عەشق سەرەتایە.. ستیڤان شەمزینی
ئەمەوێ بە هێمنی و
بە زمانێکی رەوان بە گوێتا بچرپێنم
رۆژەکان کۆتایی شەوەکانن
شەوەکانیش کۆتایی رۆژەکان
باران کۆتایی حەسرەتاویی هەورەکانە و
هەورەکانیش کۆتایی
هاڵاوی دڵی دەریاکانن
شاخ دوا هەنگاو و کۆتایی دەشتە
دەشتیش کۆتایی گردەکان
ئاسمان کۆتایی زەوییە
زەویش کۆتایی ئاسمان،
ئای کە سەیرە!
جادووەکە ئەوەیە عەشق هەردەم سەرەتایە!
ئەمەوێ بە ئەسپایی بە گوێتا بچرپێنم
کۆتایی هیچ شتێک نییە و
هیچ شتێکیش کۆتایی پێ نایێ
فرمێسک کۆتایی زەردەخەنەیە
خەندەش کۆتایی ئەسرین
ژیان کۆتایی نەبوونە و
مردنیش کۆتایی هەبوون
رووناکی کۆتایی تاریکییە
تاریکیش کۆتایی تیشک
رەشەبا کۆتایی ئارامیی سروشتە
سروشتیش کۆتایی عەدەم
شەپۆل کۆتایی تووڕەیی زەریایە
زەریاش کۆتایی وشکانی
کەچی گیانی گیانم
جادووەکە لەوەدایە عەشق هەمیشە سەرەتایە
ئەمەوێ بە دەنگێکی نەرمتر لە سمفۆنی
بە گوێتا بچرپێنم
شادیی کۆتایی ناخۆشییەکانە
ناخۆشیش کۆتایی خۆشی
ئازادیی کۆتایی کۆیلایەتییە
کۆیلایەتیش کۆتایی خەونی ئازادیی
ماندووێتی کۆتایی حەسانەوەیە
حەسانەوەش کۆتایی رەنجدانە
ئازار کۆتایی ئاسوودەییە
ئاسوودەیش کۆتایی ژان و ئێش
نیگەرانیی کۆتایی گەشبینییە
گەشبینیش کۆتایی نائومێدیی
خەون کۆتایی واقیعە و
واقیعیش کۆتایی هەموو خەونەکان،
بەڵام نهێنییە گەورەکە لێرەدایە
عەشق بەردەوام سەرەتایە
درەخت کۆتایی نەمامە
نەمامیش کۆتایی لقی درەختێکی تر
باخچە کۆتایی بێروونە و
بێروونیش کۆتایی پڕ حەژمەتی ئاو
چیمەن کۆتایی دارستانە
دارستانیش کۆتایی رووتەڵان
کورسی کۆتایی پادشاکانە
پادشاکانیش کۆتایی رەوشت
پەنجەرە کۆتایی ئاسۆ روونەکانە
ئاسۆی روونیش کۆتایی شەوەزەنگ
ببینە تەڵیسمەکە هەر لێرەدایە
عەشق هەمیشە هەر سەرەتایە
ئەمەوێ بەدەنگێکی تەژی کەسەرەوە
بچرپێنم بە گوێتا
روانین کۆتایی چاوداخستنە
چاوداخستنیش کۆتایی بیرکردنەوە
وتن کۆتایی بێدەنگییە
بێدەنگیش کۆتایی قسەکردن
گوڵدان دوا ژوانگەی گوڵە
گوڵیش دوا ئاوازی باخچە
شەراب دوا فرمێسکی ترێیە
ترێش دوا مرواری رەز
لە بیری مەکە گیانی گیانم
عەشق هەمیشە هەر سەرەتایە
ئەمەوێ بە دەنگێکی غەریبانەوە
بچرپێنم بە گوێتا
گوومان کۆتایی یەقینە
یەقینیش کۆتایی پرسیارە
پرسیار کۆتایی وەڵامە
وەڵامیش کۆتایی پرسیارێکی تر
هەڵوەرین کۆتایی چرۆکردنە
چرۆکردنیش کۆتایی هەڵوەرینێکی تر
ئاوێنە کۆتایی روانینە
روانینیش کۆتایی تەمەنی ئاوێنە
پەرستگا کۆتایی خودایە
خوداش کۆتایی ئەقڵە
“هیچ” کۆتایی هەموو شتێکە و
هەموو شتێکیش کۆتایی “هیچ”ە
گیانی گیانم سەیرەکە لەوەدایە
هەمیشە عەشق سەرەتایە!
عەشق سەرەتای بێ کۆتایی و
بێ بڕانەوەی هەموو شتێکە
27-5-2017
ئەڵمانیا
