Skip to Content

بۆ عەشقی تۆ ئەسوتێم.. قەسیدەی: ستیڤان شەمزینی

بۆ عەشقی تۆ ئەسوتێم.. قەسیدەی: ستیڤان شەمزینی

Closed
by August 22, 2021 General, Poems

ئەی گەرمتر لە ئاگر
من سوێندت بۆ ئەخۆم
بە شەوقی مۆم و
ناسکیی رۆحی پەپولە
بە ئایەتەکانی رەشەبا و
پێکەنینی گوڵ
بە حەرفەکانی باران و
باخچە شەرابییەکان
بە موچڕکەکانی عاتیفە و
درەختە چاو سەوزەکان
بە رەنگی تریفەیی زەمەن و
غەزەلە خومارییەکان
بە سروودەکانی ئەوین و
بە دەریا شەپۆلاوییەکانی شیعر
بە چاوە ماندووەکانی مێژوو و
بە جوگرافیا پرشنگدارەکانی دڵ
ئەم سووتانەم
تاوی گەرمی عەشقی تۆیە
ئەم سووتانەم
گڕی هەناسە گەرمەکانی تۆیە
سوێندت بۆ ئەخۆم
بە دەنگی زوڵاڵی شەپۆل و
ئامێزی سەوزی گیا
بە گۆرانییەکی بێزار و
نیگای سپی بەفر
بەو شیعرانەی نەمنووسیون و
بەو خوێنەی لە روانینمەوە دێ
ئەوەی رووناکی لە چاوم ئەدزێ
عەشقی تۆیە
ئەو ئاورینگەی لە رۆحم ئەڕژێ
دڵۆپی ئەو ماچانەیە
لە ئێوارەیەکی تەزیودا
هەناوی من داخ ئەکات
سوێندت بۆ ئەخۆم
بە کریستاڵی هەست و
رەنگی پەمەیی سۆز
بە دارستانی غەمەکان و
چیمەنەکانی تەنهایی
بە پێکە تاڵەکانی هەقیقەت و
خوێنی مەییوی بێدەنگی
بە خاچی نیگا تیشکاوییەکان و
کوژرانی ئەستێرەیەک
بەدەستی تاریکی
ئەوەی لە مندا وەک کانی هەڵدەقوڵێت
عەشقی تۆیە
ئەوەی لە مندا بۆ ئەبەد دەژی
ئەو خەونە ئاڵانەیە
من لەگەڵ تۆدا،
لەبن دارسنەوبەرەکانی قەدەردا
بە یەکتر دەگەیەنێ
سوێندت بۆ ئەخۆم
بە تنۆکە شینباوەکانی ئاو و
رووبارە شەرمنەکانی وەسوەسە
بە باڵای دار بەڕووی ئازار و
موناجاتەکانی دڵێکی بریندار
بە لەشی رووتی گەڵا و
هاواری غەمگینی تەمبور
بە رژانی مەرکانەی ماچ و
ئەبڵەق بوونی لێوە تامەزرۆکان
بە ئاینەکانی جوانیپەرستی و
خەیاڵە ئاوریشمییەکانی هەتاو
بە جامە پڕەکانی لەزەت و
پرچە نوتەکەکانی شەو
ئەوەی وەک باراناو ئەمخواتەوە
مەزرا وشکەکانی عەشقی تۆیە
ئەوەی وەک هەوا هەڵمدەمژێ
هەناسە شێدارەکانی عەشقی تۆیە
سوێندت بۆ ئەخۆم
بە کتێبی پیرۆزی ئەڤینداریی و
خوێنی رژاوی شۆڕەبییەک
بە درزی رۆحی ئاوێنەکان و
خەیاڵەکانی شمشاڵی سەفەر
بە بەلەمەکانی کەناری خەون و
مرەکەبی پێنووسی یەئس
بە بۆنی عەتری هەناسەکانت و
گوڵاوی فرمێسکە روونەکانت
بە جریوەی چۆلەکەی فەنتازیا و
قاسپەی کەوی کوێستانەکانی گریان
بە سەری بڕاوی ئازادیی و
هێلانەی تێکدراوی روانین
بە دەفتەرە مۆرەکانی ئەفسوون و
لاپەڕە گرینۆکەکانی زەمەن
بەو تاوانانەی هێشتا نەمکردوون و
ئەو خەونانەشی تا ئێستا نەمبینیون
ئەوەی لە قەفەسی عەشقی تۆدایە
باڵندەی سرکی رۆحی منە
ئەوەی لە گۆرانییە عاشقانەکانی مندایە
دێڕ بە دێڕ خورپەکانی دڵی تۆیە
ئەوەشی لەم جەنگەی عەشقی تۆدا
ورد و خاش ئەبێت، منم
سوێندت بۆ ئەخۆم
بە نامە تۆز لێنشتووەکانی غوربەت و
ئەو گوڵانەی بە ماچ سکێجمان کردن
بە درەوشانەوەی تەنیایی
لەم زەمەنە پڕ ژاوەژاوە و
بزەیەکی هەناسە سارد
لەم سەحرا وشکەڵانەی ژیاندا
بە ئاسمانە مەلولەکەی نیشتمان و
یادگارییە خۆڵەمێشییەکانی بیرکردنەوە
بە مەرقەدی تیشکاویی هەور و
گۆڕە تەنگەبەرەکانی حوزن
بە بەیداخی کەشتییە رەشپۆشەکان و
هەڵچوونی پیانۆیەکی زامدار
بە عیشوەی گوڵە نازناز و
حیکمەتی بێدەنگیی پەروانە
بە ژێی پڕ هاژەی رووباری مەراق و
بەربوونەوەی سێوی بێهودەیی
لە پیرە داری جەنگەکان
ئەوەی لەم جەنگی عەشقەدا
وەک تەرمێکی دێرین دەکەوێ، منم
ئەوەی لەناو ئەم عەشقە کڵپەسەندووەدا
پەڕ و باڵی ئەسووتێ، هەر منم
ئازیزم سوێندت بۆ ئەخۆم
بە بریسکەی چاوەکانت
ئەوەی بۆ عەشقی تۆ ئەسووتێ
منم، من

Previous
Next