گوڵێک لەمنداڵدانی شێدا.. عارف کوردە

زیندان.. ئینجانەیەک
لەگوڵی پەمەیی
هێلانەیەک..
بۆ کۆتری باڵ خوێناویی
تەمەنێک..هەڵکشان،
بەشاخی پیریدا
لەپێناو داگرتنی خۆردا
دەرکەوتنی ئیلا
لەسنگی هەیڤدا
پةنگ خواردنی گێژاویی خەیاڵ
بۆ دۆزینەوەی کەلەبەرێک
تروسکایی ئاسۆ،
لەدوو چاوی بەستراودا
کۆڵنەدان.. لەهەڵزەنیندا
تەکان.. لەپڕمەی ئەسپێکدا
ورەبەرزی.. لەدوندی تێکۆشاندا
خۆبەدەستەوەدان.. لەژێرپێدا
بۆ گەیشتن بەکەژاوەی ئازادی
کێوێک.. لەقوربانی
ئاسمانێک.. لەحەرفەکانی جوانی
بوکێک.. لەدەریای بەرخۆدان
درەختێک.. لەدڵی گاشەبەردێک
گەنجێتی.. تووایەوە
لەگڕەی ڕەشەبایەک
قەیرەیی..زنجیرەکانی زەمەن ئەپسێنی
لەنێو شیشبەندەکانیش بوی
ئاهەنگی گورگەبۆرەکانت تێکئەدا
بریسکەی چاوەکانت..
شەمشەمەکوێرەکان وێڵ ئەکات
ڕووناکیت.. لەقووڵایی شەوەزەنگدا
لەمنداڵدانی شێدا، قریشکاندت
بەقەدی شیشبەندەکانەوە باڵاتکرد
شەو.. هاوڕێی لاوێتیت
هیوا.. لەچاوی بەرەبەیاندا
ڕووبار.. لەهەناویی قەندیلدا
سوورەتاو.. لەهەرەسی بەفردا
مزگین.. بانگەوازێک لەمزگێنی
شکۆفەیەک.. بوو بەگوڵستانێک.

عارف کوردە