برینا به‌ری كاڤلانێ‌.. ئه‌مین بۆتانی

هه‌ی ئافه‌رین بۆ ته‌ خه‌نجه‌ر،،!!!
ئافه‌رین بۆ ته‌ خه‌نجه‌ر،،!!
به‌س بێژه‌ من
تو رۆژێ چه‌ند برینا ژبه‌ر دكه‌ی؟!
ما كۆلانێن خوینێ بۆچی زوی ب زوی
ڤان زێمارا ژبیر دكه‌ن؟!
ئه‌ز نزانم
ته‌ ئه‌ڤ هه‌می ئێش و ژانه‌
چه‌وا ل خۆ كۆم كرن؟!
به‌ختێ‌ خودێ
بده‌ستێ‌ ڤالا من نه‌زڤڕینه‌،
دڤێت تشته‌كی لخۆ بزانم؛
نه‌خۆ ئه‌ڤ هه‌می هێتیم و سێوییه‌
دێ‌ ب لۆما من خۆن..
لبیرا ته‌یه‌ وێ‌ رۆژێ
ده‌ما كیخایێ نه‌خری
نهالێن له‌زێ
دكرنه‌ ناڤ چۆكێن بارۆڤێ‌ دا،
گورێن تێهنی
بچاڤ نقاندنه‌كێ
دگه‌هشتنه‌ سه‌ر پاتكا مه‌ و
لسه‌ر هلما گولگولی مه‌خه‌ل دبوون..
ته‌ خه‌م پێ نه‌بیت
ئه‌ز دێ سترانێن خۆ
بۆ ته‌رمه‌كێ دی هه‌لگرم،،
به‌س بێژه‌ من
ته‌ دڤێت ڤالاهیێ بۆ كێ تژی بكه‌ی؟!
نێ‌ ده‌ڤ و لێڤێن ته‌
ژه‌نگا ئولفه‌تێ
ژحه‌فكێن خه‌ونا دڕه‌نن،،
ده‌مارێن دوینده‌یان
بهه‌ڕكینێ به‌ترمه‌ دكه‌ن.
هێێێی گزیرا ماقویل
لته‌ پیرۆز بیت؛
لته‌ پیرۆز بیت
ئه‌ڤ هه‌می دلمان و ده‌بار
ئه‌ڤ هه‌می خرقێن و كه‌بار،،
م دڤێت بزانم
ڤێ كه‌سابه‌تا حه‌لال بۆ كێ دكه‌ی؟!
ل قسویری یا من نه‌نێڕه‌ ئه‌ز خولام
مالی ئاڤا
مالی ئاڤا؛
مالی ئاڤا تو ڤێڕا دگه‌هی
لدویف ده‌ما حه‌سره‌تێ‌؛
موهرا خۆ
ل كاغه‌زا خاترخاستنێ بده‌ی،
مالی ئاڤا تو ڤێڕا دگه‌هی
لدویف ده‌ما كالبوونێ‌
جحێلینیێ
به‌رده‌یه‌ گێولێ دره‌نگیێ،،
نه‌هه‌رێ ێ ێ
تازه‌ یا ژخوه‌یه‌!!
رۆژا ته‌نگه‌زاران
لپشت هه‌فت چیایان ئاڤا بو،،
نه‌هه‌رێ‌ تازه‌ دلناهێلم
برینه‌كا ساڤا
ژڤێ قه‌ده‌را سۆر ڤه‌ده‌م،،
ما خۆ نه‌ ئه‌و
ژگرۆتنا په‌زێن نه‌چاریێ بێتره‌!!!
دێ بلا ئه‌و ژی
دناڤ ڤێ سوحبه‌تا كه‌ڤناردا بگه‌ڤزیت..
دێ بڕێسه‌
بڕێسه‌ ته‌شیا ڤێ مامكا كه‌سنه‌زان،
بڕێسه‌
ژهریا خه‌مگینی یا مه‌؛ بڕێسه‌!!!
شه‌رمه‌كا ستویر
ژپیستێ گای
بۆ روویێ فه‌له‌كێ‌ ڤه‌هینه‌،
نه‌قله‌كا دی یا سه‌ردابرنێ‌
بۆ مه‌ ڤه‌گێڕه‌؛
هشیار بی
وه‌ختێ‌ به‌حسی چرمسینا گوله‌كێ‌ دكه‌ی
هویر و مویرێن چ گولدانا تێكڤه‌نه‌ده‌!!
ره‌حمێ‌ ب ئاگری داببه‌
وه‌ختێ‌ دگه‌هیه‌ سۆتنا هناڤا،،
هشیار بی
كو دگه‌هیه‌ له‌هی و لێسه‌را
كه‌س هزره‌كا خراب ژبارانێ نه‌كه‌ت،،!!!
ره‌حمێ‌ ب ئاڤێ داببه‌
وه‌ختێ‌ دگه‌هیه‌ بهوژتنا حه‌یایێ..
ڤێ گاڤێ
ئه‌ز وه‌كی قوربانیه‌كێ جاش دبێژمه‌ ته‌؛
هشیار بی هه‌تكا من نه‌به‌ی،
كه‌سێ ب نامویسا مه‌ یا له‌وتی نه‌حه‌سینی..
پا دێ ڤێجا بلا پاشی
ئه‌ڤ عه‌رز و عه‌یالێ هه‌شپێوه‌ر
هه‌ر كه‌تیكانێ‌ بكه‌ن و
هه‌تا هه‌تا به‌ركێن وان
بڤێ حه‌نه‌كا تامسارڤه‌ زه‌عێر ب بن،!

… … … …

ئه‌مین بۆتانی
23/11/2021

Dengekan

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.