وەڵامێک لە نەخۆشخانەوە بۆ ئیدریس کەریم ناوێک.. ستیڤان شەمزینی
تا ساحێب ماڵ دزی گرت، دز خاوەن ماڵی گرت
ئەمڕۆ کە هاوکات بە دەردی شێرپەنچە و کۆرۆناوە دەناڵێنم، هاوڕێیەکم ئاگاداری کردم کە بابایەک بەناوی ئیدریس کەریم، بابەتێکی هەڵپڕۆکاندووە گوایە من شیعرێکی بەرێز کاوە عوسمانم کۆپی کردووە و لە بۆتەی شیعرێکی تردا بەناوی خۆمەوە دامڕشتۆتەوە. بەڵام من لێرە سەرنجی خوێنەر و ئیدریس بۆ چەند خاڵێک رادەکێشم:
یەکەم: ئەو قەسیدەیەی من لە هاوینی ساڵی 2018دا لە نەخۆشخانە گلیاد ئاینس نووسراوە و واتە لانیکەم بۆ سێ ساڵ و سێ مانگ بەر لە دووبارە بڵاوکردنەوەی لە سایتی بەڕێزی دەنگەکان دەگەڕێتەوە.
دووەم: بۆ سەلماندنی راستی لای سەرەوە، ئەم قەسیدەیە لە دیوانی “وەرزە سەوزەکانی ئەوین” کە هەر ساڵی 2018 چاپ و بڵاوکراوەتەوە، چاپ بووە.
سێیەم: لەگەڵ ئەم بابەتە فایلی پی دی ئێفی دیوانەکە و چەند وێنەیەکی مەراسیمی بڵاوکردنەوە هاوپێچ دەکەین و داوا لە سایتی دەنگەکان دەکەین هەموو وێنەکان و فایلە پی دی ئێفەکە بڵاوبکاتەوە.
چوارەم: ئێمە نامانەوێت کاک کاوە بە دزی ئەدەبی تۆمەتبار بکەین، بەڵام بە هەقیقەت نە کاک کاوە لەو ئاستەیە من شتی لێ بدزم، نە تێکستەکەی ئەو پێشی ئەوەی منە تا بیسەلمێنێ من لەوم دزیوە، چۆن دەکرێت تێکستێک سێ ساڵ و سێ مانگ پێشتر بدزرێت؟ ئەی بۆ پێچەوانەکەی راست نەبێت؟.
پێنجەم: ئەگەر ئیدریس کەریم کە وای بۆ دەچم ناوێکی فەیک بێت بە نووسینێکی تر داوای لێبوردن نەکات ئەوا دادگای لێ دەگرم، ئەگەر ئەوەشی نەکرد پێویستە سایتی دەنگەکان بابەتەکەی بسڕێتەوە و هیچ جارێکی تر بابەتی بڵاونەکاتەوە.
شەشەم: ماوەی بیست و سێ رۆژە من نەشتەرگەریم کردبوو بۆ هەڵدانەوەی کاسەسەرم و هاوکات تووشی پەتای کۆرۆنا بووم، پێموایە ئەو بۆشاییە و نائامادەییەم بە هەڵ زانراوە بۆ ئەو تۆمەتە بێ بناغەیە، لەم هەلومەرجە سەختەی تەندروستیمدا ناچاربووم روونکردنەوە بدەم، کە هیچ کات لە نووسەری ئەو بابەتە خۆشنابم بە نووسینی بابەتێکی تر نەبێت بۆ داوای لێبوردن.
ستیڤان شەمزینی
نەخۆشخانەی گلیاد ئاینس
2-12-2021
—————————-
ناوی كتێب: وەرزە سەوزەكانی ئەوین
بابەت: شیعر
نووسینی: ستیڤان شەمزینی
تایپ: نووسەر
دیزاین: هەرێم عوسمان
چاپ: چاپخانەی كارۆ
تیراژ: 1000 دانە
نرخ: 5000 دینار
ساڵی چاپ:2018
نۆبەتی چاپ: چاپی یەكەم
بۆ خوێندنەوەی ئەم کتێبە کلیکی ئێرەبکەن..
