهقێ و شیعه مهزههبێک ههمیشه له شهڕی نهیارهکانیدایه، ئهو نهیاره جارێک خۆی له ئایدیۆلۆژیایهکی وهک مارکسیزم دهبینێتهوه که له فیلمی باران وێرانبونی ئهفغانستان ئهوهندهی به خهتای سوپای سۆڤییهت دهزانێ به خهتای تاڵیبانی نازانێ، یان له دواترین بهرههمی بهناوی )محهمهد پهیامبهری خوا( شهڕی ئیسلامی سوننی دهکات.
له فیلمه بهناوبانگهکهی مستهفا عهقاد بهناونیشانی )پهیامی ئیسلام( که ئهو فیلمهیان جێگای ڕهزامهندی مهزههبی سوننهیه، پێغهمبهر له سهروی تهمهنی چل ساڵیدایه و به شهڕهکانی بهدر و ئوحد خهریکی گهیاندنی پهیامهکهیهتی، واتا لهو فیلمهدا پێغهمبهرێکی شهڕکهر و پهیامێکی توندوتیژت بهرچاودهکهوێ، کهچی لهو بهرههمهی مهجیدی بهس ژیانی منداڵی بهر له پێغهمبهرایهتی محهمهد دهبینی، منداڵێکی نهرمونیانی فریشتهئاسا دوای ئهوهی بێ باوک کهوتوه مامی لهخۆی دهگرێ، ئهو مامهش ئهبولهههب نییه، ههمزه نییه، ئهبوتاڵیبه.
پڕکردنهوهی تهواوی فیلمهکه به ژیانی منداڵی پێغهمبهرلهبهر گێڕانهوهی سهردهمی منداڵی ئهو نییه، بهڵکو منداڵ ئاماژهیه بۆ پاکی و بهرائهت، گهڕانهوهی مهجیدی لهبری شهڕانگێزی بهدر و ئوحد بۆ ئهو تهمهنه لهپێناو بهفریشتهکردن یان ڕاستر بۆ بهعیساکردنی پێغهمبهر محهمهده، ههتا لهگهڵ ئهو دنیابینییه سۆفییانهی ئێران برهوی پێدهدا دژ به مۆدێرنه و شارستانییهتی خۆرئاوایی یهکبگرێتهوه.
له ههمان کات ئێران وهک کۆمهڵگایهکی جێگیری کستوکاڵی بۆ جیاکردنهوهی شارستانییهتهکهی له بهرانبهر بیابانشینهکانی دورگهی عهرهبی و کلتوری هێرش و بهتاڵانبردن که دواتر له ئیسلامدا له فتوحات و غهزو تهرجهمه دهبێتهوه خۆی دور بگرێ.
له ههمووی گرنگتر بۆ ڕۆڵی ئهبوتاڵیبه له پهنادان و لهخۆگرتنی ئهو پێغهمبهره منداڵه، دهیهوێ ئهوه نیشانبدا سهرکهوتن و گهیشتنی پهیامهکهی بۆ ئهبوتاڵیبی باوکی ئیمامی عهلی و باپیری حهسهن و حوسێن دهگهڕێتهوه. ئهوهش بۆ هێشتنهوهی ئهو شیعهیهی ئهمڕۆ ئێران ڕابهرایهتی دهکا، به بیانوی ئیسلامبونهوه نهکهوێته بن قهڵمڕهوی عهرهب و ئیسلامی سوننییهوه. به مانای ئهوهی سهرهتا بۆ خزمهتی شیعهگهرایی، له کۆتایی مهزههبی شیعه وهک کهرهستهیهک بۆ پاراستنی شوناسی ئێران.
