ئەلف و بێی دڵداری.. شەماڵ بارەوانی
١
ئەفسووس
هێشتا
ئەلف و بێی دڵداریم
پێی نەگرتبوو
هێشووی ڕێزمانی دێڕەکانم
کاڵبوویەوە
هێشتا
ئیعرابی ڕستەکانم
باڵق نەبوبوون
هەموو حەرفەکانم
مەحکوم بوون بەسەراب
٢
تازە درەنگە بۆ ژماردنی
قەتماغەی خۆزگەکانم
خۆمن
من ئێستا
جگە لەلەتێک هوڕژن و
بوخچەیەک دڵشکان
چیترم نەماوە
دەسنووسی بیرەرەوریەکانم
هەمووی
بەحەسرەت سەریان نایەوە
و
نەغمەی حەزەکانم
سەراپا بوون بەخۆڵەمێش
من چیتر
ناتوانم سەمای عیشق
لەسەر خەڵووزی چاوەڕوانی
دابەستم
و
فریای سڕکردنی
ئەو هەموو فوغانەی
مارشی قەڵەقیم بکەوم
تازە فانۆزی
هیلاکیم
پێی نایه سنورەکانی کزی
و
باڵندەی خەمەکانم
گەیشتن بە تخوبی
موستەحیل
٣
بێزاربووم
هێندەی
موتاڵای سورەتی
دڵشکان بکەم
هێندەی یاسینی
حوزن
بەدیار نەزیفی جەستەی
یەئسەکانمەوە بخوێنم
٣
ئۆه خودایە
چ زوو
شەقامی مەراقم
وشکی کرد
و
هەموو خەونەکانم
هەر بەکاڵی کوژانەوە
چ زوو
دۆسیەی شیعرەکانم
پۆشاکی ماتەمیان پۆشی
و
وشەکانم
چونەحاڵەتی فەنابوون
٤
من ئیتر
هیچ گەڵای پێکەنینێکم
پێوە نەماوە بۆ ڕنینەوەو
تنوکێک خەم بۆ ڕژان
خودایە
ئەوە چ عەبەسێک بوو
لەپێدەشتی تەنیاییم دایکرد
ئەوە چ هەڵکڕووزانێک بوو
لەدەربەندی ڕۆحم
داگیرسا
ئەوە چ تەڵبەندێک بوو
لەنیشتمانی ئەمەلم هەڵتۆقا
و
ئەوە چ هەڵوەرینێک بوو
لە ئامێزی دارستانی
هیواکانم هەڵیکرد
خودایە
تۆ پێم بڵێ
ئەوە قانونی عیشق بوو
یان سیاسەتی
سوتان!
