دوو شیعر … سمکۆ ئەحمەد
جێ پێکانی مەکوژێننەوە
ئەو مناڵە حەزی لە چاوشارکێ یە
لە خەنەکی سلیمانی پالاسا
فیری وانەکانی عەشق بووە
مناڵە بیدەنگەکەی مەکتەبی ئەردەڵان
گەورە بوو نەك دوو دار
سێ جەنگیشی بینی
لە نێو تۆزو خۆڵەمێشی جەنگەکاندا
وێڵ بوو بەدوای گوڵی شین دا دەگەڕا
قوتابیەکی یافیع بوو
سەوزی لە بەهار دەردەکرد و
چاوی لە زەڵم جێ مابوو
جێ پێکانی مەکوژێننەوە
چی کۆڵان و گردۆڵکەی ئەم شارەیە
شەوانە گوێبیستی شیعرە مەستەکانی ئەون
چی باخچەو داری مل رووتە
چاوەڕێی دوا کۆپلەی ئەون
کێ ئەیووت عیرفان ؟
حەسیب ساڵح و خەنەکی یاری مناڵیت
دوا مەنزڵگەی ووشەکانت بن؟
ئەوانە کوا لە خەمی ئاسك و
گوڵەکانی لا ڕی دەگەن
عیرفان کە گەڕامەوە ئەمجارە
نەمدۆزیتەوە
ژێر گوڵە دەمەشێرەکانی حەووشەکەش گەڕام بۆت
نەمبینیتەوە
تەنها دار هەنارەکان بۆنی جارانیان لێدەهات
ژێر پرچی سنەوبەرە حەزینەکەش گەڕام بۆت
نەمدۆزیتەوە
شیعرە هەتیوەکانت بە فرمێسك
دێرەکانی خۆیان تەواو دەکرد
پوورەی هەنگی بیرەوەریم درزی بردو
هەنگەکانی بۆ شیللەی وووشەکانت
هانایان برد
تکام کرد لە باران جێ پێکانت لە کوچەو کۆلانەکانی شاردا نەکوژێنیتەوە
تۆ بڕۆو ئاوڕ مەدەرەوە
ئەم شارە زۆر تەسك بووە
چیتر جێگات ناکاتەوە
کات بۆ ماڵئاواییەکیش نەماوە
وەك ڕیشۆڵەکانی سلێمانی
بێ ئاوڕدانەوە بڕۆ
خۆت و پێکە شەرابەکەت
وا بایەکی وەشت بردی
خۆت ووتەنی پیاو بە مەستی جوانە
بۆیە تۆش بە جوانی مردی؟
————–
گەڕانەوە
وەرزەکان
هاتن و چوون
باڵندکان بە گژ ساڵەکاندا
فڕین و چوون
کەمەری نەمامەکانی
کەکاتی خۆی
بەکەمەری تۆ دەچون
ئیستا پیرو ئەستوور بوون و
لە ڕقی زەمانە ئەچن ..
ئەوانیش لەگەڵ خەون و تۆدا
بۆئەبەد چوون
وا سی و سێ ساڵ رابووردوە
بەسەر چوونم
گەڕامەوە ئازیزەکەم
بۆ کۆڵانی مناڵیمان
ئەو پەنجەرەی شەوانی هاوین
چکلێتم بۆ تێ دەگرتی
ئیستا قفڵێکی تۆزاوی شکاوە
لە قفڵی گۆڕەکەی دایکم دەچێ
ئەوانیش چوون
چوون …..چوون
هەبوون ….نەبوون
*****
ئیستاش ئەم کۆڵانە
بۆنی قاقای پیکەنینی
شەوانی سەربانی
تۆی لێ دێ
ئیستاش ئەم دارانە
بۆنی ماچی پایزانی
سی و سێ ساڵ
پێش ئیستای لێ دێ
هیچ شتێك لە جاران ناچێ
گلێنەی چاوی من نەبێ
هیچ شتی لە تۆ ناچێ
دارهەنجیرەکەی حەوشە نەبێ
کە دایم ئەمووت
ماچی شیلەی هەنجیری ئەو
هێندەی ماچی لێوی تۆ
شیرین نابێ
هەموی چوون و چوون
بۆنی گەردنی تۆ نەبێ
هەموو شەوێ ئەمخەوێنێ
ئەبێ تۆش وەکو من
چ کیشوەرێك قووتی دابێ ؟
یان ژنێکی پیری ئەو بازاڕەیت و
خۆتت لێم حەشار دابێ؟
ناتەوێ پیری خۆتم نیشان بدەی
تا خەونەکان وەکو جاران
لە شوێن خۆیان بخەوێنی
ئازیزەکەم
ئیستا ژیانێکی بێ خەون ئەژیم
تەنها خەونێك بوونی مابێ
گەڕانەوەی دووچرکەش بێ
لەوزەمەنا
هێندە بەش کات کە پێت بڵێم
دوای تۆ گوڵم زۆر کەسم ناسی
بەس هیچ کەسیان هێندەی تۆ
چرپەی دڵمی نەدەناسی ..!
سمکۆ ۲٠۱٦
Dengekan
دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.
