لە دوا دواییەکاندا.. شیعری نەوزاد بەندی
بەناو کۆڵانێکا ئەڕۆم ،
تۆی لێ بی و ..
تۆیشی لێ نەبی ..
ئاخر چونکە لە خۆم زیاتر ،
کەسی ترم پێ کۆڵ ناکرێ ..
ئەچمە غەزەلنووس ،
حەز ئەکەم تۆی لێ بی و ..
تۆیشی لێ نەبی ..
لە وێستگەی پاس ، کە نیمانە ..
له بەردەم ئاپۆڕەی گەشتیار ،
لە کەنار دەریا ..
لە بەردەم شەمەنەفەر ،
کە نیمانە ..
حەز ئەکەم تۆی لێ بی و
لەوێیش نەبی ..
ئەو عومره ڕۆی
کە ئەمووت :
( ڕۆژێک وەرە من لەوێم
یان تۆ لەوێ بە ، من دێم )
٭ ٭ ٭
بەیانی زوو ..
هەورێکی بەفراویی ،
ڕێی لێ تێک ئەچێ و ..
دێتە خاکی براکوژی و ..
خۆی تیا بەتاڵ ئەکاتەوە ..
دێمە دەرێ ..
وەک لە ماڵێکی غەریب بم ،
به شەرمەوە
تەماشای بەفر ئەکەم و ..
لە ڕووم نایەت
تۆپەڵێکی لێ هەڵگرم ..
ئەو عومرە ڕۆی ،
کە ئەمووت :
شەڕەتۆپەڵ خۆی هاتووە ،
دێی یان من بێم ؟
بڵێی لەگەڵ شەڕه تۆپەڵ ،
لە هەر کوێ بن ،
منیش لەوێم …
٭ ٭ ٭
وەک کۆتایی دراماکان ،
ئەکتەرەکان ماندوو بوون و ..
هەنگاو ئەنێن بێ ڕێ بڕین ..
قسە ئەکەن بێ دەربڕین ..
لەگەڵ یەکترن بێ بینین ..
حەز ئەکەم لە سەمونخانە ،
کە زۆرمان هەن ،
بتبینم و نەیشتبینم ..
لە چێشتخانە و دەرمانخانە و
تەلاری پزیشکیی و تاوەر ،
کە زۆرمان هەن ..
حەز ئەکەم تۆ بی و
تۆیش نەبی ..
ئاخر پڕ بووم و لێم ئەڕژێ ..
لە تەنیشت ڕۆژەکانمەوە ،
ئەڕۆم و ..
هانکە هانکێکیشم گوێ لێیه ،
ڕەنگە مردن بێ ، بێ قەسەب ،
خوێنم بمژێ ..
