Skip to Content

هێشوە ترێی ماچ.. شەماڵ بارەوانی

هێشوە ترێی ماچ.. شەماڵ بارەوانی

Closed
by August 22, 2021 General, Poems

تۆنەبیت
کێ بە ماچی دیدار
تینوێتی تاسەی تەماشام بشکێنێ

کێ لاولاوەی دڵی
لە ئامێزی درختی بەختم بئاڵانێ

کێ جانتای چاوەڕوانیم
پڕکات لە سێوی نیگا

تۆ نەبیت
کێ دوگمەی کراسی حەزم
بە پەنجەی تامەزرۆیی بکاتەوە

کێ باهۆزی بێزاری
لە شەقامی تەنیاییم ڕابماڵێ

کێ سەبەتەی ئشتیام
تەژی کات لە هێشوە ترێی ماچ

تۆ نەبیت
کێ تروسکەی مۆمی ئاسوودەیی
لە هەیوانی دەروونم داگیرسێنێت

کێ باڵندەی نازم
لە قەفەزی باڵای بگرێت

کێ قوڵاپی مەراقم
لەستیانی سۆزی ببەستێ

تۆنەبیت
کێ تابلۆی خەیاڵم پڕکات لە ڕەنگ

لەبەر ئاوێنەی کێ
قژی نیگەرانیەکانم شانەبکەم

بزەی هەنگی شادیم
بخەمە سەر خونچەی لێوی چ گوڵێک

لاپەڕەی یادەوەریەکانم
لەناو چ ئەلبومێک یاداشت کەم

تۆ نەبیت
پزیسکی کامە خۆر
بەستەڵەکی خەمەکانم بتوێنێتەوە

پەپوولەی کلوەبەفری خۆزگەم
لەسەر لووتکەی کامە کێو بنیشێتەوە

تەرمی دێڕەکانم
لەگۆڕستانی کامە دیوان بنێژم

کێ کڵپەی ئاگری ئاشتەگای نیگەرانیم خامۆشکا

کێ کەزی هۆنراوەی فرمێسەکەکانم بهۆنێتەوە

کێ بەدەم لایلایەی گریانەوە
بێشکەی ئیلهامم ڕاژەنێ و
کۆرپەی شیعرم بلاوێنێتەوە
..

Previous
Next