تێڵا.. پشکۆ ناکام
[[“بە چوونی بۆ کۆشک کەر نابێ بە پاشا ، بەڵکو کۆشک ئەبێ بە تەویلە..
“پەندێکی فارسی”]]
….. تۆ بزانە ئەو عەرەبە شۆڤینیە مەزهەبیانەی بەغا چی بە کورد ئەکەن و چۆن ڕێگرن لەبەردەم هەر هەنگاوێکی کوردایەتی و بونیادنانی دەوڵەتی کوردی..!! هەر کە زانیان هەرێم بەحاڵ و تۆزێکی ماوە هەر بەقەد دەزوویەکی ماوە ببێ بە دەوڵەت یەکسەر کەوتنە سەروگوێلاکی ئابووری سەربەخۆی کوردستان ، ئەوەبوو کە زانیان “ کۆڕەک تێلە کۆم” دەورێکی سەرەکی هەیە لە بوژانەوەی ئابووری هەرێم و ژێرخانەکەی بە تۆمەتی قەرزاری ڕایان گرتوە ، لە ڕاستیا هۆیە ئەسڵییەکە “ کوردبوون”! ی ئەو کۆمپانیایەیە کە هێندە پەرۆشی خزمەت کردنی خەڵکی کوردستانە بە تایبەتی کەس کاری ئەو ڕووبارە خوێنەی هەرێمیان دروست کرد ، ، تەنانەت چەن جارێک مووچەی ناردوە بۆ بەغا کە لەوێوە ڕەوانەی هەرێمی بکا تا دابەش بکرێ و بە بەغای ووتوە نەڵێت ئەو پارەیە هی کۆڕەکە کورد وەتەنی “ پیاوەتی بکە و بیە بەدەم نەوتەوە..” جگە لەوەش ئەو ڕیزە ئوتێلە چەن ئەستێرەییە کە خاوەندارێتی کۆڕەک لە ئەوروپا هەیەتی هەموو داهاتەکانی بۆ تەواو کردنی پرۆژەکانی هەرێمە و تەنانەت نیازی وابوو کارەبای بیست و شەش سەعاتی “ بیست و چواری ئەسڵی و دووی ئیحتیات “ بۆ هەرێم دابین بکا …
دەسەڵاتدارانی بەغا ویستوویانە سوود لە دروشمە سەرەکییەکەی خاوەندارێتی کۆمپانیاکە وەربگرێ کە بە :“ جەنەراڵی هەڵهاتن “ ناوبانگی هەیە بەڵکو ئەمە خوایە لەبەر قەرزارییەکەی دروشمەکەی “ مەخمور” دووبارە جێ بە جێ بکا و بۆی بقوچێنێ بەڵام لە بیریان چوە سەروەت و سامانی بێ شوماری کۆڕەک هەر هەمووی بە ئارەقی ناوچەوان و ماندوو بوونی شەو و ڕۆژ ، بە زستان و بە هاوین کۆکراوەتەوە بە ناوی خوا و ڕێبازی ڕەحمەتی و کوردایەتی زیندوو خزمەتی تاک بە تاکی کوردستانی کردوە و دوا ئامانجیشی دەوڵەتی کوردی بوە و چونکە دەوڵەتی بێ پارە وەک گیرفانی کون تێکراو وایە کۆڕەک ئەو کونەی گرت ناهێڵێ بەغا بە “درێل”یش کونی تێ بکاتەوە…مەگەر بە موعجیزەیەکی ئیلاهی و بەرامبەر بە قەزا قەدەریش کەس هیچی پێ ناکرێ…
با شۆڤینیەکانی بەغا و ئەودیویش بزانن کە تەنانەت ئەگەر کۆڕەک ناچار کرا بە یانەوەی ئەو ملیار و کسورە ئەوا چۆن حکومەتی هەرێم بە حیکمەتی خۆی قەرزەکانی بە مووچەی خەڵکی هەرێم ئەیاتەوەکە کەسیش نازانێ قەرزی چین ؟ هەر ئاواش بە مووچەی خەڵکی هەرێم قەرزەکەی کۆڕەک ئەدرێتەوە و هەر قەرزەکە تەواو بوو “ کۆماری دیموکراتی کۆڕەک” ڕائەگەینرێ و بۆ ناحەزانی کوردایەتی ئەبێ بە” کۆڕەک “تێڵا” کۆم”…….
