Skip to Content

زەنگیانەی ئاویی … فەتاح حەسەن

زەنگیانەی ئاویی … فەتاح حەسەن

Closed
by كانونی یه‌كه‌م 29, 2016 Poems

( رستی یەکەم )

( بسك )
ئەوساتەی کە:
دەڕوانیتە شەپۆلەکانی دەریایەك
کە، چۆن یەکتر دەخۆنەوە..
من، دەڕوانمە تیشکی خۆر
کە، چۆن سەما بە بسکت دەکا.
ئەی نازانی!
تاڵ تاڵی بسکی تۆ خانم
بۆ من شەپۆلی دەریایە.
( قەرز )
لە فەرهەنگی تۆدا
وشەی پێکەنین نەبوو
ئەمن فێری پێکەنینم کردی.
فێری فڕینم کردی و
پێش نیشتنەوەت،
چۆن باڵ وەردەیتە ئاوی کانییەك
رونتر لە چاوی قرژاڵ.
فێرمکردی
چۆن گوڵ بڕوێنیت لەجێی زام.
قەرزارمی ..
ئەمشەو قەرزەکانم دەوێتەوە
لەجێی گشت قەرزەکان
ماچم دەوێ .. ماچ.
( شەکەت )
ماندوبووم، هێندە پەنجەرەم
بەڕوی خەڵکیدا کردەوە
واوەیلا لە حاڵم،
لەم تاریکستانەدا
کەسێك نییە کڵاوڕۆژنەیەك
بەڕوی ئەم دڵە تەنگەمدا .. بکاتەوە.
( گەردون )
بزانە گەردون
چەندە دۆستمە !!
لە شەوی تاریك و نوتەکا
پریاسکەی خەمەکانم ونکەم
دەیکاتە رۆژی روناك و
بە پۆستەچی
پریاسکەکە
دەخاتەوە نێو سندوقی دڵم .
( شاگرد )
خەمی دڵی من
بە شیعر و چیرۆك ناڕەوێ
وشە بڵێ چی؟؟
نالی و مەحوی شاگردم بن
ئەمن ئەمڕۆ، نازانم
بڵێم چی؟!
( تەنها )
ئەمشەو
شەو، بە تەنها بەڕێدەکەم.
تا تەنیایی
جاڕس نەبێت بە تەنهایی.
تا تەنیایی، هاوڕێی من بێت
من تەنها نیم.
بەفیدات بم ئەی تەنیایی
کە تۆ لە من جاڕس نابی.

فەتاح حەسەن
دانیمارك/ ڤالبی

mm

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.

Previous
Next