پرۆژەی نوێی بەھمەن قوبادی بۆ منداڵانی کورد بە ناوی “منداڵانی ھەتاو”
تاران ٢٨ دیسەمبەر (ZNA) ـ “بەھمەن قوبادی” پرۆژەی نوێی بە ناوی “منداڵانی ھەتاو” پێشکه‌ش به منداڵانی کورد له شوێنه جۆراوجۆره‌کانی کوردستان کرد.
کۆمپانی “مژ فیلم” به به‌رپرسیاریی سینه‌ماکاریی کورد “بەھمەن قوبادی” پرۆژەیەکی نوێی بۆ یارمەتی منداڵانی کورد بە ناوی “منداڵانی ھەتاو” رێکخستووە، لە چوارەچێوەی ئەم پرۆژەیەدا زیاتر لە 240 جۆر ھۆنراوە و چیرۆک و شیعری کوردیی بۆ منداڵان بەرھەمھاتووە کە بێبەرامبەر بە سەر منداڵاندا دابەشدەکرێت.
“بەھمەن قوبادی” دەرھێنەری ناوداری سینەما ئاماژەی پێکردووە بە ھۆی کەمبوونی بابەتی شێعر و چیرۆکی تایبەت بە منداڵان بە زمانی کوردیی بڕیاریداوە گروپێک بۆ کۆکردنەوە و بەرھەمھێنانی ھۆنراوە و چیرۆکی شادی منداڵان پێکبھێنێت و کۆمەڵێک بابەت بۆ منداڵان بەرھەمبھێ
.
ئەم گروپە چەندین کەسی بەتوانای شاعیر، نووسەر، دەرووناسی، وەرگێر و شارەزای مۆسیقای لەخۆگرتووە کە ھەموویان لە لایەن بەھمەن قوبادییەوە ھەڵبژێردروان و دواتر دەستیان بە بەرھەمھێنان کردووە کە تا ئێستا ئەم بەرھەمانەی ئامادەیان کردووە زۆرتر لە 120 ھۆنراوە و 120 چیرۆکی تایبەت بە منداڵان کە بابەتی پەروەردەیی و کۆمەڵایەتی تێیدا رێکخستراوە و بە شێوەی گۆڕانی و بابەتی شاد له‌گه‌ڵ مۆسیقا ئامادە کراوە، شایانی باسە ئەم پرۆژەیە تەنیا ئەم 240 بەرھەمە لە خۆ ناگرێت و لە داھاتوودا چەندین پاکەیجی دیکه لە درێژەی ئەو ئامانجانەمان ئامادە و بڵاودەکرێته‌وه.
یەکێک لە ئامانجەکانی ئەم پرۆژەیە پێکھێنانی باروودۆخێکی شاد لە دەروونی منداڵانی کورد و گەڕانەوەیان بۆ دونیای منداڵی خۆیانە، بەتایبەت بۆ ئەو منداڵانەی لە ناوچە جەنگییەکان و ھەژارنشینەکان (ئەم گوند و ناوچانەی دوورن لە خزمەتگوزاری) دەژین، ئامانجمانە ئەم بەرھەمانە بە دوورترین شوێن، ناوچە بێ خزمەتگوزارییەکان و منداڵانی گوندنشین و پەراوێزخراو بگات و لە ئامانجەکانی دیکه‌ی ئەم پرۆژەیە قەرەبووی کەمی ھۆنراوە و چیرۆکی شادی تایبەت بە منداڵانە بە زمانی کوردی و ئەم پرۆژەیە دەستپێکێکی باشە بۆ پڕکردنەوەی ئەم بۆشاییە.
ھیوادارین ئەم پرۆژەیە بارودۆخێکی لەبار دروست بکات تا منداڵانی کورد لەگەڵ ھۆنراوە و چیرۆکی کوردی ئاشنا بن و ئەم پرۆژەیە رۆژێک ھیندە بەربڵاو بێت و گەشە بکات کە بزووتنەوەیەکی فەرھەنگی و پەروەردەیی بۆ منداڵانی کوردستان دروست ببێت.
بەھەمەن قوبادی لە پەیوەندی لەگەڵ ئەم بابەتە ئاماژەی پێکرد: داوا لە ھەموو ئەو کەسانە دەکەم کە لە ھەر پلە و پۆست و پیشەیەکدا خزمەت دەکەن بەتایبەت ئەو کەسانەی لە گوندە دوورەکان مامۆستا و یا پزیشک و یا خود بە ھەر ناونیشانیکی دیکه‌ن … و ھەروەھا ئەو کەسانەی لە کەمپەکان لەگەڵ ئاوارەکان پەیوەندییان ھەیە و خزمەتگوزارییان پێشکەش دەکەن لەم پرۆژەیەدا بەشداربن و بۆ بەڵاوکردنەوەی ئەم بەرھەمانە بە ھەر شێوەیەک کە بۆیان گونجاوە یارمەتی بدەن و کۆپی بکەن و بەدەست منداڵانی بگەیەنن.
سینه‌ماکاریی کورد بەھمەن قوبادی له کۆتاییدا وتی دەستی ھەموویان ماچ دەکەم و مایەی خۆشحاڵیمە.
ھەروەھا جێگەی ئاماژەیە ئەم پرۆژەیە بە بێ پشتگیریی مادی یا مەعنەویی ھیچ لایەنێکی کەرتی تایبەت و حکوومی تا ئێستا لەسەر ئەرکی “بەھمەن قوبادی” بەڕێوەچووە و بۆ زانیاری زیاتر دەتوانن لەتۆڕە کۆمەڵایەتییه‌کانی فەیسبوک و ئینستاگرام بە ناوی “بەھمەن قوبادی” و یا لە ماڵپەڕی www.mindalan.com بکەن.
ئەو کۆمەڵە بەرھەمەی کە ئاماژەی پێکرا لە ماڵپەری تایبەت بە “منداڵانی ھەتاو” بە ناو و نیشانی www.mindalan.com و لە پەیجە فەرمییەکانی “بەھمەن قوبادی” لە سۆشیال میدیا (فەیسبووک، ئینستاگرام، تێلێگرام) ھەر ھەفتە (5 گۆرانی و 5 چیرۆک) بڵاودەبێتەوە کە ھەموو میدیایەک و ھەر کەسێک بە بێ بەرامبەر دەتوانێت داونلۆدی بکات و دوبارە بە ھەر شێوەیەک بینراو، بیستراو و یا چاپکراو بڵاوی بکاتەوە، بۆ پەیوەندی کردن لەگەڵ بەڕێوەبەرانی پرۆژەی “منداڵانی ھەتاو” خاتوو “گوڵریز ئێحتیاتی” و خاتوو “روناک فەرەجی” دەتوانن پەیوەندیی بە ئادرێس ئیمەیلی mindalani.hataw@gmail.com بکەن.
مەنسوور جیهانی
Dengekan
دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.
