دوایین غەزەلی ماڵئاوایی.. شیعر: ستیڤان شەمزینی
من کە بە خەندەیەک ئەمرم
تۆ بۆ بە فرمێسک ئەمکوژی؟
من کە بۆ شەوقی مۆمێک ئەمرم
بۆ لە تاریکترین شەودا ئەمکوژی؟
من کە بۆ تیشکی هەتاو ئەمرم
بۆ بەشاردنەوەی مانگی تابان ئەمکوژی؟
من کە بە وشەیەکی زبر ئەمرم
تۆ بۆ بە قاموسێک لە دڵڕەقی ئەمکوژی؟
من کە بۆ مشتێ ئاو ئەمرم
بۆ بە تینوێتی لە سەحرای دڵتا ئەمکوژی؟
من کە بە پەڕی باڵی فریشتەیەک ئەمرم
بۆ بە چەقۆی کولی ئەهریمەن ئەمکوژی؟
من کە بۆ خەونێکی کریستاڵی ئەمرم
تۆ بۆ لە بۆتەی کابووسدا ئەمکوژی؟
من کە بە نیگایەکی گەرم ئەمرم
تۆ بۆ لە بەستەڵەکی غەریبیدا ئەمکوژی؟
من کە لەنێو حەشاماتی خەڵکدا ئەمرم
بۆ لە کونجی تەنیاییدا ئەمکوژی؟
من کە لە ساتی تەماشای پەلکەزێڕینەدا ئەمرم
بۆ بە هەورە بروسکەی دابڕان ئەمکوژی؟
من کە بە تنۆکێک باران ئەمرم
تۆ بۆ بە رەهێڵە و بۆران ئەمکوژی؟
من کە بە دەنگی ناسکی موزیک ئەمرم
بۆ بە ژاوەژاوی دەمی رۆیشتن ئەمکوژی؟
من کە بە گۆرانییەکی شاد ئەمرم
تۆ بۆ بە سروودی دڵتەنگیی ئەمکوژی؟
من کە بە شەکراوی ماچێک ئەمرم
تۆ بۆ بە قاوەی تاڵی تووڕەیی ئەمکوژی؟
من کە بۆ دڵۆپێک ئاوی چاوەکانت ئەمرم
بۆ لە نێو ئاگردانی بێزارییدا ئەمکوژی؟
من کە بە شیعرێکى رۆمانتیک ئەمرم
تۆ بۆ بە قەسیدەی فیراق ئەمکوژی؟
من کە لەنێو تەمی یادەوەرییدا ئەمرم
تۆ بۆ بە گریانی ئایندە ئەمکوژی؟
من کە لە پێناوی جوانیتدا ئەمرم
تۆ بۆ لە مەنفای هەستەکانتا ئەمکوژی؟
من کە بۆ چرکەیەک خۆشی لەگەڵتا ئەمرم
بۆ لە دەریاچەی غەم و ناسۆردا ئەمکوژی؟
من کە بە شنەبایەکی رۆژهەڵات ئەمرم
تۆ بۆ بە گڕ و دوکەڵی باشوور ئەمکوژی؟
من کە بۆ دیدارێکت لە کۆڵانی پەروانەکان ئەمرم
تۆ بۆ بە خنکاندنی ئارەزووەکانم ئەمکوژی؟
من کە لە دەمی نووسینی چامەی عەشقا ئەمرم
تۆ بۆ بە دوایین غەزەلی ماڵئاوایی ئەمکوژی؟
ئەڵمانیا – کۆڵن
کەنار رووباری راین – یونی 2017
